Opat Bawa na Mangoloi Jahowa

Tikki disuru si Nebukadnesar asa diboan akka pamimpin ni Juda tu Babel, dibahen ibana ma sahalak pejabat istana i ma si Aspenas lao mengawasi nasida. Disuru si Nebukadnesar ma si Aspenas lao mamillit akka bawa na poso na ussehat jala na ummalo. Lao dilatik do akka bawa on saleleng tolu taon asa boi gabe pejabat di Babel. Diajari ma nasida manjaha, manurat, dohot makkatai di bahasa Akkad, i ma bahasa ni halak Babel. Dilehon do tu nasida akka sipanganon dos songon na diallang raja. Adong ma opat bawa, i ma si Daniel, si Hanania, si Misael, dohot si Azaria. Digatti si Aspenas ma goar ni nasida gabe goar ni halak Babel, i ma si Beltesasar, si Sadrak, si Mesak, dohot si Abednego. Alai toktong do nasida mangoloi Jahowa?

Sai dioloi bawa na opat on do Jahowa. Diboto nasida do, dang boi diallang nasida akka sipanganon ni raja. Alana didok di Patik, adong piga-piga binatang na so boi diallang. Alani i, didok nasida ma tu si Aspenas, ‘Unang ma lehon akka sipanganon ni raja tu hami.’ Didok si Aspenas ma, ‘Molo dang diallang hamu i, jala molo diida raja hamu marsahit, gabe dipamate raja ma annon au!’

Alai didok si Daniel ma tu panjaga ni nasida, ‘Holan sayur dohot aek ma lehon tu hami saleleng sappulu ari. Ida ma annon ise na ussehat, hami do manang akka halak na mangallang sipanganon ni raja i.’ Ujungna dioloi ma pangidoanna i.

Dukkon sappulu ari, ussehat do nasida sian akka bawa na asing. Las do roha ni Jahowa ala toktong nasida mangoloi Ibana. Dilehon Jahowa do parbinotoan tu si Daniel lao mamboto arti ni penglihatan dohot nipi.

Dung sae dilatik sude bawa i, diboan si Aspenas ma nasida tu si Nebukadnesar. Makkatai ma raja tu nasida, jala diida raja i ummalo jala umbisuk do si Daniel, si Hanania, si Misael, dohot si Azaria sian na asing. Dipillit ma nasida na opat gabe pejabat. Jotjot do raja manukkun tu nasida molo adong masalah. Dibahen Jahowa do  nasida ummalo sian na asing dohot sian akka peramal.

Nang pe si Daniel, si Misael, si Hanania, dohot si Azaria tinggal di inganan na dao, alai dang lupa nasida tu Jahowa. Molo ho, toktong do diingot ho Jahowa nang pe dang rap ho dohot natua-tuam?