Surat sian Punguan na Mangaradoti Organisasi

Tu Akka Dongannami,

Ala sisomba Jahowa hita, tottu tahaholongi do Hatana, i ma Bibel. Pos do rohatta Bibel i marisi sejarah na sittong, akka nasehat na denggan, dohot akka bukti na patuduhon holong ni Jahowa tu akka jolma. (Psalmen 119:105; Lukas 1:3; 1 Johannes 4:19) Lomo do rohanami mangurupi akka dongan mamboto Hata ni Debata na adong di Bibel. Alani i, las rohanami paradehon bukku Marsiajar ma sian Bibel. On ma saotik hatorangan taringot bukku on.

Tu akka dakdanak do nian bukku on dibahen. Alai, marguna do tong bukku on tu halak naung dewasa na lomo rohana mamboto godang hatorangan taringot Bibel. Ala tu sude jolma do Bibel dibahen, sude do hita boi mandapot manfaat jala makkilala las ni roha molo taparsiajari isina.

Bukku on marisi cerita na dibuat sian Bibel. Dipaboa do di bukku on cerita taringot sejarah ni jolma mulai sian tikki baru ditoppa dope. Berurutan do dibahen hami akka cerita di bukku on, asa takkas jala mura diattusi akka na manjaha.

Alai dang holan paboahon cerita na sian Bibel isi ni bukku on. Dibahen do akka gambar dohot hatorangan na denggan, asa boi hita dohot makkilala perasaan ni akka halak na adong di cerita i.

Bukku on mangurupi hita mamboto akka cerita na di Bibel taringot halak na mangoloi Jahowa dohot na mangalo Ibana. Jala boi ma tadapot parsiajaran sian i. (Rom 15:4; 1 Korint 10:6) Adong 14 bagian di bukku on. Di awal ni setiap bagian, dibahen do ringkasan taringot aha na boi taparsiajari sian akka cerita di bagian i.

Hamu akka natua-tua, jahahon hamu ma sada parsiajaran sian bukku on tu gellengmuna jala bahas hamu ma akka gambarna. Dung i, rap ma hamu manjaha akka ayat na adong di parsiajaran i. Urupi ma gellengmuna mangattusi na sian Bibel do dibuat akka parsiajaran na di bukku on. Boi do dibahen hamu cara na sarupa tikki mangurupi halak naung dewasa mangattusi isi ni Bibel.

Anggiat ma bukku on boi mangurupi akka halak na tulus rohana, dang soal naung matua manang na poso, na lomo rohana lao mamboto Hata ni Debata jala mangulahon i di ngolu ni nasida. Ujungna, boi ma hita gabe keluarga ni Jahowa na marsada lao manomba Ibana.