Dilindungi Jahowa do Jesus

Porsea do akka halak na di timur ni Israel, na boi do bintang patuduhon dalan tu nasida. Di sada tikki, adong piga-piga bawa na sian Timur mangida bintang di langit. Diida nasida ma mardalan bintang i, jala diihutton nasida ma i sahat tu Jerusalem. Diboto nasida, adong sada dakdanak na lao gabe raja ni halak Jahudi. Alani i disukkun nasida ma akka halak disi didia do dakdanak i, asa marsomba nasida tu ibana.

Si Herodes do raja di Jerusalem. Tikki dibege ibana lao adong raja na baru, marsak ma ibana. Disukkun ma tu akka malim, ‘Didia do tubu dakdanak na lao gabe raja i?’ Didok akka malim i ma, ‘Didok akka nabi, di Betlehem do ibana tubu.’ Dung i, dijou si Herodes ma halak na sian Timur i. Ninna ma, ‘Lao ma hamu tu Betlehem. Lului ma dakdanak i, dung i paboa ma tu au, asa dohot au marsomba tu ibana.’ Alai margabus do ibana disi.

Mardalan ma muse bintang i. Diihutton akka bawa  i ma bintang i sahat tu Betlehem. Dung i, so ma bintang i di ginjang ni sada jabu. Masuk ma nasida tu jabu i, diida ma Jesus rap dohot omakna, si Maria. Marsomba ma nasida tu dakdanak i. Dilehon nasida ma akka hadiah, songon mas, kemenyan, dohot mir. Jahowa do na manuru nasida mangalului Jesus? Daong.

Di borngin i, makkatai ma Jahowa tu si Josep marhite nipi. Didok ma, ‘Naeng dibunu si Herodes do Jesus anakmi. Lao ma ho tu Mesir. Boan ma istrim dohot anakmi. Disi ma hamu sahat tu na aman situasi.’ Diboan si Josep ma si Maria dohot Jesus tu Mesir.

Diorai Jahowa do akka bawa na sian Timur i mulak tu si Herodes. Dung diboto si Herodes na so ro be nasida, gabe muruk ma ibana. Diparettahon ibana ma asa dipamate sude dakdanak bawa na sarupa umurna dohot Jesus. Alai dang dohot dipamate Jesus, alana nungnga di Mesir nasida.

Dung i, mate ma si Herodes. Didok Jahowa ma tu si Josep, ‘Mulak ma hamu, nungnga aman be saonari situasina.’ Mulak ma si Josep, si Maria, dohot Jesus tu Israel. Tinggal ma nasida di kota Nasaret.