Boha do Carana Asa Kompak Sahalak Bapak tu Anakna?

“JAGO do bapak bah!” Hea do didokkon anakmuna songon i tu hamu? Molo hea, bangga do ra hamu mambege hatana i. Alai pasti tamba do las ni rohamuna molo diihutton anakmuna nasehatmuna jala dihilala nasida manfaatna ala mangulahon i.a—Poda 23:15, 24.

Alai dung martaon-taon, bangga dope anakmuna tu hamu? Manang gabe hurang diargai ibana do hamu dung balga ibana? Boha do carana asa tetap hamu kompak tu anakmuna dung lam balga ibana? Na parjolo, tabahas ma jo piga-piga tantangan na dihilala akka ama.

Tolu Tantangan na Sering Terjadi

1. DANG ADONG TIKKI: Di godang negara, holan ama do na maccari lao memenuhi kebutuhan ni keluargana. Alani i, gabe dang hea akka ama di jabu sadari manipat. Di piga-piga inganan, hampir dang adong tikki ni sahalak ama lao rap dohot gellengna. Contohna, baru-baru on adong dibahen sada survei di Prancis. Menurut survei i, dang sahat tu 12 menit waktu ni akka ama na disi lao mandongani gellengna.

PIKKIRHON MA: Sadia leleng do tikkimuna rap dohot gellengmuna ganup ari? Saminggu manang dua minggu na naeng ro, coba ma jo surat hamu sadia leleng tikkimuna ganup ari lao rap dohot ibana. Olo do ra tarsonggot hamu mangida hasilna.

2. DANG ADONG SITIRUON: Adong piga-piga bawa na jarang makkatai tu bapakna mulai sian na gelleng ibana sahat tu na balga. Didok si Jean-Marie, na tinggal di Prancis, “Jarang do au makkata-hatai dohot bapakku. Akibatna, gabe adong ma masalah na so hea tarbayang au. Misalna, saonari dang jonok hubunganku tu anakku. Maol au paboahon na di rohakku tu ibana, songon i nang ibana tu au.” Na asing, adong piga-piga bawa na so kompak tu bapakna nang pe takkas ditanda nasida bapakna. Didok si Philippe, 43, “Maol hian bapakku patuduhon na holong rohana tu au. Akibatna, au pe gabe maol ma patuduhon na holong rohakku tu anakku.”

PIKKIRHON MA: Gabe songon cara ni bapakku do hubahen pagodang-godangkon gellengku? Gabe hutiru do hasomalan ni bapakku na so denggan manang na denggan? Aha ma misalna?

3. CARA BERPIKIR NA SO DENGGAN: Di piga-piga inganan, dang pola disuru ama dohot mangurus gellengna. Didok si Luca na sian Eropa Barat, “Di hutakku, tugas ni istri do biasana mangurus gelleng.” Di inganan na asing, holan lao mangalehon disiplin na tegas do tugas ni sahalak ama. Misalna didok si George na magodang di sada huta di Afrika, “Molo di hutanami, dang hea ama marmeami dohot gellengna. Alana mabiar nasida gabe dang diargai annon. Jadi au pe maol ma huhilala lao marmeami dohot anakku.”

PIKKIRHON MA: Molo di ingananmuna, aha do biasana tugas ni sahalak ama? Dianggap nasida do tugas ni borua mangurus gelleng? Olo do nasida patuduhon holong ni rohana tu anakna? Boi do nasida mambahen songon i di ingananmuna?

Hamu akka ama, boha do carana asa boi hamu kompak tu anakmuna nang pe adong tantangan songon na dipaboa nakkin? Parrohahon ma akka saran on.

Ajari ma Mulai sian na Gelleng

Biasana lomo do roha ni sahalak anak maniru bapakna. Jadi tikki gelleng dope anakmuna, berusaha ma hamu mangajari nasida. Boha carana? Jala andigan ma mangulahon i?

Berusaha ma hamu mangajak gellengmuna di ulaon siganup ari. Misalna, ajak ma gellengmuna mangurupi hamu makkarejohon tugas di jabu. Lehon ma sapu manang sekop na gelleng tu ibana. Pasti las do rohana boi bekerjasama dohot bapakna, na gabe pahlawan dohot sitiruon di ibana. Memang olo do ra gabe leleng hamu pasaehon tugas i. Alai boi do i mambahen hamu gabe lam kompak jala boi do i gabe kesempatan di hamu lao mangajari ibana songon dia cara na denggan makkarejohon sada tugas. Najolo di Bibel, disuru do akka ama mamboan gellengna dohot mangulahon ulaon siganup ari. Jala gabe dalan ma i di nasida lao makkata-hatai jala mangajari gelleng ni nasida. (5 Musa 6:6-9) Marlakku dope nasehat i sahat tu saonari.

Asing ni i, parade ma tikkimuna lao marmeami dohot anakmuna. Dang holan lao marsonang-sonang hamu mangulahon i. Adong sada riset na patuduhon, molo rap marmeami bapak dohot anakna, boi do i mambahen anakna gabe barani jala dang mabiar mangulahon sada ulaon na baru.

Adong muse manfaat na asing molo rap marmeami sahalak bapak dohot anakna. Didok sahalak peneliti si Michel Fize, “Tikki rap marmeami bapak dohot anakna, boi ma anakna i denggan makkatai tu bapakna.” Jala boi ma bapakna patuduhon holong ni rohana tu anakna, sian pakkataion nang sian pambahenan. Dung i gabe boi ma anakna i marsiajar patuduhon holong ni rohana. Didok si André, sahalak ama na sian Jerman, “Tikki gelleng dope anaknami, sering do au marmeami dohot ibana. Tikki huhaol ibana, gabe diboto ibana ma boha carana mambalos holong ni rohakki.”

