Boha do Carana Mangatasi Pakkilalaan na Loja Alani Pandemi?

Loja do hamu mamikkiri akibat ni virus corona on? Dang holan hamu na merasa songon i. Saleleng marbulan-bulan, godang do halak di liat portibi on mambahen penyesuaian na baru tu ngoluna alani virus corona on. Dr. Hans Kluge Direktur Regional Organisasi Kesehatan Dunia na tu Eropa mandok, “Godang do halak mambahen pengorbanan asa unang menyebar be virus corona. Alai godang do muse halak na so semangat jala na hurang parduli, ala diida nasida dang lam denggan situasi on. Loja do nasida marpikkir alani virus corona on.”

Molo loja do hamu alani pandemi, unang ma mandele hamu. Godang do halak boi mangatasi situasi on ala marsiajar Bibel nasida. Hamu pe boi do songon nasida.

Aha do maksudna loja alani pandemi?

Loja alani pandemi on dang goar ni sada sahit. Alai istilah on patuduhon aha na dihilala halak ala berubah ngolu ni nasida alani pandemi, jala khawatir nasida songon dia masa depanna di ari na naeng ro. Memang berbeda-beda do tanggapan ni akka halak alani pandemi on. Alai songon on ma tandana akka halak na loja alani pandemi:

Hurang semangat
Berubah kebiasaanna mangan dohot modom
Mura-mura muruk
Stres mangulahon karejo na biasana mura dikarejoi
Maol konsentrasi
Mura mandele

Boasa tadok masalah serius do loja alani pandemi on?

Loja marpikkir alani pandemi on boi do berbahaya tu diritta dohot tu halak na asing. Molo dang hati-hati hita, boi do gabe taabaihon petunjuk protokol kesehatan. Lam leleng boi do gabe sepele di hita bahaya ni virus corona i, nang pe virus corona i torus menyebar jala mambahen godang halak mate. Mungkin loja do hita alani akka batasan na dibahen saleleng pandemi. Jadi gabe naeng bebas ma hita, hape berbahaya do i tu diritta dohot tu halak na asing.

Di situasi pandemi saonari, godang do halak merasahon na sittong hata ni Bibel na mandok, “Molo metmet roham tikki masa hasusaan, moru ma gogom.” (Poda 24:10) Godang do nasehat ni Bibel na boi mangurupi hita mangatasi situasi na maol, termasuk ma i pandemi on.

Ayat ni Bibel na dia do na boi mangurupi hamu mangatasi pakkilalaan na loja alani pandemi?

Hindari ma kontak fisik, alai tetap ma berkomunikasi tu nasida

Na didok Bibel: “Sai dipatudu ale-ale do holong ni roha . . . tikki masa sitaonon.”—Poda 17:17.

Boasa penting: Dongan na burju boi do mangurupi hita gabe sabar. (1 Tessalonik 5:11) Alai molo menyendiri do hita, boi do i berbahaya tu kesehatanta.—Poda 18:1.

Coba ma on: Tetap ma hamu berkomunikasi tu donganmuna melalui video call, telepon, email manang chatting. Hubungi ma donganmuna i tikki lungun rohamuna jala jotjot ma sukkun kabar ni nasida. Boi do hamu marsipaboaan saran taringot songon dia caramuna menghadapi pandemi saonari. Coba ma ulahon sada cara na boi mangurupi donganmuna. On boi mambahen hamu dohot donganmuna i gabe marlas ni roha.

Komentar ni akka halak

“Hubahen do jadwalhu lao manelepon akka dongan. Sipata, holan tu sahalak sian donganku do au video call. Alai olo do au video call rame-rame lao margame manang makkata-hatai. Memang beda do rasana molo dibandikkon tikki pajuppang langsung. Alai songon i pe, nungnga las rohakku. Ai maol do situasitta saonari alani pandemi on, jadi porlu do hita torus makkatai dohot akka dongan jala jujur ma hita paboahon songon dia perasaatta. Memang dang mura, alai porlu do hita sude diurupi.”—Si Megan, Kanada.

