Asa Boi Tahilala Dame ni Roha
Adong sahalak bawa na margoar si Gary. Sahalak tentara do ibana najolo. Didok ibana ma, “Andorang so marsiajar Bibel au, dang huboto boasa godang hian hajahaton, ketidakadilan, dohot masalah di portibi on. Alai saonari boi ma dame rohakku. Alana nga huboto, lao dibahen Debata Jahowa do dame saluhut tano on.”
Dang holan si Gary na makkilala songon i. Parrohahon ma songon dia Bibel mangurupi halak na asing.
NA DIDOK BIBEL: “Ale Jahowa, na burju do Ho jala rade manalpuhon hasalaan.”—Psalmen 86:5.
MANFAAT NI AYAT ON: “Tikki manjaha ayat on, gabe pos do rohakku Debata parasi roha do Jahowa i. Huboto ma, rade do Ibana manalpuhon hasalaanku najolo tikki dohot au marporang.”—Si Wilmar, Kolombia.
NA DIDOK BIBEL: “Hutoppa nama langit na imbaru dohot tano na imbaru. Dang ingoton be akka naung salpu i, jala dang tarsunggul be i di bagasan roha.”—Jesaya 65:17.
MANFAAT NI AYAT ON: “Ala dohot do au na jolo marporang, gabe depresi jala marsahit gangguan stres pasca trauma ma au. Alai ayat on paposhon rohakku, dang na lao huingot be sude na masa tikki porang i na mambahen au gabe trauma, dang adong be i di bagasan roha dohot pikkiranku. Massai luar biasa do on!”—Si Zafirah, Amerika Serikat.
NA DIDOK BIBEL: “Saleleng mamaretta ibana, gabe lam denggan ma ngolu ni halak na tigor marroha, dos ma nasida songon suan-suanan na lomak. Jala gok ma hadameon sahat tu na so adong be bulan.”—Psalmen 72:7.
MANFAAT NI AYAT ON: “Jotjot do hurimangi taringot ayat on. Satokkin nai dang tahilala be akibat ni porang ala dang adong be porang. Jala dang pola mabiar hita ala aman do annon sude keluargatta dohot donganta.”—Si Oleksandra, Ukraina.
NA DIDOK BIBEL: “Mulak mangolu do muse akka jolma naung mate. . . . Hamu akka na tinggal di orbuk! Dungo ma hamu jala marsurak ma marlas ni roha.”—Jesaya 26:19.
MANFAAT NI AYAT ON: “Hampir sude do keluargakku mate tikki ro halak sian suku na asing pamatehon halak Tutsi. Alai ayat on paposhon rohakku, dung dipahehe boi do au pajuppang muse dohot nasida. Tarpaima do au naeng mambege soara ni nasida na marlas ni roha!”—Si Marie, Rwanda.
NA DIDOK BIBEL: “Satokkin nai, dang adong be akka parjahat . . . Alai molo halak na lambok roha, dilehon do tano on gabe parbagianan ni nasida. Marlas ni roha situtu ma nasida, ai dame do ngolu ni nasida.”—Psalmen 37:10, 11.
MANFAAT NI AYAT ON: “Tung pe dang adong be porang, adong dope ketidakadilan dohot halak na jahat. Alai ayat on patoguhon rohakku, diparrohahon Jahowa do sude jala diattusi Ibana do situasikku. Marjanji do Ibana, satokkin nai na lao salpu nama i sude.”—Si Daler, Tajikistan.
Diurupi Bibel do akka halak naung disurat di majalah on asa boi makkilala dame ni roha. Nasida ma piga-piga sian marjuta Saksi Jahowa na adong di portibi on. Marsiajar do nasida asa unang mambeda-bedahon suku, bangso, jala mambolokkon sogo ni roha. (Epesus 4:31, 32) Dang dohot Saksi Jahowa tu urusan politik dohot konflik kekerasan.—Johannes 18:36.
Sai dihaholongi Saksi Jahowa do akka dongan di liat portibi on. (Johannes 13:35) Misalna, ala masa porang mangungsi ma si Oleksandra dohot kakakna tu negara na asing. Didok ibana, “Tikki sahat hami di perbatasan, pittor disambut Saksi Jahowa na disi ma hami. Ala diurupi nasida hami, gabe mura ma hami menyesuaihon diri nang pe tinggal di negara asing.”
Las rohanami mangundang hamu tu acara parpunguannami. Boi ma annon diparsiajari hamu disi boa carana asa boi dihilala hamu dame ni roha. Jala boi ma diparsiajari hamu muse taringot janji ni Debata na mandok na lao dame nama saluhut tano on. Asa diboto hamu inganan parpunguan na jonok tu ingananmuna, manang molo olo hamu marsiajar Bibel dohot sahalak Saksi Jahowa mamakke bukku Mangolu Saleleng ni Lelengna, kunjungi ma situs webnami di jw.org/bbc.