Barani jala Setia do si Jonatan

Anak siakkangan ni Raja Saul do si Jonatan, jala tentara na barani do ibana. Didok si Daud, ukkatop do si Jonatan sian lali jala umgogo sian singa. Sada tikki, diida si Jonatan ma 20 tentara ni Palistim di pussu ni dolok. Didok si Jonatan ma tu halak na mamboan senjatana, ‘Molo disuru halak Palistim hita nakkok, i ma tanda sian Jahowa. Taserang ma nasida.’ Gogo ma didok halak Palistim i, ‘Nakkok ma hamu!’ Nakkok ma si Jonatan dohot halak na mamboan senjatana, jala dibunu ma akka tentara i.

Ala anak siakkangan si Jonatan, sasittongna marhak do ibana gabe raja dukkon si Saul. Alai diboto si Jonatan do naung dipillit Jahowa si Daud. Nang pe songon i, dang cemburu ibana. Bersahabat do ibana dohot si Daud. Marjanji do nasida asa marsiurupan. Dilehon si Jonatan ma tu si Daud rompi na ganjang, podang, panah, dohot ikkat pinggang. On ma tandana na bersahabat nasida.

Tikki martabuni si Daud sian si Saul, ro do si Jonatan manjuppangi ibana. Didok si Jonatan ma, ‘Ikkon togu do ho jala barani. Nungnga dipillit Jahowa ho gabe raja. Diboto bapakku do i.’ Lomo do roham adong sahabatmu songon si Jonatan?

Jotjot do si Jonatan mangurupi si Daud nang pe sasittongna berbahaya do i tu ibana. Diboto ibana do naeng dibunu Raja Saul si Daud. Didok ma tu si Saul, ‘Mardosa do ho Bapa molo dibunu ho si Daud. Dang adong salana.’ Gabe muruk ma si Saul tu si Jonatan.

Piga-piga taon dukkon i, mate di parporangan do si Saul dohot si Jonatan. Dung mate si Jonatan, dilului si Daud ma anak ni si Jonatan, i ma si Mepiboset. Didok si Daud ma tu ibana, ‘Sahabattu do bapakmu. Alani i, jagaokku ma ho saleleng ni ngolum. Tinggal di istana ma ho jala rap mangan ma hita.’ Dang lupa si Daud tu si Jonatan sahabatna i.