Mulak Mangolu Anak ni Ina na Mabalu

Tikki masa dope musim kemarau, didok Jahowa ma tu si Elia, ‘Lao ma ho tu Sarpat. Adong do disi sahalak ina na mabalu na lao mangalehon ho mangan.’ Tikki di gerbang ni kota, diida si Elia ma sahalak ina na mabalu papunguhon soban. Dipangido ma aek tu borua i. Dung dilehon aek i, didok si Elia ma, ‘Lehon ma jo di au roti.’ Alai didok ina na mabalu i ma, ‘Dang adong rotikku. Holan saotik nai nama topung dohot miaknami. I pe holan di au dohot di anakku nama i.’ Didok si Elia ma, ‘Nungnga marjanji Jahowa, molo dibahen ho di au roti, dang na lao habis topung dohot miakmi sahat tu na ro udan.’

Alani i, lao ma ina na mabalu i tu jabuna jala dibahen ma roti di si Elia. Songon janji ni Jahowa, dang marna habis topung dohot miakna i. Torus do adong sipanganon ni nasida saleleng musim kemarau.

Alai dang sadia leleng, marsahit ma anak ni ina na mabalu i, dung i mate. Dipangido ina na mabalu i do asa diurupi si Elia ibana. Diabing si Elia ma anakna i, jala diboan tu loteng. Dipeakkon ma dakdanak i di podoman, jala martangiang ma si Elia. Didok ma, ‘Ale Jahowa, bahen ma mangolu muse dakdanak on.’ Pasti peristiwa na luar biasa do molo boi mangolu muse dakdanak i. Diboto ho do alasanna? Alana di tikki i, dang hea dope adong halak na mangolu muse dung mate. Jala ina na mabalu dohot anakna i pe dang halak Israel.

Di tikki i, mangolu ma muse dakdanak i! Didok si Elia ma tu ina na mabalu i, ‘Ida ma! Nungnga mangolu muse anakmi.’ Massai las ma rohana, jala didok ma tu si Elia, ‘Tutu do ho naposo ni Debata. Huboto ma, sian Jahowa do sude na nidokmi.’