Mei

Tikki poso dope Jesus, unduk do ibana tu natua-tuana. Dang hea dialo Jesus natua-tuana, manang dang hea didok rohana na ummalo do ibana sian natua-tuana. Ala anak siakkangan do Jesus, marsitutu do ibana mangulahon tanggung jawabna. Pasti marsiajar do ibana gabe tukkang hau sian si Josep, asa boi mangurupi keluargana. Pasti nungnga dipaboa si Josep dohot si Maria songon dia partubu ni Jesus, jala aha na didok suru-suruan ni Debata taringot ibana. (Luk. 2:8-19, 25-38) Alai, dang cukkup holan manangihon carita ni natua-tuana. Diparsiajari Jesus do i muse sian akka Gulungan. Sian dia taboto na ringgas do Jesus mamparsiajari Hata ni Debata? Alana tikki gelleng dope ibana, longang do roha ni akka guru di Jerusalem mambege “pangantusion dohot angka alusna”. (Luk. 2:46, 47) Jala tikki marumur 12 taon dope Jesus, nungnga godang diparsiajari ibana Hata ni Debata. Gabe pos ma rohana, Jahowa do Bapakna.—Luk. 2:42, 43, 49. w20.10 29-30 ¶13-14

Porsea tu haheheon ni Jesus, i ma mula ni pakkirimon ni halak Kristen. Tikki dipaboa si Paulus taringot haheheon i, adong do tolu hasittongan na dipaboa ibana: (1) “Kristus na mate alani dosanta.” (2) “Nunga dikubur ibana.” (3) “Hehe do ibana di ari na patoluhon songon na tarsurat di Buku na Badia i.” (1 Kor. 15:3, 4) Aha do manfaatna molo taboto tolu hasittongan on? Nungnga dipaboa si Jesaya hian, “na lao dipamate do [Messias] sian luat ni halak na mangolu” jala “dikuburhon rap dohot akka parjahat”. Alai didok si Jesaya do muse, mate pe Messias, alani “dosa ni godang halak” do. Songon i ma cara ni Jesus paradehon tobusan. (Jes. 53:8, 9, 12, NWT; Mat. 20:28; Rom 5:8) Tikki taboto tolu hasittongan on, gabe boi ma pos rohatta lao disesa dosatta jala dipalua hita sian hamatean. Dung i gabe pos ma rohatta mulak mangolu do muse halak na tahaholongi naung mate. w20.12 2-3 ¶4-6; 5 ¶11

Jotjot do si Paulus marbarita di sinagoga ni halak Jahudi. Misalna, tikki di sinagoga Tessalonik, “Saleleng tolu minggu, ganup ari Sabbat, dipangke si Paulus ma Surat na Badia laho mangkata-hatai tu [halak Jahudi].” (Ul. 17:1, 2) Sian keluarga Jahudi do si Paulus, jadi lomo do ra rohana marbarita di sinagoga. (Ul. 26:4, 5) Boi do diattusi ibana cara marpikkir ni halak Jahudi. Jadi malo do ibana paposson roha ni nasida tikki marbarita. (Plp. 3: 5) Tikki diusir akka halak si Paulus sian Tessalonik dohot sian Berea, lao ma ibana tu Atena. Disi, “martukar pingkiran ma ibana di sinagoga rap dohot halak Jahudi songon i nang halak na sian bangso na asing na manomba Debata”. (Ul. 17:17) Alai tikki marbarita ibana di onan, asing do akka halak na dijuppangi ibana disi. Godangan nasida akka guru do, dohot akka halak na so Jahudi. Jadi barita na dipasahat si Paulus i, ‘ajaran na baru’ do i di nasida. Jadi didok nasida ma tu ibana, “Ndang hea dope hubege hami taringot i.”—Ul. 17:18-20. w20.04 9 ¶5-6

Unang ma tauhumi diritta, dang holan sahalakta na berjuang mangatasi hasomalan na roa. Ingot ma, sude do jolma mardosa. Alani i, sude do hita porlu mandapot asi ni roha ni Debata marhite tobusan. (Eps. 1:7; 1 Joh. 4:10) Jala boi do akka dongan di huria patoguhon hita! Sai rade do nasida manangihon hita jala urupan ni nasida do hita asa toktong togu. (Poda 12:25; 1 Tes. 5:14) Si Joy donganta borua sian Nigeria, hea do marmetmet ni roha. Didok ibana do songon on, “Dang huboto be manang aha sibahenokku molo dang adong akka dongan di huria. Marhite akka dongan di huria do dialusi Jahowa tangiakku. Marsiajar do au sian akka dongan, songon dia cara patoguhon na asing.” Dang sai diboto akka donganta na porlu hita dipatogu. Jadi hita ma na parjolo paboahon tu akka dongan na gabe teladan na porlu hita dipatogu. w20.12 23-24 ¶7-8

