Ketidakadilan na Dialami Akka Borua—Na Didok Bibel Taringot i

“Tikki dakdanak, tiap ari do au dihina jala dipukkuli itokku. Dung menikah, sering do au dihina simatuakku boru. Jala dohot do muse simatuakku doli mambahen au songon hatoban. Alani i, gabe jotjot ma tarpikkir au naeng bunu diri.”—Madhu,a India.

Songon on ma na didok Organisasi Kesehatan Dunia (WHO), “Sering do akka borua di liat portibi on mengalami kekerasan.” Menurut survei na dibahen WHO, sada sian tolu borua di liat portibi on, hea do mengalami kekerasan fisik manang seksual.

Molo hea dibahen songon i tu hamu, gabe mabiar do ra hamu naeng lao manang tudia pe. Olo do ra gabe khawatir hamu mamikkiri so tung adong annon halak na menghina hamu, na mangulahon kekerasan tu hamu, manang mangulahon pelecehan seksual. Ala sering akka borua mengalami kekerasan manang ketidakadilan, bahkan gabe olo do ra hamu merasa ‘dang mararga akka borua i’. Alai songon dia do pandangan ni Debata?

Mararga do akka borua di Debata?

Ayat: “Ditoppa [Debata] ma jolma i, bawa dohot borua.”—1 Musa 1:27.

Lapatanna: Debata do na manoppa bawa dohot borua. Alani i, mararga do di Ibana sude jolma. I do alana dipangido Debata sahalak suami ‘makkaholongi istrina songon makkaholongi dirina sandiri’. Jadi dang boi sahalak suami mamaksahon lomo ni rohana tu istrina, mamukkuli, manang menghina istrina. (Epesus 5:33; Kolosse 3:19) Takkas ma, arga do akka borua di Debata.

“Tikki dakdanak, adong do keluargakku na mangulahon pelecehan seksual tu au. Dung marumur 17 taon, hea do boshu mamaksa au asa mangulahon seks dohot ibana. Didok ibana, dipecat do au molo dang olo mangulahon i. Jala dung dewasa, dang diargai natua-tuakku au. Songon i do tong suamikku dohot akka tetanggakku. Dung i marsiajar Bibel ma au jala hutanda ma Jahowa,b na manoppa saluhutna. Huboto ma na diargai Ibana do akka borua. On mambahen pos rohakku, mararga do au di Jahowa jala holong do rohana tu au.”—Maria, Argentina.

Boha do carana asa tarapul rohamuna?

Ayat: “Adong do dongan na ussolhot sian haha anggi.”—Poda 18:24.

Lapatanna: Ceritahon ma perasaanmuna tu dongan na boi dihaporseai. Alana dongan na burju, pasti olo do mangurupi hamu.

“Saleleng 20 taon, dang hea hupaboa manang na tu ise pe pelecehan seksual na hea hualami. On mambahen au gabe mura khawatir, depresi, jala dang hea be las rohakku. Alai ujungna, huceritahon ma i tu dongan na boi huhaporseai. Hasilna, gabe dame ma huhilala.” —Elif, Turkiye.

Ayat: “Pasahat hamu ma sude holso ni rohamuna tu [Debata], ai diparrohahon do hamu.”—1 Petrus 5:7.

Lapatanna: Parduli do Debata tu hamu. Molo martangiang hamu tu Ibana, pasti ditangihon Ibana do hamu. (Psalmen 55:22; 65:2) Jadi pos ma rohamuna, massai arga do hamu di Debata.

“Sebelumna, hira na adong do lukka na bagas di rohakku. Alai dung hutanda Jahowa, gabe boi ma i malum. Tikki martangiang, hupaboa do tu Debata manang aha pe na adong di rohakku. Songon sahabathu do Ibana, na boi mangattusi pakkilalaakku.”—Ana, Belize.

Aha do na lao bahenon ni Debata asa unang adong be akka borua na mengalami ketidakadilan?

Ayat: “Bahenon [ni Jahowa] do na tigor tu akka halak na so marama dohot tu akka halak na susa, asa unang adong be jolma di tano on na mambahen nasida mabiar.”—Psalmen 10:​17, 18.

Lapatanna: Satokkin nai apusan ni Debata nama sude ketidakadilan, termasuk ma kekerasan tu akka borua.

“Dung huboto na lao apusan ni Debata nama satokkin nai ketidakadilan dohot kekerasan tu akka borua, gabe tenang jala dame ma huhilala.”—Roberta, Meksiko.

Lao mandapot unggodang informasi taringot janji ni Debata, songon dia asa boi pos rohamuna tu janji i, jala songon dia Saksi Jahowa mangurupi hamu marsiajar Bibel, pangido ma asa dijuppangi hamu.

Download ma versi PDF ni artikel on.