[sian kiri tu kanan] Si Marcelo, si Yomara, dohot si Hiver. Ditiop nasida do sada jilid ni Bibel Terjemahan Tano na Imbaru huruf Braille di bahasa Spanyol
Dihilala Nasida do Holong na Dipatudu Akka Dongan
TINGGAL di sada huta na gelleng di Guatemala do si Yomara rap dohot dua itona, si Marcelo dohot si Hiver. Si Yomara do na parjolo sahali marsiajar Bibel dohot Saksi Jahowa, jala di pudian ni ari dohot do dua itona marsiajar Bibel. Alai adong tantangan na diadopi nasida. Buta do nasida, jala dang boi manjaha huruf Braille. Alani i, guru studi ni nasida ma na ikkon manjahahon bahan parsiajaran dohot ayat ni Bibel tu nasida.
Alai adong do tantangan na asing na diadopi nasida. Ala buta nasida, dang boi nasida ro tu Bale Harajaon na unjonok na daona hira-hira 40 menit. Alani i, diatur akka dongan di huria ma lao menjemput nasida tu parpunguan. Jala tikki nasida mandapot tugas sikkola di parpunguan parsitongaan ni minggu, diurupi akka dongan di huria do nasida mangingot presentasi ni nasida.
Di bulan Mei 2019, dibahen ma parpunguan di huta ni nasida. Tikki i, adong ma sapasang perintis biasa na pinda tu huta ni nasida. Lomo do roha ni nasida mangurupi halak i na tolu asa boi manjaha dohot manurat huruf Braille, nang pe dang diattusi nasida songon dia carana. Lao ma donganta perintis biasa on tu perpustakaan lao mamparsiajari huruf Braille dohot carana mangajarhon i muse tu halak i na tolu.
Si Marcelo mangalehon komentar di parpunguan
Piga-piga bulan dukkon i, nungnga boi be halak i na tolu manjaha huruf Braille jala lam togu parale-aleon ni nasida tu Jahowa.a Saonari nungnga gabe perintis biasa be si Yomara, si Marcelo, dohot si Hiver. Jala si Marcelo nungnga gabe parhobas di huria. Sibuk do nasida melayani Jahowa tiap minggu. Ala semangat nasida melayani Jahowa, gabe semangat ma tong akka dongan na asing di huria.
Mandok mauliate do halak i na tolu alani holong dohot dukungan ni akka dongan di huria. Didok si Yomara, “Sian parjolo sahali hami pajuppang dohot Saksi Jahowa, dipatudu nasida do tu hami holong ni halak Kristen na sasittongna.” Didok si Marcelo do muse, “Dapotnami do akka dongan na burju di huria jala marsada do hami dohot akka dongan di liat portibi on songon keluarga.” Tarpaima do si Yomara dohot dua itona boi mangida songon dia tano on gabe Paradeiso haduan dibahen Jahowa.—Ps. 37:10, 11; Jes. 35:5.
a Sada brosur na marjudul Belajar Membaca Huruf Braille dirancang lao mangurupi sahalak na buta manang na terbatas penglihatanna lao marsiajar songon dia cara manjaha dohot manurat huruf Braille.