Somalna asa boi hita marale-ale tu sasahalak, ikkon jotjot do hita rap dohot ibana. Dung makkata-hatai hita taringot pakkilalaatta dohot aha na tapikkirhon, boi ma hita marale-ale tu ibana. Alai, dang mura asa boi marale-ale tu Jesus. Boasa? Ala dang hea hita pajuppang langsung dohot Jesus. Halak Kristen di abad na parjolo pe godang do na so hea pajuppang dohot ibana. Alai nang pe songon i, didok Apostel Petrus do, “Nang pe ndang hea diida hamu ibana, dihaholongi hamu do ibana. Nang pe ndang diida hamu ibana saonari, dipatuduhon hamu do haporseaon tu ibana.” (1 Ptr. 1:8) Alani i, boi do hita marale-ale tu Jesus nang pe dang hea dope hita pajuppang dohot ibana. Jala, ala dang boi hita makkatai tu Jesus. Tikki martangiang hita, tu Jahowa do tapasahat aha na di rohatta. Memang, di bagasan goar ni Jesus do hita martangiang, alai dang hea hita makkatai langsung tu Jesus. Jala, Jesus pe dang lomo rohana molo hita martangiang tu ibana. Boasa? Alana ulaon panombaon do martangiang i. Jala holan Jahowa do na ikkon tasomba. (Mat. 4:10) Alai nang pe songon i, boi do tapatudu holongta tu Jesus. w20.04 20 ¶1-3

Akka pelari na di parlumbaan Junani pe adong do tantanganna. Olo do gabe loja nasida, jala gabe haccitan dagingna. Alani i, andorang so martanding, ikkon marlatik do nasida. Jala manjaga dirina asa toktong sehat. Songon pelari i, hita pe dilatik do asa boi torus marlojong di parlumbaan. Alai uttabo do hita sian akka pelari i. Alana molo hita, adong do gogo sian Jahowa. Jala dang marna habis gogo i. Jadi molo taasahon Jahowa, dang holan na dilatik hita alai dilehon do muse gogo tu hita! Godang do tantangan na hea diadopi si Paulus. Hea do ibana direhei, dianiaya, jala sipata gale do ibana. Ikkon ditaon ibana do ‘suga na di bagasan dagingna’. (2 Kor. 12:7) Alai dang menyerah ibana alani i sude. Gariada, dihilala ibana marhite akka tantangan i ma boi diasahon ibana Jahowa. (2 Kor. 12:9, 10) Ala songon i do cara marpikkir ni si Paulus, diurupi Jahowa ma ibana asa boi mangadopi i. w20.04 29 ¶13-14

Sada silehon-lehon do di hita ala boi gabe “dongan saulaon” ni Jahowa, Jesus, dohot akka suru-suruan. (2 Kor. 6:1) Rap saulaon do hita dohot nasida manang didia pe hita marbarita. Didok si Paulus do taringot dirina dohot sude na dohot tu ulaon on, “Dongan saulaon ni Debata do hami.” (1 Kor. 3:9) Jala gabe dongan saulaon ni Jesus do hita. Dung diparettahon Jesus akka apostelna asa mambahen ‘saluhut halak sian nasa bangso gabe sisean’, didok ibana do, “Sai na dongananku do hamu.” (Mat. 28:19, 20) Boha taringot akka suru-suruan? Las do rohatta ala diurupi akka suru-suruan hita lao paboahon “barita na uli sisaleleng ni lelengna tu angka jolma na di tano on”! (Pgk. 14:6) Aha do hasilna? Songon boni na madabu tu tano na denggan, adong do piga-piga halak na olo manjalo barita na tapasahat. (Mat. 13:18, 23) Ise do na mambahen nasida gabe manjalo hasittongan jala marparbue? Dipaboa Jesus do di ayat sadari on. w20.05 30 ¶14-15

