Olo Do Hamu Pahombarhon Haporseaonmu Tu Bibel?

HALAK Kristen do hamu? Molo halak Kristen do hamu, hamu ma 1 sian 2 miliar halak di portibi on na mangangku Kristen. Perbandinganna, hirahira 1 sian 3 halak ma di portibi on na mangangku Kristen. Saonari, marribu do sekte ni agama Kristen, jala ndang sarupa ajaran dohot pangantusionna. Ra, ndang sarupa pangantusion dohot ajaran di huriamuna dohot di huria na asing. Ringkot do mamingkirhon aha na tahaporseai? Ringkot do, molo lomo rohamu mangulahon ajaran ni Bibel.

Angka siihuthon Jesus na parjolo, digoari ”halak Kristen”. (Ulaon ni Apostel 11:26) Ndang porlu goar na asing laho manggoari nasida, alana holan sada dope Kristen di tingki i. Marsada do halak Kristen mangihuthon ajaran dohot tudutudu ni Jesus Kristus. Songon dia do molo di huriamuna? Diihuthon hamu do ajaran ni Kristus dohot haporseaon ni halak Kristen na parjolo? Sian dia ma boi botoonmu? Holan Bibel do na boi mangalusi.

Rimangi ma: Diihuthon Jesus Kristus do Hata ni Debata. Ndang lomo roha ni Jesus molo adong halak na mansoadahon ajaran ni Bibel holan alani mangkaringkothon adat ni jolma. (Markus 7:9-13) Taboto ma, haporseaon ni angka siihuthon Jesus na sintong ingkon marojahan tu Bibel. Alani i, ganup halak Kristen ingkon manungkun dirina, ’Hombar do ajaran ni huriangku tu ajaran ni Bibel?’ Laho mangalusi sungkunsungkun i, olo do hamu pahombarhon ajaran ni huriamuna tu na nidok ni Bibel?

Jesus paboahon, panombaonta tu Debata ingkon marojahan tu hasintongan, jala hasintongan i dapotta di Bibel. (Johannes 4:24; 17:17) Apostel Paulus paboahon, hita boi malua molo ”mananda hasintongan”. (1 Timoteus 2:4) Mansai ringkot do pahombarhon haporseaonta tu hasintongan sian Bibel. Alana, malua ma hita molo taboto hasintongan i!

CARA PAHOMBARHON HAPORSEAONTA TU BIBEL

Jaha ma onom sungkunsungkun na di toru on, jala parrohahon ma alusna sian Bibel. Ida ma angka ayat na dibahen, jala rimangi ma alusna i. Dung i, sungkun ma dirimuna, ’Hombar do ajaran ni huriangku tu na nidok ni Bibel?’

Sungkunsungkun on mangurupi hamu pahombarhon haporseaonmuna tu Hata ni Debata. Olo do hamu? Las roha ni Sitindangi Ni Jahowa mangurupi hamu manulingkiti hasintongan sian Bibel. Pangido ma parsiajaran Bibel gratis sian sahalak Sitindangi Ni Jahowa, manang ida ma situs webnami, jw.org/bbc.

1 SUNGKUNSUNGKUNNA: Ise do Debata?

ALUSNA: Jahowa, Ama ni Jesus, i ma Debata na manongtong jala Sitompa saluhutna.

NA DIPABOA DI BIBEL:

”Mandok mauliate do hami, . . . tongtong tu Debata, Ama ni Tuhanta Jesus Kristus.”—Kolosse 1:3.

”Ale Tuhan Debatanami, na tama do Ho manjalo hasangapon dohot hamuliaon dohot hagogoon, ai ditompa Ho do saluhutna; hinorhon ni lomo ni roham do, umbahen manjadi angka i jala tartompa!”—Pangungkapon 4:11.

Ida muse Rom 10:13; 1 Timoteus 1:17.

2 SUNGKUNSUNGKUNNA: Ise do Jesus Kristus?

ALUSNA: Jesus ma Anak ni Debata na parjolo ditompa. Ala ditompa do Jesus, adong ma mulana. Dipasangap jala unduk do Jesus tu Debata.

NA DIPABOA DI BIBEL:

”Umbalga do Damang asa Ahu.”—Johannes 14:28.

”[Jesus] do suman ni Debata na so tarida i; na parjolo tubu sian nasa na tinompa.”—Kolosse 1:15.

Ida muse Mateus 26:39; 1 Korint 15:28.

3 SUNGKUNSUNGKUNNA: Aha do tondi parbadia?

ALUSNA: Tondi parbadia, i ma gogo ni Debata laho pasauthon lomo ni rohaNa. On ndang sada hadirion (pribadi). Debata mangalehon tondi parbadia laho mampargogoi jolma.

NA DIPABOA DI BIBEL:

”Umbege tabi ni si Maria i si Elisabet manggunjal ma posoposo di bagasan bortianna, jadi gok Tondi Parbadia ma si Elisabet.”—Lukas 1:41.

”Jaloonmuna do hagogoon ni Tondi Parbadia na songgop tu hamu.”—Ulaon ni Apostel 1:8.

Ida muse 1 Musa 1:2; Ulaon ni Apostel 2:1-4; 10:38.

4 SUNGKUNSUNGKUNNA: Aha do Harajaon ni Debata?

ALUSNA: Harajaon ni Debata, i ma pamarentaon di surgo. Jesus ma Raja di Harajaon ni Debata. Satongkin nai, pasauton ni Harajaon i ma lomo ni roha ni Debata di tano on.

NA DIPABOA DI BIBEL:

”Dipalu surusuruan na papituhon ma sarunena; jadi masa ma soara na gogo di banua ginjang, angka dipandok: Nunga sahat tu Tuhanta i dohot tu Kristusna i harajaon ni hasiangan on; bangkit Raja ma Ibana ro di salelenglelengna!”—Pangungkapon 11:15.

Ida muse Daniel 2:44; Mateus 6:9, 10.

5 SUNGKUNSUNGKUNNA: Tu surgo do sude halak na burju?

ALUSNA: Ndang. Holan saotik do halak na dipillit Debata laho tu surgo, na didok ”punguan na metmet”. Nasida mamarenta jolma raphon Jesus.

NA DIPABOA DI BIBEL:

”Unang ho mabiar, ale punguan na metmet! Ai naung dihalomohon Amamuna do, mangalehon harajaonna i tu hamu.”—Lukas 12:32.

”Gabe malim ni Debata dohot Kristus do nasida, jala mangarajai rap dohot Ibana.”—Pangungkapon 20:6.

Ida muse Pangungkapon 14:1, 3.

6 SUNGKUNSUNGKUNNA: Aha do sangkap ni Debata tu tano on dohot tu jolma?

ALUSNA: Di Harajaon ni Debata, gabe paradeiso ma tano on jala didapot halak partigor ma pasupasu, songon hahipason, hadameon, jala hangoluan na manongtong.

NA DIPABOA DI BIBEL:

”Sai na teanon ni angka parlambohi do sogot tano i, jala hahilashononna hinadeak ni hadameon.”—Psalmen 37:10, 11.

”Apusan ni Debata ma nasa iluilunasida sian matanasida: Ndang adong be hamatean nang arsak ni roha; nang angguhangguk, nang na hansit, ndang disi be; ai nunga salpu na parjolo i!”—Pangungkapon 21:3, 4.

Ida muse Psalmen 37:29; 2 Petrus 3:13.