Aha do na Masa tu Halak Naung Mate?

Hamatean balik ni hangoluan. Hamatean i songon halak na renge modom. (Johannes 11:11-14) Halak na mate ndang boi be marbinege, marnida, manghatai, manang marpingkir. (Parjamita 9:5, 10) Ugamo na so sintong mangajarhon adong sian halak naung mate i lao tu inganan na asing, mangolu raphon angka ompu ni nasida naung jumolo mate. On ndang ajaran ni Bibel.

Halak naung mate ndang boi mangurupi dohot manggugai hita. Asa boi pasonanghon halak naung mate nunga somal di angka jolma laho mambahen ulaon ugamo manang paradaton. Ndang dihalomohon Debata on, alana marojahan tu sada sian angka gabus ni Sibolis. Halak naung mate pe ndang boi tapasonang, ala ndang mangolu be nasida. Ndang mabiar be hita tu angka halak naung mate manang manomba nasida. Holan Debata do na ingkon tasomba.—Mateus 4:10.

Halak naung mate mulak mangolu muse. Di Paradeiso, paheheon ni Jahowa ma halak naung mate asa mulak mangolu muse. (Johannes 5:28, 29; Ulaon ni Apostel 24:15) Debata boi pahehehon halak naung mate, dos songon tingki hamu mandungoi halak na modom. Masa ma on di ari na naeng ro.—Markus 5:22, 23, 41, 42.

Hata na mandok adong sian pamatangta na so boi mate, sada gabus na disarhon ni Sibolis. Sibolis dohot angka surusuruanna mambahen angka jolma porsea, molo tondi ni naung mate tongtong mangolu, jala boi mambahen sahit dohot angka hasusaan. Digabusi Sibolis do angka jolma marhite sian nipi dohot pamerengmerengon. Diburai Jahowa do halak na manghatai tu jolma naung mate.—5 Musa 18:10-12.