Marjuta keluarga saonari sursar alani marsirang. Haru keluarga na tinggal sajabu pe boi do dang akrab. Sahalak penasehat keluarga mandok, “Sibuk do bapakna, omakna, dohot gellengna mangulahon ulaonna be. Sibuk do nasida markomputer, mamakke tablet, martelepon, jala marvideo game. Nang pe nasida tinggal sajabu, hira na so marsitandaan do nasida.” Unang ma hita songon halak na di portibi on na so patuduhon holong. Ikkon berupaya do hita patuduhon holong, dang holan tu anggota keluargatta, alai dohot do tu sude dongan sahaporseaon. (Rom 12:10) Tapatudu ma holong tu dongan sahaporseaon songon na tapatudu tu anggota keluargatta. Hasilna gabe marsada ma hita lao manomba Jahowa.—Mik. 2:12. w21.01 20 ¶1-2

Sada tim olahraga na kompak, boi do monang dibandingkon tu tim na so olo kerja sama. Suang songon i ma rohatta. Boi do hita marhasil molo tapasada pikkiratta, lomo ni rohatta dohot pakkilalaatta lao manomba Jahowa. Ingot ma, lomo do roha ni Sibolis asa tarbagi rohatta. Marsitutu do ibana mambahen asa dang sadalan pikkiran, lomo ni roha, dohot pakkilalaatta tu lomo ni roha ni Debata. Ikkon sian nasa roha do hita manomba Jahowa. (Mat. 22:36-38) Jadi unang ma tapaloas Sibolis mambahen tarbagi rohatta! Martangiang ma tu Jahowa songon si Daud, “Sai pasada ma rohangku mangkabiari goarmu.” Marsitutu ma hamu mangulahon isi ni tangiangmuna i di ngolumuna. Sian keputusan na dibahen hamu ganup ari, na gelleng nang na balga, patudu ma na dipasangap hamu goar ni Jahowa. Molo diulahon hamu i, las ma roha ni Jahowa manjou hamu Sitindangina. (Poda 27:11) Jala rap ma hita sude mandok songon hata ni Panurirang Mika, “Alai anggo hita mardalan marhite-hite goar ni Jahowa Debatanta ro di saleleng ni lelengna.”—Mik 4:5. w20.06 12-13 ¶17-18

Ala marsitutu raja utara dohot akka pamarettaon na asing lao menyerang naposo ni Debata, gabe muruk situtu ma Debata na Sun Hinagogo i. Dung i, masa ma porang Armagedon. (Pgk. 16:14, 16) Tikki i, diripasson ma Gog di tano Magog na manggombarhon raja utara dohot akka negara na asing jala “ndang adong nanggo sahalak mangurupi ibana”. (Dan. 11:45) Sian surirang ni si Daniel i taboto ma songon dia do Debata mangaripasson raja utara dohot sekutuna, jala songon dia hita dipalua. (Dan. 12:1) Aha do lapatan ni ayat on? Si Mikhael, i ma goar na asing sian Jesus Kristus, Rajatta. Ibana ma na “hehe humongkop” akka naposo ni Debata di taon 1914, tikki gabe Raja ibana di Harajaon ni Debata na di surgo. Haduan, “hehe” do ibana lao mangaripasson akka musuna di porang Armagedon. Porang on ma na gabe ujung ni “tingki hagogotan” na disurat si Daniel. Di surirang ni si Johannes na di bukku Pangungkapon, digoari ma tikki hagogotan on “hasusaan bolon”.—Pgk. 6:2; 7:14. w20.05 15 ¶15-17

Tikki gabe hatoban si Josep jala dipenjara, dang adong na boi tarbahen ibana manguba situasi i. Alai dang sai dipikkiri akka ulaon na so boi diulahon ibana, ringgas do ibana makkarejoi tugasna. Torus do ibana marsitutu pasonakkon roha ni Jahowa jala dipasu-pasu Jahowa do sude na diulahon si Josep. (1 Mus. 39:21-23) Pengalaman ni si Josep paingotton hita kejam do akka halak na di portibi on. Sipata akka dongan di huria pe olo do mambahen haccit rohatta. Alai tabahen ma Jahowa inganan parlinggomatta asa unang metmet rohatta jala gabe mandao sian Ibana. (Ps. 62:6, 7; 1 Ptr. 5:10) Songon si Josep, taingot ma hira-hira marumur 17 taon do ibana tikki mandapot nipi sian Jahowa. On ma buktina na pos do roha ni Jahowa tu akka na poso. Saonari godang do akka na poso maniru si Josep. Porsea do nasida tu Jahowa. Godang do sian nasida na dipenjarahon ala dang olo nasida mangalo paretta ni Jahowa.—Ps. 110:3. w20.12 16 ¶3; 17 ¶5, 7

