Lobi sian Dua Triliun Dolar ma Biaya Militer Dunia—Aha do na Didok Bibel Taringot i?

Di taon 2022, adong puncak na baru tu biaya militer na dipakke dunia, i ma 2,24 triliun dolar AS. Jala unggodang do biaya i dipakke tikki penyerangan Rusia tu Ukraina. Di bulan April 2023 songon on ma na didok Stockholm International Peace Research Institute (SIPRI), taringot biaya militer na habis saleleng 2022:

• “Tamba do 13 persen godang ni” biaya militer na dipakke akka negara di Eropa “saleleng taon 2022. Molo dibandingkon tu akka taon mulai sian 1991, di taon 2022 i ma unggodang biaya na tamba.”

• “Tamba do biaya militer na dipakke negara Rusia hira-hira 9,2 persen. Jala sian sude negara, Rusia ma negara na patoluhon unggodang mamakke biaya militer. Hape sebelumna, negara na palimahon hian do ibana.”

• Sian najolo Amerika Serikat ma negara na unggodang mamakke biaya militer, i ma “39 persen sian sude biaya militer dunia”.

Songon on ma na didok Dr. Nan Tian di SIPRI, “Sian biaya militer na torus martamba piga-piga taon na parpudi on patuduhon, dang aman be portibi on.”

Nungnga dipaboa Bibel hian lam balga ma parporangan ni akka negara berkuasa. Jala nungnga dipaboa Bibel hian, holan Harajaon ni Debata do na boi mambahen dame portibi on.

Didok Bibel lam godang ma parporangan

• Didok Bibel hita saonari on mangolu di “ujung ni ari.”—Daniel 8:19.

• Didok di bukku Daniel, di ari parpudi lao adong ma akka negara na gabe kuasa dunia. “Mangalo” ma kuasa dunia na sada tu kuasa dunia na asing, lao marlumba gabe na unjago. Alani i dipakke nasida ma godang “arta” manang biaya lao marporang.—Daniel 11:40, 42, 43.

Lao mamboto gumodang informasi taringot on, tonton ma video Surirang Naung Digohi—Daniel Bindu 11.

Songon dia do asa dame portibi on?

• Didok Bibel, “Tikki mamaretta akka harajaon i, pajongjongon ni Debata na di surgo i ma sada harajaon na so boi dihancurhon. Dang na lao pasahatonna harajaon i tu bangso na dia pe. Alai na lao dihancurhon jala diropukkon harajaon i do sude harajaon na parjolo i. Jala hot do harajaon i saleleng ni lelengna.”—Daniel 2:44.

• Satokkin nai, lao turun tangan ma Debata Jahowaa mambahen dame portibi on saleleng ni lelengna, on ma na so boi diulahon jolma. Boha ma cara ni Jahowa mangulahon i? Marhite Harajaon ni Debata, ropukkononna ma sude sinjata jala pamateonna ma sude parjahat.—Psalmen 46:8, 9.

Lao mamboto gumodang informasi taringot aha na lao diulahon Harajaon ni Debata, jaha ma artikel “Dung Mamaretta Harajaon ni Debata, ‘Gok ma Hadameon’”.