Sukkun-Sukkun sian na Manjaha
Boasa didok di 2 Samuel 21:7-9, “asi do roha ni si Daud tu si Mepiboset”, alai didok muse dipasahat ibana do si Mepiboset asa dipamate?
Bisa jadi adong do na manukkun songon i dung manjaha ayat on. Alai sasittongna adong do dua halak na margoar si Mepiboset na ditaringoti di ayat on, jala adong do tong parsiajaran na boi tadapot sian peristiwa na masa tu halak i na dua.
Adong pitu anak ni si Saul jala adong dua boruna. Si Jonatan ma anak siakkanganna. Asing ni i, adong do muse anak ni Raja Saul na margoar si Mepiboset sian gundikna si Rispa. Hape, anak ni Jonatan pe goarna si Mepiboset do. Jadi adong dua pinoppar ni Raja Saul na sarupa goarna, sada anakna, sada nai pahoppuna.
Ala sogo roha ni Raja Saul tu halak Gibeon, naeng dipamate ibana ma halak i sude. Jala kemungkinan nungnga adong naung dipamate si Saul. Alai sala do i, boasa? Alana molo taingot di jaman ni si Josua, nungnga dibahen akka pamimpin ni halak Israel parjanjian dame tu halak Gibeon.—Jos. 9:3-27.
Nang pe naung leleng, marlakku dope parjanjian i sahat tu tikki ni Raja Saul. Alai dilanggar Raja Saul do parjanjian i, dipamate ibana do halak Gibeon. Alani i, gabe mardosa do si Saul dohot keluargana. (2 Sam. 21:1) Di pudian ni ari, gabe raja do si Daud. Ro ma halak Gibeon manjuppangi ibana. Jala didok halak i, sala do na dibahen si Saul i. Jadi disukkun si Daud ma, aha na ikkon dibahen ibana asa mardame nasida jala mandapot pasu-pasu ni Jahowa. Dang hepeng na dipangido halak Gibeon, alai dipangido nasida do asa dipamate pitu halak pinoppar ni si Saul, ‘na sai mangalului cara pamatehon nasida’. (4 Mus. 35:30, 31) Dioloi si Daud do pangidoan ni halak i.—2 Sam. 21:2-6.
Di tikki i, nungnga mate be si Saul dohot si Jonatan di parporangan. Alai, mangolu dope anak ni si Jonatan, i ma si Mepiboset. Pakpang do ibana sian na gelleng. Jala dang dohot ibana mendukung oppungna lao pamatehon halak Gibeon i. Nungnga marjanji hian si Daud tu sahabatna si Jonatan asa masihaholongan nasida. Alani i gabe dihaholongi si Daud do tong si Mepiboset anak ni si Jonatan. (1 Sam. 18:1; 20:42) Bibel mandok, “Asi do roha ni si Daud tu si Mepiboset, anak ni si Jonatan pahoppu ni si Saul. Ai adong do sumpa ni si Daud tu si Jonatan anak ni si Saul i di jolo ni Jahowa.”—2 Sam. 21:7.
Dioloi si Daud do pangidoan ni halak Gibeon i. Dipasahat ibana do tu halak Gibeon i, lima pahoppu dohot dua anak ni si Saul. Sada sian anakna na dipasahat i margoar si Mepiboset. (2 Sam. 21:8, 9) Alani tindakan ni si Daud i gabe dang berutang darah be halak Israel.
Dang holan sejarah on. Takkas do didok di patik ni Jahowa, “Dang boi sahalak anak dipamate alani pangalaho ni bapakna.” (5 Mus. 24:16) Seandaina dang dohot dua anak ni si Saul dohot lima pahoppuna i mendukung ibana lao pamatehon halak Gibeon, tottu dang setuju Jahowa molo dipamate halak i. Alana didok do muse di patik i, “Ganup halak dihukum mate alani dosana sandiri.” On patuduhon, dohot do halak i mendukung si Saul membantai halak Gibeon. Akibatna gabe marsala ma nasida jala ikkon dipamate.
Adong do na boi taparsiajari sian peristiwa on. Dang boi sasahalak membenarkan diri mangulahon na sala holan ala mangihutton paretta ni sasahalak. Alana ikkon bertanggung jawab do ibana tu tindakanna i. Bibel mandok, “Bolokkon ma akka na mangabbati dalanmu, asa hot akka lakkam. Unang ma manirpang ho tu kanan manang tu kiri. Mandao ma ho sian na jahat.”—Poda 4:24-27; Eps. 5:15.