Songon si Petrus dohot si Johannes, dihilala nasida sada hasangapon do molo dianiaya ala mangihutton Jesus jala marbarita taringot ibana. (Ul. 4:18-21; 5:27-29, 41, 42) Dang gabe maila nasida alani i. Jala molo taida saonari, unggodang do hasil ni akka ulaon ni nasida sian ulaon ni akka musuna najolo. Misalna, adong do piga-piga sisean ni Jesus na manuratton bukku na adong di Bibel. Hasilna, adong marjuta halak na gabe mamboto taringot Harajaon ni Debata sian bukku na disurat nasida i. Harajaon ni Debata na dibaritahon nasida nungnga mamaretta be di surgo jala Harajaon i ma annon na mamaretta tano on. (Mat. 24:14) Saonari, nungnga gabe raja be akka sisean i di surgo. Hape akka parhuaso na di Rom nungnga mate nasida. Molo adong pe sian nasida na dipahehe, akka sisean ni Jesus i ma na mamaretta nasida haduan.—Pgk. 5:10. w20.07 15 ¶4

Massai togu do haporseaon ni si Abraham tu janji ni Jahowa. Gabe songon naung diida ibana ma Messias i, i ma Raja ni Harajaon ni Debata. Alani i, didok Jesus do tu halak Jahudi, “Marlas ni roha do amamuna si Abraham naeng marnida harorongku, saut do i diida ibana, gabe las ma rohana.” (Joh. 8:56) Takkas ma, diboto si Abraham, adong do piga-piga sian akka pinopparna na lao gabe bagian sian Harajaon ni Debata. Jala olo do ibana paimahon Jahowa pasautton janjina i. Songon dia si Abraham patuduhon na dipaima ibana do kota manang Harajaon na dibahen Debata? Dang olo parsidohot si Abraham tu sude pamarettaon na adong di portibi on. Marpinda-pinda do ibana, dang dibahen ibana jabu di sada inganan asa toktong tading disi. Jala dang marpihak ibana tu raja di portibi on. Asing ni i, dang dibahen si Abraham pamarettaonna sandiri. w20.08 3 ¶4-5

Di Paradeiso haduan, marjanji do Jahowa dang adong be halak na mandok, “Na gale do ahu.” (Jes. 33:24) Alai dang pittor gabe sempurna nasida. Alana molo pittor gabe sempurna, gabe dang boi ma ditanda keluarga dohot donganna nasida. Jadi di Pamarettaon Saribu Taon haduan, bertahap do sude jolma gabe sempurna. Di ujung ni saribu taon i, dilehon Jesus ma Harajaon i tu Bapakna. Ujungna, marhite Harajaon ni Debata, saut ma sude na dihalomohon Jahowa. (1 Kor. 15:24-28; Pgk. 20:1-3) Bayakkon ma boha do perasaanmuna tikki pajuppang muse dohot halak na dihaholongi hamu na dipahehe. Olo do ra gabe mekkel manang tangis hamu alani las ni rohamuna. Manang marende do ra hamu lao mamuji Jahowa alani i. Na pasti gabe lam holong ma rohamuna tu Jahowa dohot tu Jesus. w20.08 16-17 ¶9-10

Dijujui Apostel Paulus do memang halak Kristen asa marhobas tu Jahowa alai toktong dang marhasohotan. (1 Kor. 7:8, 9) Dang leas roha ni si Paulus mangida akka na so marhasohotan. Gariada dipillit ibana do si Timoteus na so marhasohotan lao mangulahon tugas na rikkot. (Plp. 2:19-22) Jadi unang ma didok rohatta dang boi sahalak donganta bawa mandapot tugas na rikkot di huria, holan ala na so marhasohotan ibana. (1 Kor. 7:32-35, 38) Dang hea didok Jesus dohot si Paulus, ikkon marhasohotan do sahalak Kristen manang na dang. Jadi aha do pandangan na sittong taringot akka halak na marhasohotan manang na dang? Dipaboa do alusna di Menara Pengawal 1 Oktober 2012. Didok disi, “Sasittongna, [marhasohotan pe sasahalak manang na dang] tong do silehon-lehon sian Jahowa i. . . . Dang leas roha ni Jahowa mangida [akka halak na so marhasohotan].” Jadi ikkon taargai do akka donganta na so marhasohotan di huria. w20.08 28 ¶8-9

