Tingki Masa Bencana

“Marsak situtu do keluarganami. Habis do sude artanami alani longsor dohot banjir.”—Si Andrew, sian Sierra Leone.

“Dung so badai i, mulak ma hami tu jabunami. Alai ndang adong be na tading. Songgot hian do rohanami. Sai tangis ma borungku sampe ndang tolap be ibana jongjong.”—Si David, sian Kepulauan Virginia.

MOLO hea diadopi hamu bencana, ra diantusi hamu do songon dia pangkilalaan ni halak na hona bencana. Ra tarsonggot do hamu, bingung, holsoan, jala mabiar mangingot na masa i. Godang do na gabe marsak, loja, jala mandele.

Molo hancur sude artamuna alani bencana, ra marsak situtu do hamu. Jala ra didok rohamuna, ndang sanggup be hamu mangolu. Alai dipaboa do di Bibel, boi do hamu martahan jala adong do pangkirimon di ari na naeng ro.

HASINTONGAN SIAN BIBEL MANGALEHON PANGKIRIMON

Jakobus 5:11 mandok, “Hudok hami do marlas ni roha halak na martahan manaon hasusaan.” Dung salpu bencana i, ra hira na so adong be pangkirimonmuna. Alai molo sabar hamu jala marsitutu asa lam denggan muse ngolumuna boi do hamu marhasil.

Dipaboa di Bibel, adong do tingkina “ndang be tarbege . . . soara partangison manang soara angguhangguk”. (Jesaya 65:19) Masa ma on dung ro Harajaon ni Debata jala dibahen ma tano on gabe Paradeiso. (Psalmen 37:11, 29) Ndang laho masa be bencana. Salpuhonon ni Debata ma sude na mambahen lungun roha, alana marjanji do Ibana, “Ndang be ingoton angka na parjolo i manang tarsunggul tu roha.”—Jesaya 65:17.

Pingkirhon ma on: Marsangkap do Jahowa laho “mangalehon tu hamu ujung na hinalungunhonmuna”, i ma hangoluan na dame di Harajaon ni Debata. (Jeremia 29:11) Molo diboto hamu hasintongan on, boi do on mambahen hamu ndang mandele. Si Sally naung dipaboa di halaman tolu mandok, “Molo taingot sude angka na denggan na laho dibahen Harajaon ni Debata di ari na naeng ro, on mangurupi hita asa unang sai mamingkirhon angka naung salpu jala boi martahan.”

Parsiajari ma godang hatorangan taringot aha na laho dibahen Harajaon ni Debata tu jolma. Molo diulahon hamu i, pos ma rohamuna boi do hamu martahan huhut paimahon ari na naeng ro tingki ndang adong be bencana. Dipaboa do di Bibel angka aha na boi diulahon hamu saonari asa boi martahan dung salpu bencana. Taulas ma piga-piga contoh.

Ayat ni Bibel na Boi Mangurupi

Lehon ma tingki laho istirahat dohot modom.

“Tumagon do holan saotik artaniba alai sonang roha, sian apala na susa mansari arta na godang hape holan na manangkup alogo sambing do.”—Parjamita 4:6, Bibel siganup ari.

Didok angka peneliti, “halak na hea trauma, boi do lam marsak dihilala molo hurang modom”. Alani i, ingkon dilehon do tingki laho istirahat dohot modom.

Paboa ma pangkilalaanmuna.

“Holsoholso di bagasan roha ni baoa patungki [manang mambahen marsak] ibana, alai anggo hata na denggan pahinsahon [manang mambahen las] rohana muse.”—Poda 12:25.

Paboa ma pangkilalaanmuna tu keluarga manang tu dongan na boi dihaporseai. Asing ni manangihon hamu, boi do nasida mangalehon hata na patoguhon roha jala rade mangurupi.a

Pingkirhon ma ari na naeng ro.

“Alai tapaima-ima do langit na imbaru dohot tano na imbaru songon janji ni Debata. Jala angka na mangulahon parenta ni Debata ma na maringanan disi.”—2 Petrus 3:13.

a Molo lam marsak do roha ni sasahalak manang gabe lam tamba holso ni rohana, ra ingkon laho do ibana tu dokter.