SUNGKUNSUNGKUN 7
Boha do Molo Ditogihon Mangulahon Seks?
AHA DO ULAHONONMUNA?
Rimangi ma on: Dua bulan dope si Heather marsitandaan tu si Mike, alai sai naeng rap ibana dohot si Mike. Jotjot do nasida chatting, martelepon, jala rap mangkarejohon tugas! Alai, di roha ni si Mike, lobi sian i ma nian pambahenan ni si Heather.
Dua bulan on, ndang adong na diulahon nasida asing ni marsitiopan dohot marsiummaan. Ndang olo si Heather mangulahon na asing lobi sian i. Alai, lomo rohana sai rap tu si Mike. Holan si Mike do na mamparrohahon ibana. Didok rohana, ”Holong do rohangku tu si Mike jala ibana pe songon i . . . ”
Molo nunga boi hamu marhallet jala diadopi hamu situasi songon si Heather, aha do na laho ulahononmu?
PINGKIRI MA!
Seks, silehonlehon na arga sian Debata holan tu angka naung marsaripe. Molo mangulahon i andorang so marhasohotan, on patuduhon ndang diargai hamu silehonlehon i. Dos ma songon baju na bagak na dilehon halak, alai dibahen hamu gabe kain lap
Molo dialo hamu hukum alam, songon hukum gravitasi, gabe parohon jea do i. Songon i ma, molo ndang mangihuthon uhum taringot moral na mandok, ”Unang ulahon hamu parmainanon.”—1 Tessalonik 4:3, Bibel siganup ari.
Aha do pangkorhonna molo ndang unduk tu parenta i? Bibel paboahon, ”Halak na mangulahon parmainanon, tu dagingna do ibana mardosa.” (1 Korint 6:18) Tutu do i?
Mangihuthon hatorangan ni angka panulingkit, on ma pigapiga na dihilala angka na poso dungkon mangulahon seks andorang so marhasohotan.
GABE MANOLSOLI. Dung mangulahon seks, godang do angka na poso manolsoli pambahenanna.
GABE CURIGA. Dung mangulahon seks, gabe masicurigaan ma nasida, ”Dohot ise dope ibana hea mangulahon on?”
GABE SOGO ROHANA. Sasintongna, ndang lomo roha ni anak boru tu baoa na holan mambuat untung sian ibana. Alai, umlomo do rohana mangida baoa na boi manjaga ibana. Jala, ndang pola lomo roha ni baoa mangida anak boru na mura dirayu.
Intina: Molo diulahon hamu seks andorang so marhasohotan, gabe ndang arga be dirimu. (Rom 1:24) Harugian na balga do molo diulahon hamu sisongon i!
Patudu ma molo hamu rade mangihuthon parenta on, ”Unang ulahon hamu parmainanon.” (1 Tessalonik 4:3, Bibel siganup ari) Molo nunga marhasohotan annon hamu, boi ma hamu mangulahon seks jala marlas ni roha ma hamu mangulahon i. Alana, ndang manolsoli be rohamu, ndang jut rohamu, jala ndang curiga hamu alani mangulahon i.—Poda 7:22, 23; 1 Korint 7:3.
SONGON DIA DO PANDAPOTMU?
Molo tutu do ibana mangkaholongi hamu, olo do ibana parohon jea tu hamu?
Molo tutu do ibana mangkaholongi hamu, olo do ibana manegai paralealeonmu tu Debata?—Heber 13:4.