Di piga-piga negara lomo do roha ni halak manangihon barita na uli, ala i do na dipaima-ima nasida. Di negara na asing, dang pola lomo roha ni halak mamboto taringot tu Debata manang taringot tu Bibel. Alai molo di ingananmuna, songon dia do tanggapan ni halak? Dang soal songon dia tanggapan ni nasida, lomo do roha ni Jahowa asa toktong hita marbarita, sahat tu na didok Ibana nungnga sae be ulaon i. Nungnga ditottuhon Jahowa andigan sae ulaon marbarita, “dung pe i asa ro ujungna”. (Mat. 24:14) Dipaboa Jesus do songon dia pangalaho ni akka halak di ari parpudi jala aha na lao masa di tikki i. Boi do on mambahen akka siseanna dang be manjumolohon ulaon marbarita. Alani i, didok Jesus do tu akka siseanna, “Sai jaga ma hamu.” (Mat. 24:42) Di jaman ni si Noak, godang do ulaon ni halak na mambahen nasida dang olo be manangihon sipasingot na dipaboa ibana. Saonari pe, boi do situasi na sarupa masa tu hita. (Mat. 24:37-39; 2 Ptr. 2:5) Alani i, ikkon toktong do tajumolohon ulaon na dilehon Jahowa on tu hita. w20.09 8 ¶1-2, 4

“Muruk situtu” do Sibolis, jadi pasti adong do dampakna tu hita saonari. (Pgk. 12:12) Satokkin nai, lao diuji ma haporseaotta. Ro nama “hasusaan bolon na so hea dope masa sian mulai adong portibi on sahat tu saonari”. (Mat. 24:21) Di tikki i, olo do ra dialo keluargatta hita jala diorai ulaotta marbarita. (Mat. 10:35, 36) Songon Raja Asa, pos do rohatta na lao urupan ni Jahowa do hita? (2 Kron. 14:11) Diurupi Jahowa do hita saonari asa togu haporseaotta. Dipakke Jahowa do “naposo haposan jala na marbisuk” lao mangalehon hita “mangan di tingkina”. (Mat. 24:45) Alai hita sandiri pe ikkon marsitutu do patoguhon haporseaotta tu Jahowa.—Heb. 10:38, 39. w20.09 18 ¶16-18

Boi do dipakke Jahowa tondi parbadiana mambahen akka halak na marhuaso mangulahon lomo ni rohana. Boi do dibahen sasahalak saluran ni aek lao padalatton aek i tu inganan na dihalomohon rohana. Suang songon i ma, boi do dipakke Jahowa tondi parbadiana mambahen halak na marhuaso asa mangulahon lomo ni rohana. Gabe taronjar ma roha ni nasida mambahen keputusan na parohon laba tu naposo ni Debata. (Bandingkon Esra 7:21, 25, 26.) Aha do na boi taulahon? Boi do tatangiakkon “angka raja dohot angka na marhuaso” tikki dibahen nasida keputusan na adong hubunganna tu ulaonta manomba Jahowa. (1 Tim. 2:1, 2; Neh. 1:11) Songon halak Kristen di abad na parjolo, marsitutu do hita manangiakkon akka donganta na adong dipenjara.—Ul. 12:5; Heb. 13:3. w20.11 15 ¶13-14

Molo adong parsiajar Bibel na taurupi jala tardidi, pasti las hian do rohatta! (1 Tes. 2:19, 20) Pasti kerja keras do sude anggota ni huria, alana dang holan na manguluhon parsiajar Bibel i na mangurupi ibana. I do alana didok di Bibel, parsiajar Bibel na tardidi i ma ‘surat na patuduhon hita parhobas’. (2 Kor. 3:1-3) Di bagasan opat taon, adong do hira-hira sappulu juta parsiajaran Bibel na dilaporhon ganup bulan di liat portibi on. Saleleng opat taon i, adong do lobi sian 280.000 na tardidi ganup taon. Songon dia do carana hita boi mangurupi marjuta halak na marsiajar Bibel i asa tardidi? Ala sabar do Jahowa, dilehon ma kesempatan tu akka halak asa boi gabe Sitindangina. Jadi taurupi ma nasida asa tardidi, ala otik nai nama tikkina!—1 Kor. 7:29a; 1 Ptr. 4:7. w20.10 6 ¶1-2

