Diboto Hamu do?

Di abad na parjolo, tudia do dibolokkon mudar ni akka binatang na dipelehon di bagas joro?

GANUP taon, marribu do binatang na dipelehon akka malim di bagas joro di Israel. Sahalak sejarawan Jahudi di abad na parjolo na margoar si Yosefus mandok, adong do lobi sian 250.000 biru-biru na dipelehon tikki perayaan Paska. Alani i, godang hian do mudar na ikkon dibolokkon. (3 Mus. 1:​10, 11; 4 Mus. 28:​16, 19) Tudia ma dibolokkon mudar ni akka binatang i?

Dapot ni akka arkeolog ma sistem pambuangan di bagas joro na dibangun si Herodes muse. Sistem pambuangan on ma na dipakke lao mambolokkon mudar na di bagas joro i.

Tabahas ma akka aha do na mambahen boi toktong ias bagas joro i sian mudar:

• Akka lubang na adong di lante ni langgatan i: Dipatorang do taringot sistem pambuangan na di langgatan i di Misnah.a Didok disi, “Adong dua lubang di sudut ni lante ni langgatan i, jala akka lubang on adong di sabola barat daya ni langgatan i. Jadi, sian lubang i do dibolokkon mudar ni akka binatang dohot aek na dipakke lao paiasson i. Dung i, mengalir ma sudena i sahat tu Rura Kidron.”

  Jala sesuai do penemuan ni akka arkeolog tu na dipaboa di Misnah i. Didok di bukku The Cambridge History of Judaism, adong do “saluran pambuangan na denggan” di jonok ni bagas joro, jala “sian saluran on do ra dibolokkon aek dohot mudar ni akka binatang na dipelehon di Dolok Inganan ni Bagas Joro”.

• Godang hian do aek disi: Porlu do godang aek dipakke akka malim lao paiasson lante ni langgatan i dohot saluran pambuanganna. Alai, sian dia ma boi dapot ni nasida godang aek na ias? Dapot ni nasida ma aek i sian Kota Jerusalem na disalurhon tu kanal. Asing ni i, adong do tong akka panampungan aek disi, songon sumur dohot kolam. Sahalak arkeolog na margoar si Joseph Patrich mandok, “Di tikki i, dang adong tempat ibadah na songon i dengganna. Alana, godang do aek disi jala denggan do sistem pambuangan di bagas joro i.”