Raja ni Israel na Parjolo

Dilehon Jahowa do hakim tu halak Israel lao mamimpin nasida. Alai didok nasida do muse tu si Samuel, ‘Sude bangso di luat on, adong do rajana. Hami pe ikkon adong ma rajanami.’ Didok roha ni si Samuel, sala do i. Alani i, martangiang ma ibana tu Jahowa. Alai didok Jahowa ma, ‘Dang ho na ditolak nasida, Au do. Paboa ma tu bangso i, boi do adong raja ni nasida. Alai, godang do annon na dipangido raja i sian nasida.’ Nang pe songon i, didok bangso i do, ‘Dang pola boha i, asal ma adong rajanami!’

Didok Jahowa ma tu si Samuel asa dipillit si Saul gabe raja na parjolo di Israel. Tikki ro si Saul manjuppangi si Samuel di Rama, dibahen si Samuel ma miak tu ulu ni si Saul, i ma tanda naung dipillit ibana gabe raja.

Di ari na mangihut, dijou si Samuel ma halak Israel lao marpungu asa dipatudu tu nasida raja na baru. Alai dang tarida si Saul. Tudia ibana lao? Martabuni do ibana di pudi ni akka barang. Dung dapot ni nasida si Saul, diboan ma ibana tu tonga-tonga ni bangso i. Ganteng do si Saul jala timbo, untimbo do ibana sian manang ise pe. Didok si Samuel ma, ‘Ibana ma na dipillit Jahowa.’ Dung i didok bangso i ma gogo, ‘Horas ma di raja i!’

Di mulana, ditangihon raja Saul do si Samuel jala unduk tu Jahowa. Alai di pudian ni ari, dang unduk be ibana. Di sada tikki, nungnga didok si Samuel asa dipaima si Saul ibana lao mangalehon persembahan. Alai ala dang ro dope si Samuel, gabe si Saul ma na mangalehon persembahan i. Hape sasittongna, holan malim do na boi mangalehon persembahan. Songon dia do tanggapan ni si Samuel? Didok si Samuel ma tu ibana, ‘Boasa dang dioloi ho Patik ni Jahowa?’ Sala do si Saul disi. Alai olo do ibana muba?

Di tikki na asing, lao ma si Saul marporang mangalo bangso Amalek. Nungnga didok si Samuel ikkon dibunu do sude na di huta i. Alai dang dibunu si Saul Raja Agag. Didok Jahowa ma tu si Samuel, ‘Dang ditangihon si Saul be Au.’ Lungun do roha ni si Samuel jala didok ma tu si Saul, ‘Ala dang dioloi ho be Jahowa, dipillit Ibana nama raja na asing.’ Tikki naeng lao si Samuel, ditarik si Saul ma baju ni si Samuel sappe maribak. Didok si Samuel ma muse tu si Saul, ‘Buaton ni Jahowa nama harajaon i sian ho.’ Lao dilehon Jahowa ma harajaon i tu halak na makkaholongi jala na unduk tu Ibana.