Dang dioloi Raja Saul paretta ni Jahowa. Jala tikki ro Panurirang Samuel lao pasingotton ibana, dang diakkui si Saul hasalaanna. Gariada didok ibana dang pola serius hasalaanna i, jala ditudu ibana do halak na asing na manuru ibana mangulahon i. (1 Sam. 15:13-24) Sebelumna pe nga hea dibahen ibana songon i. (1 Sam. 13:10-14) Alai ginjang do roha ni si Saul, dang dipauba ibana cara marpikkirna, gabe dipissang Jahowa ma ibana. Asa unang ginjang rohatta songon si Saul, porlu do tasukkun diritta, ‘Tikki hujaha poda ni Bibel, marsidalian do au mandok na so tu au poda i? Sai hudok do tu rohakku dang pola balga hasalaakki? Gabe halak na asing do hutudu alani hasalaakki?’ Molo songon i do, porlu do tapauba cara marpikkirta. Molo dang, boi do gabe ginjang rohatta jala boi do gabe dang lomo be roha ni Jahowa tu hita. w20.11 20 ¶4-5

Hamu akka na poso pillit ma ise na lao sombaonmuna. Ikkon takkas do ditanda hamu Jahowa, aha na dihalomohon rohana, jala songon dia hamu mangulahon i di ngolumuna. (Rom 12:2) Gabe boi ma dibahen hamu keputusan na massai penting, i ma manomba Jahowa. (Jos. 24:15) Molo taratur hamu manjaha jala mamparsiajari Bibel, lam holong ma rohamuna tu Jahowa, jala gabe lam togu ma haporseaonmuna tu Ibana. Bahen ma mangulahon lomo ni roha ni Jahowa na urrikkot di ngolumuna. Di portibi ni Sibolis, sai dijujui do hamu mamakke bakatmuna asa boi marlas ni roha. Hape sasittongna, molo dibahen hamu do hamoraon na uppetting, boi do i parohon “godang hasusaan” tu hamu. (1 Tim. 6:9, 10) Alai molo mangulahon lomo ni roha ni Jahowa do na urrikkot di ngolumuna, gabe marbisuk ma hamu mambahen keputusan.—Jos. 1:8. w20.10 30-31 ¶17-18

Di abad na parjolo, sude do halak boi mandapot harapan alani barita na uli na dipaboa Jesus. Diparettahon Jesus ma akka siseanna asa pasahatton barita na uli on “sahat tu ujung ni tano on”. (Ul. 1:8) Alai dang boi diulahon nasida i molo holan mangasahon gogona sandiri. Porlu do diurupi tondi parbadia nasida. (Joh. 14:26; Sak. 4:6) Dijalo sisean ni Jesus do tondi parbadia i tikki Pentakosta 33 M. Ala diurupi tondi parbadia, mulai ma nasida marbarita. Jala di bagasan sadari i, adong marribu halak na manjalo barita na uli. (Ul. 2:41; 4:4) Nang pe dianiaya dang gabe mabiar nasida, torus do nasida marbarita na uli. Sai martangiang do nasida asa diurupi Debata. Didok nasida di tangiangna i, “Lehon ma habaranion tu angka naposom on, asa boi tongtong paboahon hatami.” Ujungna “gabe barani ma nasida mangkatahon hata ni Debata”.—Ul. 4:18-20, 29, 31. w20.10 21 ¶4-5

Pos do rohatta na tutu do Jesus dipahehe, ala godang do saksi na mamereng i. (1 Kor. 15:5-7) Saksi na parjolo na dipaboa Apostel Paulus, i ma si Petrus (si Kepas), jala diparhatutu akka sisean na asing do i. (Luk. 24:33, 34) Akka apostel pe diida do Jesus naung dipahehe. Dipatuduhon Kristus do muse dirina tu lobi sian 500 halak na marpungu di sada inganan. Olo do ra di Galilea i songon na dipaboa di Mateus 28:16-20. Dung i “dipatuduhon ma muse dirina tu si Jakobus” adek tirina i. Gabe porsea ma ibana na Messias do Jesus i, hape andorang so i, dang porsea hian ibana. (Joh. 7:5) Tikki dibahen si Paulus surat on hira-hira taon 55 M, godang dope saksi mata na mangolu. Jadi molo adong na ragu na tutu do Jesus hehe, boi ma langsung disukkun nasida tu akka saksi i. w20.12 3 ¶5, 7-8

