SUKKUN-SUKKUN NI AKKA NA POSO
Aha do na Porlu Huboto Taringot Game Elektronik?
Kuis taringot game elektronik
Di Amerika Serikat, game elektronik nungnga gabe sada industri na balga. Boi do sappe marmiliar dolar keuntungan na didapot sian i.
Sadia do rata-rata umur ni halak na margame elektronik di negara i?
18
30
Piga persen do perbandingan ni bawa dohot borua na margame elektronik disi?
55 persen bawa; 45 persen borua
15 persen bawa; 85 persen borua
Sian dua kelompok ni pemain on, dia do unggodang jumlahna?
Borua na marumur 18 taon tu ginjang
Bawa na marumur 17 taon tu toru
Alusna (mangihutton data di taon 2013):
B. 30.
A. Sahat tu 45 persen ma godang ni borua na margame. Hampir satonga ma i sian jumlah ni sude pemain.
A. Sahat tu 31 persen ma jumlah ni borua na marumur 18 taon tu ginjang na margame. Jala sahat tu 19 persen ma jumlah ni bawa na marumur 17 taon tu toru.
Sian data on, gabe diboto hamu do ra ise na unjotjot margame. Alai dang dipaboa tu hamu aha do manfaat dohot bahaya ni margame.
Manfaatna
Komentar na dia do na pas dihilala hamu?
“Seru do na margame on. Gabe boi do hita akrab tu dongan dohot tu keluargatta.”—Si Irene.
“Tabo do margame lao mangisi waktu.”—Si Annette.
“Gabe tarlatik ma kesanggupanta asa hatop bereaksi.”—Si Christopher.
“Gabe lam malo ma hita mangalului jalan keluar tikki adong masalah.”—Si Amy.
“Gabe tarlatik ma otakta. Gabe malo ma hita mambahen rencana dohot strategi.”—Si Anthony.
“Gabe dilatik ma hita bekerja sama.”—Si Thomas.
“Adong do game na boi mambahen hita gabe berolahraga. Hasilna gabe sehat ma hita.”—Si Jael.
Adong do sian akka komentar i na pas dihilala hamu? Manang setuju do hamu tu sude komentar i? Memang, adong do video game na bermanfaat tu pikiran dohot tubuhmuna. Alai songon na didok si Annette, dang pola gabe sala hita margame nang pe holan “lao mangisi waktu”.
● Bibel mandok, “martikki be do sude na masa di tano on”, termasuk do i rekreasi.—Parjamita 3:1-4.
Bahayana
Gabe habis do tikkimuna ala margame?
“Molo nungnga humulai margame, maol do lao pasohon i. Saleleng na margame i sai hudok do di bagasan rohakku, ‘Oke, dukkon na sada on hupaso pe.’ Alai dang sadar au, nungnga habis marjom-jom tikkikku holan na margame!”—Si Annette.
“Boi do godang habis tikkimuna molo margame. Hundul do hamu marjom-jom, jala didok rohamuna nungnga jago hian hamu ala boi monang di lima game. Hape sebenarna, dang adong dapotmuna manang aha.”—Si Serena.
Kesimpulanna: Molo mago hepengmu, boi do muse dilului ho i. Alai molo tikkim do na habis, dang boi be i dipaulak ho. Jadi boi ma tadok, ummarga do tikki sian apala hepeng. Alani i unang ma paloas habis tikkim dang marlapatan!
● Didok di Bibel, “Sai marbisuk ma hamu . . . , jala denggan ma pakke tikkimuna.”—Kolosse 4:5.
Boi do game elektronik mempengaruhi pikiranmuna?
“Di bagasan game, mura do akka halak mangulahon hajahaton. Molo diulahon akka hajahaton i di dunia nyata, sebenarna ikkon dipenjara do ibana manang dihukum mate.”—Si Seth.
“Di godang game, asa boi monang ikkon ditaluhon sasahalak do musuna. Jala jotjot do asa boi ditaluhon musu i, ikkon dibunu do marhite cara na sadis.”—Si Annette.
“Sipata tikki margame, olo do dang tasadari aha na tadok tu donganta. Olo do ra tadokkon, ‘Mate ho!’ manang ‘Ikkon hupamate ho!’”—Si Nathan.
Kesimpulanna: Unang ma pillit akka game na boi mambahen sogo roha ni Debata. Songon game na marisi kekerasan, seks na so patut, dohot spiritisme.—Galatia 5:19-21; Epesus 5:10; 1 Johannes 2:15, 16.
● Didok di Bibel, ‘sogo do roha ni Jahowa tu manang ise pe na makkaholongi ulaon ni halak na kejam’, dang holan tu halak na mangulahon i. (Psalmen 11:5) Memang akka game na dipillit hamu dang patuduhon gabe halak na songon dia hamu haduan, alai boi do i patuduhon halak na songon dia hamu saonari.
Pikkirhon ma on: Menurut bukku Getting to Calm, “Umbalga do pengaruh ni game na marisi kekerasan sian apala TV tu pangalaho ni dakdanak. Alana nasida dang holan manonton kekerasan, alai nasida sandiri do na mangulahon i. Sarupa songon guru na mangajar di kelas do game i. Jadi boi do didok molo game i mangajarhon halak asa mangulahon kekerasan.”—Bandikkon tu Jesaya 2:4.
Bahen ma batasan
Godang do akka na poso na ujungna menyadari porlu do nasida seimbang tikki margame. Ida ma dua pengalaman on.
“Najolo jotjot do au sappe tonga borngin margame. Alana didok rohakku, ‘Cukkup do holan lima jom au modom. Dukkon na sada on, modom pe au.’ Alai saonari dang songon i be au. Memang olo dope au margame, alai holan sahali-sahali nama jala dang leleng.”—Si Joseph.
“Saonari nga huorui be tikkikku margame, jala gabe boi ma huulahon godang ulaon na asing. Gabe lam terampil ma au marbarita, boi huurupi akka dongan di huria, jala belajar alat musik ma au. Godang dope hape na boi huulahon!”—Si David.
● Didok di Bibel, halak na togu haporseaonna i ma halak na “boi mangarajai dirina”. (1 Timoteus 3:2, 11) Tetap do nasida boi menikmati rekreasi. Alai diboto nasida do cara mangatur waktu jala boi mengendalihon diri.—Epesus 5:10.
Kesimpulanna: Margame boi do gabe rekreasi na mambahen las roha, asal ma taboto batasanna. Alani i unang ma pagodangku dipakke hamu tikkimuna lao margame, manang mambahen hamu gabe dang mangulahon akka na uppetting di ngolumuna. Daripada habis tikki dohot gogomuna lao margame, tumagon ma dipakke hamu tikki dohot gogomuna i lao mangulahon na denggan di ngolumuna.