Si Johannes Paradehon Dalan

Nunga salpu 17 taon dung disungkuni Jesus angka guru na di bagas joro, i ma tingki ibana marumur 12 taon. Taon 29 M ma saonari. Tingki i, godang do na mananda si Johannes, na marbarita di inganan na di sabola timur ni Sunge Jordan.

Godang do halak na longang alani ulaon dohot hata ni si Johannes. Ai sian imbulu ni unta do abitna jala sian kulit do ikat pinggangna. Sihapor dohot madu na sian tombak do sipanganonna. Aha do dibaritahon ibana? “Pauba hamu ma rohamuna, ai nunga jonok Harajaon banua ginjang i.”​—Mateus 3:2.

Alani i do godang halak olo mambege barita ni si Johannes. Marroan do halak sian “Jerusalem, sian sude huta di Judea, dohot sian sude huta na jonok tu Sunge Jordan mandapothon ibana”. (Mateus 3:5) Diboto nasida do na porlu nasida muba sian pangalaho dohot ulaon ni nasida di tingki naung salpu. Alani i, godang do na paubahon rohana sian ulaon na jahat. Dididi si Johannes do nasida marhite mambonomhon nasida tu Sunge Jordan. Boasa dididi nasida?

Dididi do nasida gabe tanda naung muba nasida sian hasalaan ni nasida. Ai ndang dioloi nasida parjanjian ni nasida taringot tu Patik ni Debata. (Ulaon ni Apostel 19:4) Alai ndang sude halak boi tardidi. Tingki ro pamimpin agama, halak Parise dohot halak Saduse tu si Johannes, didok do nasida “pinompar ni ulok na marbisa”. Didok do muse, “Patudu ma sian parniulaonmuna naung muba hamu. Unang ma didok rohamuna, ‘Pinompar ni si Abraham do hami.’ Hudok ma tu hamu, angka batu on pe boi do bahenon ni Debata gabe pinompar ni si Abraham. Nunga rade kampak di bona ni hau. Ganup hau na so denggan parbuena, tabaon ma i jala sampathonon tu api.”​—Mateus 3:7-10.

Godang do na ro manangihon si Johannes jala tardidi. Alani i, disuru halak Jahudi ma angka malim dohot halak Lepi manungkun si Johannes, ninna ma, “Ai ise do ho?”

Didok si Johannes ma, “Ndang ahu Kristus i.”

Disungkun nasida ma, “Antong ise do ho? Si Elia do ho?”

Dialusi ibana ma, “Daong.”

Disungkun ma muse, “Panurirang na naeng ro i do ho?” Lapatanna, Panurirang na naeng ro na pinaboa ni si Musa.​—5 Musa 18:15, 18.

“Daong!” ninna si Johannes.

Disungkun nasida ma muse, “Molo songon i, ise do ho? Paboa ma jolo, asa boi hualusi hami na marsuru hami. Aha do dohononmu taringot tu dirim?” Didok si Johannes ma, “Ahu do halak na jou-jou di padang pasir i na mandok, ‘Patigor hamu ma dalan ni Jahowa,’ songon na nidok ni panurirang Jesaya.”​—Johannes 1:19-23.

Didok nasida ma, “Antong molo so Kristus, manang si Elia, manang Panurirang na naeng ro i do ho, boasa ma didionmu halak?” Didok ibana ma, “Anggo ahu aek do hudidihon tu hamu. Alai, jongjong do di tonga-tongamuna sahalak na so tinandamuna, na ro di pudingku.”​—Johannes 1:25-27.

Diboto si Johannes do, ulaonna i mangurupi godang halak paradehon roha ni nasida manjalo Messias naung dijanjihon i. Ibana ma na laho gabe Raja. Ai didok si Johannes do, “Umbalga do huaso ni na ro dungkon ahu. Gari mambungka sipatuna ndang tama ahu.” (Mateus 3:11) Didok do muse, “Umbalga do sian ahu halak na ro di pudingku, ai nunga adong ibana andorang so adong dope ahu.”​—Johannes 1:15.

Alani i, pas do di tingki i barita ni si Johannes na mandok, “Pauba hamu ma rohamuna, ai nunga jonok Harajaon banua ginjang i.” (Mateus 3:2) Ai ndang sadia leleng nai pungkaon ni Jesus Kristus, Raja na pinillit ni Jahowa i nama ulaonna.