Nipi Taringot Pohon na Balga

Di sada borngin, marnipi ma si Nebukadnesar. Gabe mabiar ma ibana. Dijou ibana ma akka halak na malo asa paboahon arti ni nipina i. Alai dang adong na boi mangulahon i. Ujungna, dipaboa raja ma tu si Daniel.

Didok si Nebukadnesar ma tu si Daniel, ‘Di nipikki, huida ma sada pohon. Sahat tu langit do timbona, jala tarida do i sian sude liat portibi on. Bagak do bulungna jala godang buahna. Ro do akka binatang marlinggom tusi. Akka pidong pe marasar do di dakkana i. Dung i ro ma sada malaikat sian surgo. Didok ma, “Ponggol ma pohon on dohot akka dakkana. Alai tinggalhon ma tunggul dohot akarna di tano. Ikkat ma muse tunggulna i mamakke bosi dohot tombaga. Lao muba ma roha ni pohon i sian roha ni jolma gabe roha ni binatang. Asa sude jolma mamboto Debata do na marhuaso, jala dilehon do harajaon tu halak na dihalomohon rohana.”’

Dipaboa Jahowa do tu si Daniel arti ni nipi i. Gabe mabiar ma si Daniel. Didok ma, ‘Ale rajanami, hurippu taringot tu musum do arti ni nipi on. Hape taringot tu ho do i. Ho do pohon na balga na diponggolhon i. Dang gabe raja be ho. Gabe mangallang rumput ma ho di ladang, dos songon binatang buas. Alai didok malaikat i do asa ditinggalhon tunggul dohot akarna. On patuduhon na lao gabe raja do ho muse.’

Sataon dukkon i, mardalan-dalan ma si Nebukadnesar di loteng ni istanana. Dipuji-puji ibana ma kota Babel. Didok ma, ‘Bereng hamu ma kota na massai uli on. Au do na mambangun on. Jago do au kan!’ Dung didok ibana songon i, adong ma soara sian surgo mandok, ‘Nebukadnesar! Dang gabe raja be ho.’

Laos di tikki i, gabe rittik ma si Nebukadnesar jala gabe songon binatang buas ma ibana. Diusir ma ibana sian istana. Tinggal ma ibana rap dohot akka binatang buas di ladang. Ganjang do obukna songon ibbulu ni lali, jala sisilonna pe songon sisilon ni pidong.

Dukkon pitu taon, gabe waras ma muse si Nebukadnesar. Dibahen Jahowa ma muse ibana gabe raja di Babel. Dung i didok si Nebukadnesar ma, ‘Hupuji ma Jahowa, Raja na di surgo. Saonari huboto ma, Jahowa do na marhuaso. Dipatutoru do halak na ginjang roha, jala dilehon do harajaon tu halak na dihalomohon rohana.’