Si Daniel di Lubang Singa

Di pudian ni ari, gabe raja ni Babel ma si Darius na sian Media. Lomo do rohana tu si Daniel ala ummalo ibana sian na asing. Dipillit si Darius ma si Daniel gabe pengawas ni akka pejabat di luat i. Alai cemburu do akka pejabat i tu si Daniel, gabe naeng dibunu ma ibana. Diboto nasida do na martangiang si Daniel tu Jahowa tolu hali sadari. Jadi didok nasida ma tu si Darius, ‘O raja, bahen ma peraturan asa holan tu ho sude jolma martangiang. Manang ise na mangalo, ikkon dipamasuk ma ibana tu lubang singa.’ Disetujui si Darius ma i, jala ditanda tangani.

Dung dibege si Daniel peraturan na baru i, lao ma ibana tu jabuna. Martangiang ma ibana tu Jahowa di jolo ni jandela na tarbukka. Alai toppu ma masuk akka pejabat i jala diida ma si Daniel martangiang. Pittor dipaboa ma i tu si Darius, didok ma, ‘Dialo si Daniel do ho. Martangiang do ibana tu Debatana tolu hali sadari.’ Dang lomo roha ni si Darius molo dipamate si Daniel. Dilului ma cara lao menyelamatton si Daniel. Alai dang boi be, ala nungnga ditanda tangani ibana peraturan i. Ujungna, disuru ibana ma asa dipamasuk si Daniel tu lubang singa.

Dang boi si Darius modom saborngin i mamikkiri si Daniel. Dung manogot, lari ma ibana tu lubang singa i. Didok ma, ‘Daniel, dijaga Debatam do ho?’

Didok si Daniel ma, ‘Ditutup malaikat ni Jahowa do baba ni akka singa on. Dang dihahua akka singa i au.’ Las hian ma roha ni si Darius mambege soara ni si Daniel! Disuru ma asa dipakaluar si Daniel sian i. Dang lukka ibana. Dung i didok Raja Darius ma, ‘Pamasuk ma na naeng mambunu si Daniel tu lubang singa.’ Pittor diterkam akka singa i ma akka pejabat i tikki dipamasuk tu lubang singa i.

Dung i didok si Darius ma tu akka rakyatna, ‘Hamu sude, pasangap hamu ma Debata ni si Daniel. Diselamatton Ibana do si Daniel sian akka singa.’

Molo ho, martangiang do ho tu Jahowa ganup ari songon si Daniel?