Porang Dohot Perubahan Cuaca Mambahen Terjadi Krisis Makanan di Liat Portibi on—Aha do na Didok Bibel Taringot i?

Alani porang di Ukraina dohot perubahan cuaca, gabe terbatas ma persediaan makanan di liat portibi on. On mambahen akka halak gabe maol mandapot sipanganon, khususna di akka negara berkembang.

“Gabe lam maol do saonari memproduksi makanan dohot mambagihon i alani porang, perubahan cuaca, kenaikan harga bahan bakar, dohot na asing.”—António Guterres, Sekretaris-Jenderal PBB, 17 Juli 2023.
“Didok akka pakar, ala nungnga tarik diri Rusia sian perjanjian ekspor gandum, gabe lam tu parahna ma krisis makanan di liat portibi on. Jala gabe lam arga ma sipanganon di negara na otik pendapatanna, khususna di Afrika Utara dohot Timur Tengah.”—Atalayar.com, 23 Juli 2023.

Ida ma aha na didok Bibel taringot krisis makanan jala aha na lao bahenon ni Debata di ari na naeng ro.

Surirang ni Bibel taringot krisis makanan

Nungnga didok Jesus hian, “Marporang ma bangso tu bangso jala harajaon tu harajaon. Masa ma haraparon dohot gempa di godang inganan.”—Mateus 24:7.
Di bukku Pangungkapon adong do dipaboa taringot opat hoda dohot akka na makkunduli hoda i. Sada sian na makkunduli hoda i manggombarhon parporangan. Di pudina adong do hoda na asing na manggombarhon kelaparan. Di tikki i maol ma mangalului sipanganon jala molo pe adong massai arga do i. Bibel mandok, “Huida ma ro hoda na birong. Parsihundulna maniop sada timbangan. Jadi hubege ma songon na adong soara . . . na mandok: ‘Saliter gandum gaji sadari, jala tolu liter jelai [barli] gaji sadari. Alai unang ma segai hau jetun dohot hau anggur.’”—Pangungkapon 6:5, 6, Bibel siganup ari.

Nungnga terjadi be saonari surirang ni Bibel taringot krisis makanan on. Alana hita nungnga mangolu di “ari parpudi”. (2 Timoteus 3:1) Lao mandapot informasi tambahan taringot “ari parpudi” dohot opat hoda na dipaboa di bukku Pangungkapon, tonton ma video Lam Sursar do Keadaan ni Portibi on Mulai Taon 1914 jala jaha ma artikel “Angka Ise do Na Mangkunduli Hoda I?”

Bantuan sian Bibel

Dipaboa do di Bibel akka nasehat na boi mangurupi hita menghadapi akka situasi na sulit saonari on, termasuk ma krisis makanan dohot argana na lam meningkat. Ida ma contohna di artikel “Carana Berhemat Tikki Moru Penghasilan”.
Dipaboa do muse di Bibel, dang salelengna songon on ngolutta. Alai adong do dilehon Debata harapan na lao denggan do ngolutta haduan. Bibel mandok di ari na naeng ro “godang ma tubu sipanganon di ladang”. On patuduhon sude ma halak boi mandapot gok sipanganon jala dang adong be na kelaparan. (Psalmen 72:16) Boi do tahaporseai janji ni Debata i. Lao mandapot informasi tambahan taringot i, jaha ma artikel “Harapan na Massai Denggan na Lao Saut di Ari na Naeng Ro”.