“Masihol do hami naeng pajuppang tu keluarga dohot tu akka dongan. Alai, diboto hami do songon dia carana lao patuduhon na holong rohanami tu nasida. Lomo do rohanami sekeluarga mambahen kartu ucapan jala mangalehon hadiah tu akka dongan. Dibahen hami do sada ayat di hadiah i asa diboto na parduli do hami tu nasida. On mambahen hami marlas ni roha. Molo talehon godang tikkitta mangurupi na asing, boi do gabe lupa hita tu masalahta jala dang terlalu khawatir be hita.”—Si Emma rap dohot suamina si Nathan, dohot akka gellengna si Eli dohot si Hope, Amerika Serikat.

Denggan ma tamanfaatton situasi saonari

Na didok Bibel: “Denggan ma pakke tikkimuna.”—Epesus 5:16.

Boasa penting: Molo tapakke denggan tikkitta boi ma hita tetap positif jala dang terlalu khawatir.—Lukas 12:25.

Coba ma on: Daripada torus mamikkiri aha na so boi diulahon hamu, coba ma pikkirhon aha na boi diulahon hamu saonari. Misalna, boi do diulahon hamu hobi manang kegiatan na asing saonari on? Boi do unggodang dilehon hamu tikkimuna tu keluarga?

Komentar ni akka halak

“Boi do hami mangulahon godang kegiatan di jabu. Misalna, manuan akka sayur dohot suan-suanan na asing, mambahen karya seni dohot mandekorasi.”—Si Evan rap dohot istrina si Samantha, dohot akka gellengna si Eli dohot si Adam, Afrika Selatan.

“Nungnga 30 taon au menikah dohot istrikku. Alai jarang do adong tikkinami boi padua-dua. Dung pandemi on gabe godang ma tikkinami padua-dua, gabe lam bagas ma holongnami, gabe lam huattusi ma kelebihan dohot hahuranganna. Saonari nungnga diboto hami be cara lao mangatasi molo terjadi situasi na maol di ari na naeng ro.”—Si Ivan rap dohot istrina si Eve, Italia.

Bahen ma jadwalmuna jala ulahon ma i

Na didok Bibel: “Ikkon denggan do sude mardalan jala taratur.”—1 Korint 14:40.

Boasa penting: Godang do halak lebih tenang jala umlas rohana molo adong jadwal na lao diulahon ibana.

Coba ma on: Bahen ma jadwal na cocok tu situasimuna saonari. Bahen ma tikkimuna lao mambahen tugas sikkola, tugas kantor, tugas di jabu, dohot mangulahon kegiatan rohani. Ulahon ma akka ulaon na parohon na denggan tu hamu, songon makkata-hatai dohot keluarga, menghirup udara segar, dohot olahraga. Rutin ma hamu mamareso jadwalmuna i, atik boha adong perubahan na porlu dibahen hamu.

Komentar ni akka halak

“Huulahon do torus jadwal na hubahen hian sebelum pandemi. Nang pe adong piga-piga kegiatan hugatti tu olahraga, alai tetap do au dungo di jam na sarupa setiap pagi. On mangurupi au dang terlalu khawatir saleleng pandemi jala boi konsentrasi mamikkirhon keluargakku dohot akka dongan.”—Si Kgaogelo, Afrika Selatan.

“Molo dung dungo au hubahen ma sarapan dohot kopi. Dung i siap-siap ma au. Hupakke ma bajukku karejo pas songon kebiasaanku tikki naeng kaluar sian jabu. On mambahen au gabe marlas ni roha jala lebih semangat lao karejo di bagasan sadari i.”—Si Carmel, Perancis.

Sesuaihon ma dirimuna tu perubahan cuaca

Na didok Bibel: “Molo dibereng halak na marbisuk adong jea, martabuni do ibana.”—Poda 22:3.

Boasa penting: Di piga-piga inganan marasing-asing do cuaca dohot musim. Mungkin on mambahen hamu gabe maol mandapot udara segar dohot sinar matahari. Hape penting do i tu kesehatan fisik dohot mentalmuna.