Tikki naeng modom pe, boi do i dipakke hamu gabe dalan lao mambahen lam kompak hamu tu anakmuna. Taratur ma hamu manjahahon sada cerita tu ibana jala tangihon ma ibana tikki paboahon na dihilala ibana di ari i. Molo taratur dibahen hamu songon i, gabe lam mura ma hamu makkata-hatai tu ibana nang pe nungnga balga ibana haduan.

Rap Mangulahon Sada Ulaon

Adong do piga-piga remaja songon na cuek tikki mambege bapakna makkatai. Molo hira na malas gellengmuna mangalusi sukkun-sukkunmuna, unang ma pittor dirippu hamu na so olo ibana makkatai tu hamu. Molo dipauba hamu caramuna makkatai tu ibana, mungkin gabe olo ibana makkatai tu hamu.

Adong sahalak ama na sian Prancis na margoar si Jacques. Maol dihilala ibana makkatai tu gellengna na margoar si Jérôme. Nang pe songon i, dang olo ibana mamaksa asa olo anakna i makkatai tu ibana. Jadi dicoba ibana ma cara na baru. Diajak ibana ma anakna marbola. Didok si Jacques, “Dung sae marbola, biasana hundul ma hami di rumput lao beristirahat. Di tikki sisongon i, olo do gabe tarbukka gellengku makkatai tu au. Jadi molo olo au mangalehon tikkikku asa boi rap dohot anakki jala boi dihilala ibana na holong rohakku tu ibana, gabe lam kompak ma hami.”

Songon dia molo dang lomo roha ni anakmuna marolahraga? Didok si André, “Hubahen hami ma kursi di luar tikki borngin. Dung i hundul ma hami disi marsalimut huhut mangida bintang. Sambil manginum tes manis, makkata-hatai ma hami taringot Debata na manoppa i sude dohot taringot perasaannami be. Jala godang nai dope na huhatai hami.”—Jesaya 40:25, 26.

Boha molo dang lomo rohamuna mangulahon ulaon na dihalomohon anakmuna? Molo songon i situasina, unang ma holan seleramuna na diihutton hamu. (Pilippi 2:4) Didok si Ian na sian Afrika Selatan, “Dang lomo roha ni anakku si Vaughan marolahraga. Hape i do lomo ni rohakku. Tu pesawat dohot tu komputer do lomo ni rohana. Jadi berusaha ma au asa lomo tong rohakku tu akka i. Huajak ma ibana manonton atraksi pesawat dohot mangihutton simulator penerbangan di komputer. Huhilala ala sering hami rap mangulahon i, gabe olo ma si Vaughan tarbukka makkatai tu au.”

Urupi ma Ibana Asa Percaya Diri

“Bereng ma Pak!” Hea do didok anakmuna songon i tu hamu, tikki boi ibana mangulahon sada ulaon na baru? Molo nungnga remaja anakmuna i, dang na lao mangido asa dipuji ra ibana. Nang pe songon i, porlu dope dipuji hamu anakmuna i asa boi ibana gabe sahalak bawa na bertanggung jawab.

Taparrohahon ma sitiruon na dibahen Debata Jahowa. Tikki di tano on Jesus, olo do Jahowa patuduhon holong ni rohana tu ibana di jolo ni godang halak. Misalna didok Jahowa do, “On do Anakku, haholongakki, las situtu do rohakku mangida ibana.” (Mateus 3:17; 5:48) Memang ikkon dipissang jala diajar-ajari hamu do gellengmuna. (Epesus 6:4) Alai olo do hamu mamuji ibana molo didokkon jala diulahon ibana akka na denggan?

Adong do piga-piga bawa na maol paboahon holong ni rohana tu gellengna. Olo do ra tikki gelleng nasida, holan kesalahanna na diparrohahon natua-tuana. Molo songon i na dihilala hamu, ikkon berusaha do hamu mambahen ibana percaya diri. Boha carana? Si Luca na dipaboa nakkin, sering do mangulahon tugas di jabu rap dohot anakna si Manuel na marumur 15 taon. Didok si Luca, “Sipata, husuru do si Manuel na parjolo mangulahon tugas i. Jala huurupi do ibana molo memang porlu diurupi. Alai sering do ibana sandiri na pasaehon tugas i. Molo boi diulahon ibana i, hupuji ma ibana. Nang pe dang songon na diharappon ibana hasilna, tetap do hupuji ibana ala nungnga berusaha mangulahon i.”

Gabe lam percaya diri do muse anakmuna molo diurupi hamu ibana mambahen cita-cita na umbalga di ngoluna. Alai boha molo dang boi hatop dapotna cita-citana i? Manang boha molo dang songon na diharappon hamu cita-citana? Molo songon i situasina, berarti porlu dibahen hamu penyesuaian tu harapanmuna. Si Jacques, na dipaboa nakkin mandok, “Huurupi do gellengku asa mambahen cita-cita na masuk akkal. Jala hupastihon do memang cita-citana do i, dang cita-citakku. Dang olo au mamaksa ibana asa hatop dapotna cita-citana i. Alai nasa tolapna ma na diulahon ibana.” Molo olo hamu manangihon pandapot ni gellengmuna, olo hamu mamuji ibana, jala diurupi hamu ibana asa boi marsiajar sian kesalahanna, gabe boi ma hamu mangurupi ibana lao mandapot cita-citana i.

Nang pe nungnga kompak hamu tu anakmuna, pasti sai adong do masalah. Alai molo boi hamu kompak tu anakmuna, pasti lomo ma rohana jonok tu hamu haduan molo dung balga ibana. Alana pasti lomo do rohatta jonok tu halak na mangurupi hita marhasil.

[Surat na di Toru]