SIULASON NI MAJALAH ON | BOASA JESUS MARSITAONON JALA MATE?

Tutu do i Masa?

Di taon 33 M, dibunu ma Jesus halak Nasaret. Dihatahon do na so tutu taringot ibana. Disiksa jala mate tarpajal ma Jesus. Mansai hansit do parmatena. Alai, dipahehe Debata do muse Jesus, jala 40 ari dungkon i nangkok ma ibana tu surgo.

Angka na masa on disurat di opat Buku Injil di Angka Buku Junani Kristen, na jotjot didok Padan na Imbaru. Tutu do masa na disurat i? Mansai ringkot do sungkunsungkun on. Alana, molo ndang tutu masa na disurat i, ndang marlaba haporseaon dohot pangkirimon ni halak Kristen taringot hangoluan na salelengna di Paradeiso. (1 Korint 15:14) Alai, molo tutu do masa na disurat i, marlaba ma parngoluon ni jolma di ari na naeng ro, jala boi ma tahatahon taringot i tu na asing. Alani i, tutu do na disurat di Buku Injil manang na ndang?

NA DIPATUDU NI ANGKA NA MASA

Ndang songon turiturian, tangkas jala tingkos do na disurat di Buku Injil. Umpamana, disurat do taringot inganan na adong dope saonari. Asing ni i, diparhatutu angka sejarawan do goar ni halak na disurat disi.—Lukas 3:1, 2, 23.

Angka panurat di abad na parjolo dohot na paduahon pe manurathon taringot Jesus.a Parmate ni Jesus na disurat di Buku Injil, sarupa tu isara panguhuman ni halak Rom di tingki i. Asing ni i, disurat do sude na masa di tingki i, jala dipaboa do muse taringot sisean ni Jesus na marparange na so denggan. (Mateus 26:56; Lukas 22:24-26; Johannes 18:10, 11) Sude na disurat di buku i patuduhon, molo panurat ni Buku Injil tangkas jala jujur tingki manurathon taringot ngolu ni Jesus.

TUTU DO JESUS DIPAHEHE?

Torop do halak porsea molo Jesus hea mangolu jala mate. Alai adong do na so porsea tu haheheonna. Mulana, sisean ni Jesus pe ndang porsea taringot haheheonna. (Lukas 24:11) Alai, gabe porsea do nasida dohot angka sisean na asing, dung diida nasida naung dipahehe Jesus. Jala di sada tingki, adong do lobi sian 500 halak na mangida Jesus naung dipahehe.—1 Korint 15:6.

Nang pe angka sisean i boi tartangkup jala dibunu, alai barani do nasida paboahon tu sude halak molo Jesus nunga dipahehe, jala dipaboa nasida do taringot i tu angka na mambunu ibana. (Ulaon ni Apostel 4:1-3, 10, 19, 20; 5:27-32) Molo ndang tutu haheheon ni Jesus, barani do angka sisean paboahon i? Sasintongna, haheheon ni Jesus mambahen halak Kristen gabe ditanda di tingki i dohot saonari.

Tutu jala hombar do na disurat di Buku Injil taringot hamatean dohot haheheon ni Jesus tu sejarah. Molo manat taparsiajari, boi ma pos rohanta tutu do masa na disurat disi. Lam togu ma haporseaonmu molo diboto hamu boasa i disurat. Artikel na mangihut ma na mangulas taringot on.

a Umpamana, si Tacitus, na tubu hirahira taon 55 M, manurathon taringot ”Kristus, ojahan ni goar ni halak Kristen, na dibunu tingki pamarentaon ni si Tiberius marhite pejabat Rom, i ma si Pontius Latus”. Disurat si Suetonius do taringot Jesus (abad na parjolo); sejarawan Jahudi Yosefus (abad na parjolo); dohot si Plinius Muda, gubernur Bitinia (di mula ni abad na paduahon).

Boasa Ndang Godang Hatorangan ni Sejarah taringot Jesus?

Balga do pangkorhon ni hangoluan ni Jesus. Alai, boasa ndang godang hatorangan na asing na manurat taringot ngolu ni Jesus? Alana, Buku Injil nunga disurat hirahira 2.000 taon naung salpu. Ndang godang karya tulis di tingki i na adong dope saonari. (1 Petrus 1:24, 25) Jala, angka musu ni Jesus pe, ndang marlomo ni roha manurathon hatorangan na mambahen halak gabe porsea tu Jesus.

Taringot haheheon ni Jesus, apostel Petrus patorangkon, ”Dipahehe Debata do Ibana di ari patoluhon, dilehon do Ibana tu hapataron, ndang apala tu saluhut halak, tu angka sitindangi do na pinillit ni Debata sian nahinan; i ma hami, angka na mangan jala minum rap dohot Ibana, dung hehe Ibana sian na mate.” (Ulaon ni Apostel 10:40, 41) Boasa ndang tu sude halak? Injil Mateus paboahon tu hita, tingki dibege angka musu ni Jesus taringot haheheonna, marsitutu do nasida mambahen asa unang rarat barita i.—Mateus 28:11-15.

Na so lomo do roha ni Jesus diboto halak taringot haheheonna? Ndang songon i. Si Petrus mandok, ”Didokkon do hami manjamitahon dohot mangkatindangkon tu natorop, paboa Ibana do i, na tinodo ni Debata hian gabe panguhum di angka na mangolu ro di angka na mate.” Halak Kristen na sintong nunga mangulahon on sahat tu saonari.—Ulaon ni Apostel 10:42.