Tikki marsahit hita, mura-mura do metmet rohatta jala maol marpikkiran na positif. Memang dang langsung dipamalum Jahowa sahitta i saonari. Alai boi do dipatogu hita jala dibahen margogo manaon i. (Ps. 94:19) Misalna, dipakke Jahowa do akka dongan di huria lao mangurupi hita karejo di jabu, belanja, manang manangiakkon hita. Taingot ma muse akka janji ni Debata na disurat di Bibel. Haduan dang adong be na marsahit di tano na imbaru. (Rom 15:4) Molo marsahit sasahalak mura do metmet rohana, alana dang godang be na boi diulahon ibana lao marbarita. Donganta si Laurel na di Amerika Serikat, nungnga 37 taon mamakke mesin alat bantu pernapasan. Asing ni i, nungnga piga-piga hali ibana dioperasi. Marsahit kanker do ibana dohot marsahit kulit na parah. Nang pe songon i torus do ibana marbarita na uli tu akka perawat dohot akka halak na ro tu jabuna. Hasilna adong do 17 halak na diurupi ibana gabe Saksi Jahowa. w20.12 24 ¶9; 25 ¶12

Di taon 56 M, disarat akka jolma ma si Paulus kaluar sian bagas joro na di Jerusalem jala naeng dibunu ma ibana. Marsogotna i tikki diboan ibana tu jolo ni Sanhedrin, nga hampir mate ibana dibahen akka musuna. (Ul. 21:30-32; 22:30; 23:6-10) Sukkun-sukkun do ra rohana, ‘Sadia leleng nai do hutaon na haccit on?’ Songon dia do si Paulus dipatogu? Di borngin dung ditakkup si Paulus, jongjong ma Jesus di labbungna jala ninna ma, “Unang ho mabiar! Ai ingkon paboaonmu dope taringot tu ahu di Rom songon na pinaboam di Jerusalem.” (Ul. 23:11) Dipuji Jesus do si Paulus ala semangat do ibana marbarita saleleng on di Jerusalem. Marjanji do muse Jesus tu si Paulus pasti selamat do ibana sahat tu Rom. Tikki mambege i lam pos ma roha ni si Paulus, songon sahalak dakdanak na merasa aman tikki dihaol bapakna. w20.11 12 ¶1; 13 ¶3-4

“Songon jangkar ni kapal do” akka janji ni Debata di ngolutta. Boi do i mambahen hita dang busisaon tikki taadopi akka situasi na borat. Taingot ma akka janji ni Jahowa na lao salpu do haduan sude na mambahen hita marsak. (Jes. 65:17) Bayakkon ma hamu mangolu di tano na imbaru na gok hadameon. (Mik. 4:4) Asa lam pos rohatta tu akka janji ni Debata i, tabaritahon ma i. Bahen ma sian nasa gogomuna marbarita na uli jala mambahen sisean. “Molo diulahon hamu songon i, boi ma pos situtu rohamuna sahat tu ujungna na lao saut sude na pinaima-imamuna i.” (Heb. 6:11) Nungnga lam jonok panutup ni jaman on. Alani i lam godang nama akka tantangan na taadopi jala na mambahen hita marsak. Toktong ma hita tenang mangadopi akka situasi na borat jala taandalhon ma Jahowa. Tapatudu ma na porsea hita tu janji ni Jahowa na mandok, “Molo torus do hamu porsea jala dang busisaon, lam margogo ma hamu.”—Jes. 30:15. w21.01 7 ¶17-18

Di 2 Musa 34:6, holong ni Debata dihaitton do tu asi ni rohana. (Jak. 5:11) Sada cara ni Jahowa lao patuduhon asi ni rohana, i ma manalpuhon hasalaatta. (Ps. 51:1) Di Bibel, asi ni roha i dang sekedar manalpuhon hasalaan. Asi ni roha, i ma pakkilalaan na tubu di roha ni sasahalak tikki diida ibana adong halak na susa. Jala pakkilalaan on ma na mangonjar rohana lao mangurupi. Dipaboa do muse di Bibel, dao do umbalga pakkilalaan ni Jahowa lao mangurupi hita sian pakkilalaan ni sahalak ina lao mangurupi anakna. (Jes. 49:15) Jadi tikki susa hita, asi ni roha ni Jahowa i ma na mangonjar rohana lao mangurupi hita. (Ps. 37:39; 1 Kor. 10:13) Hita pe boi do patuduhon asi ni roha tu akka dongan, molo tasalpuhon hasalaan ni nasida jala dang mangingot-ingot aha na mambahen haccit rohatta. (Eps. 4:32) Alai cara na uppetting lao patuduhon asi ni roha tu akka dongan, i ma mangurupi nasida di tikki susa. Molo taulahon i na tatiru do Jahowa, ai Ibana do sitiruon na dumenggan lao patuduhon holong.—Eps. 5:1. w21.01 21 ¶5

