Jerusalem Dihancurhon

Mulak-ulak do halak Juda dang setia tu Jahowa jala manomba patung. Saleleng martaon-taon, sai diurupi Jahowa do nasida. Disuru Ibana do godang nabi lao paingotton nasida, alai dang olo nasida manangihon. Sai diejek nasida do akka nabi i. Alani i, aha do na dibahen Jahowa tu patung dohot tu akka na manomba patung i?

Si Nebukadnesar do raja ni Babel. Ibana do raja na unjago sian bangso na asing. Parjolo sahali ibana menyerang Jerusalem, ditakkup do Raja Jehoyakin, akka pamimpin, akka tentara, dohot akka tukkang, jala diboan ma nasida tu Babel. Dibuat ibana do muse akka barang na arga sian bagas joro. Dung i, dibahen ibana ma si Sedekia gabe raja ni Juda.

Di mulana, dioloi si Sedekia do si Nebukadnesar. Alai dipengaruhi akka bangso na asing dohot akka nabi na jahat ma si Sedekia asa mangalo tu Babel. Dipasingot si Jeremia ma ibana, ‘Molo mangalo ho, masa ma kelaparan, sahit, jala godang ma na dipamate di Juda.’

Dung ualu taon, mangalo ma si Sedekia tu Babel. Dipangido ma tentara ni Mesir mangurupi ibana. Disuru si Nebukadnesar ma akka tentarana asa markemah di jonok ni Jerusalem lao manghancurhon kota i. Didok si Jeremia ma tu si Sedekia, ‘Didok Jahowa, molo menyerah ho tu Babel, dang pamateonna ho jala dang hancurhononna kota i. Alai molo mangalo ho, tutungon ni halak Babel ma Jerusalem jala ditakkup ma ho.’ Didok si Sedekia ma, ‘Dang olo au menyerah!’

Sada satonga taon dukkon i, ro ma muse tentara ni Babel tu Jerusalem jala ditutung ma kota i. Ditutung ma bagas joro, dipamate ma godang halak, jala adong marribu halak na ditakkup.

Lari ma si Sedekia sian Jerusalem, alai dikejar halak Babel do ibana. Ditakkup ma ibana di jonok ni Jeriko jala diboan tu si Nebukadnesar. Dipamate si Nebukadnesar ma akka anak ni si Sedekia di jolo ni si Sedekia. Dibahen raja i ma buta mata ni si Sedekia jala dipenjarahon ma ibana. Dung i mate ma ibana. Alai marjanji do Jahowa tu halak Juda, ‘Dukkon 70 taon, boanokku ma muse hamu mulak tu Jerusalem.’

Adong do akka na poso na diboan tu Babel. Aha do na lao terjadi tu nasida? Toktong do dioloi nasida Jahowa?