BAGIAN 2
Paradeiso gabe Mago
Sada surusuruan na mangalo tu Debata mangelaela si Adam dohot si Hawa, jolma na parjolo i, asa unang mangoloi Debata. I do umbahen bongot dosa dohot hamatean tu portibi on
ANDORANG so ditompa jolma, ditompa Debata torop tompaan na mardaging tondi—i ma surusuruan. Di porlak Eden, sada surusuruan na mangalo tu Debata, na digoari Sibolis, mangelaela si Hawa mangallang parbue ni hau naung diorai ni Debata panganonna.
Marhite ulok, Sibolis paboahon tu si Hawa, ndang sude na denggan dilehon Debata tu nasida jala ndang tutu nasida mate molo dipangan parbue ni hau i. Jadi Sibolis mandok margabus do Debata tu si Adam dohot si Hawa tingki diorai Debata nasida manganhon parbue ni hau i. Sibolis mandok molo ndang mangoloi Debata, i do dalan na dumenggan laho mandapot parbinotoan na sumurung dohot haluaon. Alai, gabus do i sude—laos i ma gabus na parjolo na hea dihatahon di tano on. Sasintongna on parohon parsoalan tu hadaulaton ni Debata do, tutu do tama Debata mamarenta jala toho do sude na ni ulahon ni Debata parohon na denggan tu sude jolma.
Dihaporseai si Hawa gabus ni Sibolis i. Gabe tubu rohana laho manganhon parbue i, jala dipangan ibana ma. Dung i, dilehon ma deba tu si Adam, tunggani dolina. Ujungna, mardosa ma nasida. Tingki dipangan nasida parbue ni hau i, na mangalo tu Debata do nasida disi. Ala dituntun laho manganhon parbue ni hau i, on patuduhon na so olo do nasida diparenta Sipanompa na mangalehon angka na denggan dohot hangoluan na tipak tu nasida.
Pinompar i, “mangalisathon ulum, gabe pargutonmu tambihulna“.–1 Musa 3:15
Diuhum Debata ma si Adam dohot si Hawa. Dung i, disurirangkon Ibana haroro ni Pinompar, manang Sipalua, na laho mangalisathon naga, i ma Sibolis. Ndang pintor mate si Adam dohot Si Hawa tingki i, alai diloas Debata do nasida marpinompari, jala dipatudu do asi ni rohaNa tu pinomparna. Dilehon Debata ma panghirimon, marhite sahalak na sinuruNa na paluahon nasida sian dosa dohot hamatean. Songon dia sangkap ni Debata digohi taringot sipalua di ari na naeng ro—jala ise do na laho suruonNa—sude on dipaboa di Bibel jala dipapatar tu jolma sian tingki tu tingki.
Dipabali Debata ma si Adam dohot si Hawa sian Paradeiso. Hir hodok nasida laho mangalului sipanganon di ruar ni porlak Eden. Ditubuhon si Hawa ma si Kain, buhabajuna. Maranak marboru ma nasida muse, ditubuhon ma si Abel dohot si Set, ompu ni si Noak.
—Dibuat sian 1 Musa bindu 3 sahat tu 5; Pangungkapon 12:9.