Ikkon karejo do kepala keluarga lao paradehon kebutuhan ni keluargana asa las roha ni Jahowa tu ibana. Alai ikkon seimbang do ibana asa adong tikkina mangurupi keluargana marale-ale tu Jahowa, mangalatik dohot mambahen nasida marlas ni roha. Lomo do roha ni Jahowa lam denggan ngolutta. Alani i do dilatik jala dipissang Ibana hita. (Heb. 12:7-9) Jesus pe ditiru do Bapakna. Burju do ibana tikki mangalatik akka siseanna. (Joh. 15:14, 15) Sipata tegas do ibana pasingotton, alai tetap do dipatudu ibana holong. (Mat. 20:24-28) Alana diingot Jesus do molo hita jolma na so sempurna. (Mat. 26:41) Porlu do ditiru kepala keluarga Jahowa dohot Jesus. Ikkon ingotonna do na so sempurna istri dohot gellengna. Alani i dang boi ibana kasar tu nasida. (Kol. 3:19) Molo adong anggota keluargana na mangulahon na sala, porlu do ingotonna Galatia 6:1. Ikkon “lambok” do ibana mangurupi nasida asa muba. Ai ibana pe olo do sala. Songon Jesus, ikkon gabe teladan do ibana di keluargana. w21.02 6 ¶16-18

Ditobus Jahowa do hita sude na di huria marhite tobusan ni Jesus. (Mrk. 10:45; Ul. 20:28; 1 Kor. 15:21, 22) Jadi masuk akkal do molo Jesus dipillit Jahowa gabe ulu ni huria. Marhak do ibana mambahen peraturan di huria jala mangido sude na di huria mandalatton peraturan i. (Gal. 6:2) Alai dang holan mambahen peraturan Jesus. Diparrohahon jala dihaholongi ibana do hita sude. (Eps. 5:29) Molo unduk sahalak donganta borua tu Jesus Kristus berarti ikkon olo do ibana unduk tu suamina dohot tu akka sintua di huria. Molo diargai akka donganta bawa do pengaturan kekepalaan, pasti diargai nasida do akka donganta borua di huria. Molo sude hita di huria mangattusi jala mangargai prinsip kekepalaan, gabe dame ma huria. Jala gabe dipasangap ma Jahowa. w21.02 18-19 ¶14-17

Tikki gabe buronan si Daud, hea do ibana dohot akka tentarana ikkon maninggalhon keluarga nasida lao marporang. Tikki di pardalanan lao marporang, ro ma pangarampok mamboan istri dohot gelleng nasida jala dibuat do arta nasida. Sasittongna boi do si Daud pittor lao menyelamatton istri dohot gelleng nasida i. Alai jolo dilului ibana do petunjuk sian Jahowa. Disukkun si Daud ma Jahowa, “Ikkon leleokku do akka pangarampok i?” Disuru Jahowa ma ibana mangalele pangarampok i, jala dipapos ma rohana pasti berhasil do ibana. (1 Sam. 30:7-10) Aha ma parsiajaranna? Denggan do jolo dipangido hamu saran sebelum mambahen keputusan. Akka na poso, jalo ma saran sian natua-tuamuna manang sian akka sintua na berpengalaman. Porsea do Jahowa tu akka sintua i, jadi hamuna pe boi do porsea tu nasida, alana ‘silehon-lehon’ sian Jahowa do nasida. (Eps. 4:8) Molo ditiru hamu haporseaon ni nasida, jala ditangihon hamu akka saran ni nasida, boi ma hamu mambahen keputusan na denggan. w21.03 4-5 ¶10-11

Hea do didok Jesus, halak na so mangulahon na diparsiajari ibana sarupa ma i songon bawa na pajongjokkon jabu di atas ni pasir. Sia-sia do kerja kerasna i. Molo ro badai manang banjir, ruppak ma jabu i. (Mat. 7:24-27) Sarupa ma, molo dang taulahon na taparsiajari i, gabe sia-sia ma upayatta i. Alana tikki adong tantangan na manguji haporseaotta, dang boi hita martahan manaon i. Alai molo taulahon do na taparsiajari i, gabe boi ma tabahen keputusan na denggan, dame ma pakkilalaatta, jala lam togu ma haporseaotta. (Jes. 48:17, 18) Torus ma hita martangiang jala taratur marsiajar Bibel. Taingot ma, na uppetting di ngolutta, i ma pasangappon Jahowa. Pos ma rohatta, dang tinggalhonon ni Jahowa hita. Dang adong na boi manirang hita sian holong ni Jahowa.—Heb. 13:5, 6. w21.03 15 ¶6; 18 ¶20