Surat di Dinding

Adong ma sahalak raja ni Babel na margoar si Belsasar. Di sada tikki, diundang ibana ma marribu pejabat lao marpesta. Disuru ma akka pelayanna asa dibuat akka makkuk mas na diboan si Nebukadnesar sian bagas joro ni Jahowa. Sian akka makkuk i do si Belsasar dohot akka tamuna minum, jala dipuji-puji nasida do debata ni nasida. Alai toppu ma adong sada tangan manurat di dinding ni istana i. Jala dang adong na mamboto arti ni hata i.

Gabe mabiar ma si Belsasar. Dijou ibana ma akka halak na malo jala marjanji ma ibana tu nasida, ‘Molo boi dipatorang hamu hata on, gabe parhuaso na patoluhon ma hamu di Babel on.’ Berupaya do nasida patorakkon, alai dang adong na boi. Dung i didok ratu ma tu ibana, ‘Adong do sahalak bawa na margoar si Daniel. Hea do ibana mangurupi si Nebukadnesar. Boi do ibana patorakkon hata on.’

Ro ma si Daniel manjuppangi raja. Didok si Belsasar ma, ‘Molo boi dipatorang ho artina, hulehon ma tu ho kalung mas jala hubahen ma ho gabe parhuaso na patoluhon di Babel.’ Dialusi si Daniel ma, ‘Mauliate ma raja, unang pola lehon i tu au. Hupaboa pe tu ho arti ni hata i. Ginjang do roha ni bapakmu si Nebukadnesar. Alani i, gabe dipatutoru Jahowa ibana. Takkas do sudena i diboto ho, alai dang dipasangap ho Jahowa. Minum do ho sian akka makkuk mas na dibuat sian bagas joro ni Jahowa. Alani i ma disuratton Debata hata on: Mene, Mene, Tekel, dohot Parsin. Artina, taluhonon ni Media dohot Persia ma Babel. Jala dang gabe raja be ho.’

Hira na so adong do na boi manaluhon Babel. Dikalilingi tembok na hapal dohot sunge na bagas do kota i. Alai di borngin i, ro ma halak Media dohot Persia menyerang nasida. Dipapinda Raja Sirus sian Persia do aliran aek ni sunge i. Gabe boi ma akka tentarana masuk tu gerbang kota. Tarbukka do gerbang ni kota i di tikki i! Pittor masuk ma nasida, ditaluhon ma kota i, jala dibunu ma si Belsasar. Gabe si Sirus ma na menguasai Babel.

Di taon berikutna, dibahen si Sirus ma boa-boa, ‘Nungnga didok Jahowa tu au asa dipadenggan muse bagas jorona di Jerusalem. Hamu akka bangsona, lao ma hamu padenggatton i.’ Songon na dijanjihon Jahowa, godang do halak Jahudi na mulak tu Jerusalem dukkon 70 taon. Dipaulak si Sirus do muse makkuk mas dohot perak na dibuat si Nebukadnesar sian bagas joro. Boi do diparrohahon ho songon dia Jahowa mamakke si Sirus lao mangurupi bangsona?