Harajaon na Martahan Saleleng ni Lelengna

Marnipi ma Raja Nebukadnesar di tikki borngin. Marsak ma ibana jala dang boi modom alani nipina i. Dijou ma akka peramal jala didok ma, ‘Patorang ma jo tu au aha nipikku.’ Didok nasida ma, ‘Paboa ma tu hami aha nipimi, ale rajanami.’ Alai didok si Nebukadnesar ma, ‘Daong. Ikkon hamu do na paboahon aha nipikku. Molo dang, hupamate hamu.’ Didok nasida ma muse, ‘Paboa ma tu hami nipimi raja, asa dipaboa hami artina.’ Didok raja i ma, ‘Na naeng mangoto-otoi au do hamu? Paboa ma aha nipikku!’ Didok nasida ma, ‘Maol hian do pangidoan ni raja i. Dang adong jolma na mamboto i.’

Muruk situtu ma si Nebukadnesar. Disuru ma asa dipamate sude halak na malo, termasuk ma i si Daniel, si Sadrak, si Mesak, dohot si Abednego. Dipangido si Daniel ma tu raja asa dilehon tikki. Martangiang ma si Daniel dohot tolu donganna lao mangido bantuan ni Jahowa. Aha do na diulahon Jahowa?

Dipaboa Jahowa ma nipi ni si Nebukadnesar i tu si Daniel jala dipaboa do arti ni nipi i. Marsogotna i, didok si Daniel ma tu pelayan ni raja, ‘Unang ma pamate akka bawa na malo i. Hupaboa pe aha nipi ni raja i.’ Diboan pelayan i ma si Daniel tu si Nebukadnesar. Didok si Daniel ma tu raja i, ‘Nungnga dipaboa Debata aha na lao masa tu raja i. On ma nipi ni raja i: Diida raja i ma sada patung na massai balga, uluna sian mas. Andorana dohot tanganna sian perak. Butuhana sahat tu hae-haena sian tombaga. Lutut sahat tu pergelangan ni patna sian bosi. Pergelangan ni patna sahat tu jari-jarina sian bosi marcampur tano liat. Dung i, adong ma sada batu na diponggolhon sian dolok jala hona tu pat ni patung i. Maruppak jala hancur ma patung i. Gabe orbuk ma i jala dihabangkon alogo. Alai gabe sada dolok na timbo ma batu i jala memenuhi tano on.’

Didok si Daniel ma muse, ‘On ma arti ni nipi ni raja i: Ulu ni patung na sian mas manggombarhon harajaon ni raja i. Perak manggombarhon harajaon na berkuasa dukkon harajaonmu. Dung i, adong ma sada harajaon na songon tombaga na lao mamaretta di saluhut tano on. Harajaon berikutna, karas songon bosi. Na parpudi, adong sada harajaon na tarbagi. Gogo do deba harajaon i songon bosi, alai gale do na deba nai songon tano liat. Batu na gabe dolok i manggombarhon Harajaon ni Debata. Hancurhononna ma sude harajaon i jala martahan do Harajaon ni Debata i saleleng ni lelengna.’

Marsomba ma si Nebukadnesar tu si Daniel. Didok ma, ‘Debatam do na paboahon arti ni nipi i tu ho. Dang adong Debata na songon i.’ Ujungna dang jadi dibunu si Daniel. Justru, dibahen si Nebukadnesar do ibana gabe pamimpin ni sude provinsi na adong di Babel dohot pamimpin ni sude halak na malo. Boi do dibereng ho songon dia Jahowa mangalusi tangiang ni si Daniel?