PASAL 7

Angka Datu Ro Mandapothon Jesus

DIIHUTHON ANGKA DATU DO SADA “BINTANG” TU JERUSALEM DUNG I DIDAPOTHON NASIDA MA JESUS

Adong ma angka baoa na ro sian Timur. Angka datu do nasida, na mangida bintang laho mamboto na laho masa tu sasahalak jala laho mamboto lapatan ni angka na masa di hangoluan ni sasahalak. (Jesaya 47:13) Sian Timur, nunga diida nasida sada “bintang”, jala diihuthon nasida ma bintang i sahat tu Jerusalem, ndang tu Betlehem.

Dung sahat nasida di Jerusalem, disungkun nasida ma, “Didia do raja ni halak Jahudi na baru tubu i? Tingki di Timur huida hami do bintangna, jala na ro do hami laho marsomba tu ibana.”—Mateus 2:1, 2.

Tingki dibege Raja Herodes i, tarrimas ma ibana. Dijou ibana ma angka sintua ni malim dohot angka pamimpin ni agama Jahudi. Disungkun ibana ma tu nasida, didia do Kristus i tubu. Marhite Surat na Badia, dialusi nasida ma, “Di Betlehem.” (Mateus 2:5; Mika 5:1) Dung i, sipsip ma dijou si Herodes angka datu i, jala didok ma tu nasida, “Lului ma dakdanak i sahat tu na dapot, molo dung jumpang, paboa ma tu ahu asa ro ahu tusi jala marsomba tu ibana.” (Mateus 2:8) Alai sasintongna, na laho bunuon ni si Herodes do dakdanak i!

Dung borhat angka datu i, masa ma tanda halongangan. Tarida ma muse “bintang” na manogu-nogu nasida sian Timur i. Diihuthon nasida ma bintang i sahat tu na so bintang i di ginjang ni jabu ni si Josep dohot si Maria rap dohot dakdanak i. Tangkas ma, ndang dos bintang i dohot bintang na asing, alai dibahen do bintang i laho manogu-nogu angka datu i.

Angka datu na mangihuthon bintang tu Betlehem jala na mangalehon hadiah tu si Maria dohot tu Jesus

Masuk ma angka datu i, diida nasida ma si Maria rap dohot dakdanak, i ma Jesus. Marsomba ma nasida tu ibana jala dilehon nasida ma mas, haminjon dohot mir. Dung i, naeng mulak ma nasida manjumpangi si Herodes. Alai marhite nipi, dipasingot Debata ma nasida asa unang mulak tu si Herodes. Alani i, sian dalan na asing ma nasida mulak tu luat ni nasida.

Didok rohamuna, ise do na mambahen “bintang” i? Ingot ma, ndang pintor tu Betlehem angka datu i ditogu-togu. Hape disi do inganan ni Jesus. Alai, tu Jerusalem do nasida ditogu-togu, tu Raja Herodes na laho mambunu Jesus. Autsugari ndang dipasingot Debata angka datu i, bunuon ni si Herodes ma Jesus. Tangkas ma, musu ni Debata do na mambahen “bintang” i, i ma Sibolis. Ai lomo do rohana molo mate Jesus di tingki i.