Coba ma on: Molo naeng masa nama musim dingin, coba ma atur ruang tamu manang ruang kerjamuna asa boi mandapot godang cahaya matahari. Bahen ma rencana lao mangulahon piga-piga kegiatan na boi diulahon di luar ni jabu nang pe ngali cuaca. Molo boi do, lului ma pakkean na tebal asa boi ulleleng hamu di luar.

Molo naeng masa musim panas, jotjot do godang halak di luar ni jabu. Jadi hati-hati ma hamu. Bahen ma rencana na denggan lao tudia do hamu lao, jala lao ma hamu tu inganan i tikki sepi.

Komentar ni akka halak

“Jotjot do ro udan di ingananku, jadi sering do berubah jadwalhu. Molo dang udan di luar, kaluar ma au sian jabu lao mardalan-dalan naeng mangalului udara na segar manang marsepeda lao mandapot sinar matahari. On mambahen au gabe marlas ni roha.”—Si Sameena, Perancis.

“Tikki musim panas godang do na boi huulahon di luar ni jabu. Alani i molo nungnga jonok musim dingin, pittor hubahen ma daftar ni karejo na ikkon huulahon di jabu.”—Si Tiffany, Kanada.

Tetap ma ihutton protokol kesehatan

Na didok Bibel: “Gumarapus do halak na oto jala papossu tu dirina sandiri.”—Poda 14:16.

Boasa penting: Berbahaya do virus corona on boi do mambahen mate halak, jala molo dang tajaga diritta boi do hita tertular virus i.

Coba ma on: Ringgas ma hamu memeriksa petunjuk protokol kesehatan na marlakku di ingananmuna. Pastihon ma na torus diulahon hamu petunjuk i. Pikkirhon ma aha pengaruh ni tindakanmuna tu dirimuna sandiri, tu keluargamuna, dohot tu na asing.

Komentar ni akka halak

“Huulahon do manang aha pe lao mencegah asa unang menyebar virus corona. Nang pe halak na asing dang mangihutton protokol kesehatan. Berupaya do au torus lao manjaga dirikku dohot keluargakku asa tetap aman.”—Si Daryn, Afrika Selatan.

Pajonok hamu ma hubunganmuna tu Debata

Na didok Bibel: “Pajonok hamu ma tu Debata, dung i pajonokonna ma tu hamu.”—Jakobus 4:8.

Boasa penting: Sanggup do Debata mangurupi hamu mangatasi tantangan manang aha pe.—Jesaya 41:13.

Coba ma on: Jaha ma Bibel ganup ari. On do cara na parjolo na boi pajonokkon hamu tu Debata.

Coba ma hubungi Saksi Jahowa lao mamboto songon dia cara ni nasida boi tetap beribadat saleleng pandemi on. Jala sukkun ma songon dia carana asa boi hamu dohot tu parpunguan i. Misalna, dipakke Saksi Jahowa di liat portibi on do video conference tikki beribadat, memperingati ari hamamate ni Jesus, dohot mambahen parpunguan na balga setiap taon.

Akka ayat ni Bibel na boi mangurupi tikki loja alani pandemi

Jesaya 30:15: “Molo torus do hamu porsea jala dang busisaon, lam margogo ma hamu.”

Artina: Molo taandalhon jala taulahon hata ni Debata, boi ma hita tetap tenang nang pe mangadopi situasi na maol.

Poda 15:15: “Porsuk do ari-ari ni halak na marsak, alai sai marpesta do halak na marlas ni roha.”

Artina: Molo tetap tapikkirhon akka hal na positif, boi do mambahen hita marlas ni roha nang pe mangadopi situasi na maol.

Poda 14:15: “Dihaporseai halak na so marpengalaman do sude hata, alai dipikkiri halak na marbisuk do ganup lakkana.”

Artina: Unang ma anggap sepele manang taanggap dang penting akka batasan na dibahen saleleng pandemi.

Jesaya 33:24: “Dang adong nanggo sahalak pe na maringanan disi na mandok, ‘Marsahit do au’.”

Artina: Marjanji do Debata lao manalpuhon sude sahit.