Tingki Marsahit na Posi

“Tingki huboto na adong kanker di paru-paru dohot di usushu, didok rohangku ma laho mate nama ahu. Dung mulak ahu sian rumah sakit, gabe didok rohangku ma, ‘Ndang hurimpu songon on sahithu. Alai ingkon hulului do cara asa boi mangadopi i.’”—Si Linda, na marumur 71 taon.

“Hona stroke ma ahu jala lumpuh ma bohingku sabola kiri. Alani sahithon, gabe depresi ma ahu. Jotjot do ahu lungun-lungunan, jala sipata gabe ro do tu pingkiranku laho bunu diri.”—Si Elise, na marumur 49 taon.

Sahalak baoa di kursi roda rap dohot keluargana

MOLO hamu manang halak na dihaholongi hamu marsahit na posi, tontu on mambahen hamu marsak. Tingki masa i, olo do gabe kecewa, muruk, jala holsoan hamu. Manang olo do gabe mabiar hamu ala ingkon torus marubat, maol mandapot parubatan na denggan ala arga ubatna, manang adong efek samping ni angka ubat i. Gabe susa ma roha dohot pingkiranmuna alani i.

Alai adong do na boi mangurupi hamu. Godang do halak na tarapul rohana ala martangiang tu Debata dohot manjaha Bibel. Jala adong do keluarga dohot angka dongan na mangkaholongi hamu jala rade mangurupi.

NA BOI MANGURUPI HAMU ASA UNANG MANDELE

Si Robert na marumur 58 taon mandok, “Tongtong ma porsea tu Debata jala pos ma rohamu urupanna do hamu asa boi martahan. Martangiang ma tu Jahowa jala paboa ma pangkilalaanmu tu Ibana. Pangido ma gogo sian Debata, asa hamu dohot keluarga boi tongtong martahan mangadopi i.”

“Tontu, lam togu do rohamu molo diurupi keluarga. Ganup ari, sai adong do dongan na manelepon laho manungkun kabarhu. Jala adong do muse dongan sian inganan na asing na tongtong patoguhon ahu. Gabe lam pos ma rohangku jala boi ma ahu martahan.”

Didok si Linda, “Molo ro hamu mamereng dongan na marsahit, unang ma pola sungkuni taringot sahitna i. Alana, olo do ra ndang lomo rohana molo tasungkuni taringot sahitna i. Alani i, na asing ma tahatai tu nasida.”

Molo tapangido gogo sian Debata, tajaha Bibel, jala adong keluarga dohot dongan na mangkaholongi hita jala rade mangurupi, pos ma rohanta boi do hita tongtong martahan nang pe marsahit na posi.

Ayat ni Bibel na Boi Mangurupi

Pos ma roham tu Debata.

“Hulului do Jahowa, jadi dialusi ahu, jala dipalua ahu sian angka hagogotanku sudena. Joujou do na dangol on, gabe ditangihon Jahowa.”—Psalmen 34:5, 7.

Si Linda na dipaboa nangkin mandok, “Ndang hea hutangiangkon asa dipamalum sahithon. Alai gogo do na hupangido asa diurupi ahu jala boi martahan mangadopi sahithon.”

Jaha ma Bibel Asa Tongtong Togu.

“Na so tupa be dohonon ni pangisina: Na gale do ahu.”—Jesaya 33:24.

Rimangi ma janji ni Debata taringot ari na naeng ro. Molo diulahon hamu i, boi ma hamu tongtong togu jala martahan.

Pangido ma keluarga dohot dongan mangurupi hamu.

“Sai masihaholongan do na mardongan jala songon na marhahamaranggi do di sitaonon.”—Poda 17:17, Bibel siganup ari.

Si Elise na dipaboa nangkin mandok, “Unang ma mandao sian angka dongan. Olo ma hamu tingki diurupi nasida. Ra, dihilala hamu ndang adong na parduli tu hamu jala didok rohamu ndang ditangihon Debata hamu. Alai ingot ma, unang ma mandao sian angka dongan.”