HANGOLUAN NI HALAK KRISTEN
Ihuthon ma Aturan na Binahen ni Jahowa
Nunga dibahen Debata Jahowa aturan tu jolma. Umpamana, nunga dibahen aturan taringot pardongansaripeon na pasadahon sahalak baoa dohot sahalak borua. (Mat 19:4-6, 9) Dihasogohon Jahowa do angka ulaon parmainanon manang ulaon na rorang. (1Kor 6:9, 10) Diparade Jahowa do prinsip tu naposoNa taringot marpangkean.—5Mus 22:5; 1Tim 2:9, 10.
Saonari, godang do na so olo mangihuthon aturan na binahen ni Jahowa. (Rom 1:18-32) Diihuthon nasida do pangkorhon na roa sian portibi on taringot marpangkean dohot marpangalaho. Ndang maila nasida patuduhon ulaon na sala jala mangkasogohon halak na imbar sian nasida.—1Ptr 4:3, 4.
Ala Sitindangi Ni Jahowa hita, ingkon barani do hita mangihuthon aturan na binahen ni Jahowa. (Rom 12:9) Songon dia carana? Ingkon barani paboahon ulaon na dihalomohon rohaNa tu na asing. Alai, ingkon tongtong do tajaga asa denggan parangenta. Umpamana, tingki laho mamillit cara marpangkean, tasungkun ma dirinta, ’Mangihuthon aturan ni Jahowa do ahu marpangkean? Manang, mangihuthon cara ni portibi on do ahu? Sian carangku marpangkean, tarida do molo ahu halak Kristen na mabiar tu Debata?’ Manang, tingki manonton sada acara manang film, tasungkun ma dirinta, ’Lomo do roha ni Jahowa tu acara i? Aturan ni ise do na dipatudu disi? Gabe mangkorhon na roa do hiburan na hupillit tu diringku? (Ps 101:3) Gabe tartuktuk do halak na asing manang keluargangku?’—1Kor 10:1-33.
Boasa ringkot di hita mangihuthon aturan na binahen ni Jahowa? Satongkin nai, laho ripashonon ni Jesus Kristus ma angka bangso dohot parjahat. (Hes 9:4-7) Holan na mangulahon lomo ni roha ni Debata do na so diripashon. (1Joh 2:15-17) Tongtong ma tajaga asa denggan parangenta, asa parohon sangap tu Debata.—1Ptr 2:11, 12.
Sian carangku marpangkean, tarida do aturan ni ise na huihuthon?
TONTON MA VIDEO GABE ALEALE NI JAHOWA—SADA BAOA, SADA BORUA, DUNG I ULAS MA SUNGKUNSUNGKUN NA MANGIHUT:
Boasa denggan molo taihuthon aturan ni Jahowa?
Songon dia do natuatua mangajarhon aturan ni Jahowa tu ianakhonna na metmet dope?
Songon dia do na poso dohot naung matua mangurupi halak asa mandapot laba sian haburjuon ni Debata?