Ulaon Marsiajar Bibel Tu Sude

Sitindangi Ni Jahowa ditanda alani ulaon marbarita na uli. Alai diboto hamu do hami pe ditanda ala patupahon ulaon parsiajaran Bibel di liat portibi on?

Di taon 2014, lobi sian 8.000.000 Sitindangi di 240 Negara mambahen hirahira 9.500.000 parsiajaran Bibel ganup bulan.a Boi dohonon, godang ni halak na marsiajar Bibel dohot hami lobi sian bilangan ni pangisi ni 140 negara!

Laho patupahon ulaon pangajarion on, ganup taon Sitindangi Ni Jahowa pabinsarhon hirahira sada satonga miliar Bibel, buku, majalah, dohot angka na asing na dipangke tu parsiajaran Bibel di bagasan 700 hata! Ndang adong be na boi tarpatudos tu ulaon marbarita on i ma manogihon halak marsiajar Bibel di hatana sandiri.

ALUS NI SUNGKUNSUNGKUN NA JOTJOT TARINGOT ULAON MARSIAJAR BIBEL NAMI

Songon dia do parsiajaran Bibel on dipatupa?

Boi tapillit na laho taparsiajari jala tapareso ayat ni Bibel na hombar tu parsiajaran i. Songon, Bibel mangalusi angka sungkunsungkun on: Ise do Debata? Songon dia do hadirionNa? Adong do goarNa? Didia Ibana Maringanan? Boi do jonok hita tu Ibana? Sungkunsungkun on manogihon hita asa mangalului alusna di Bibel.

Laho mangurupi halak mangalului alusna, somalna hita mamangke buku si 224 alaman i ma buku Apa yang Sebenarnya Alkitab Ajarkan?b Buku on denggan dipatupa tarlumobi laho mangurupi halak laho mangantusi aha na sasintongna diajarhon Bibel. Dohot ma i parsiajaran taringot Debata, Jesus Kristus, hasusaan ni jolma, haheheon, tangiang, dohot angka na asing dope.

Andigan jala didia do parsiajaran on boi diulahon?

Parsiajaran on boi diulahon di tingki dohot inganan na pas di hamu.

Sadia leleng do sahali marsiajar?

Na deba mangalehon tingkina sajom manang lobi ganup minggu marsiajar Bibel. Alai leleng ni parsiajaran Bibel on boi do diatur. Boi do dipahombar tu ulaon muna. Deba nai marsiajar holan 10 manang 15 minut ganup minggu.

Sadia do gararon parsiajaran on?

Parsiajaran dohot buku na laho diparsiajari ndang margarar. Sarupa ma on songon na nidok ni Jesus tu siseanna: ”Sibasabasa do i tu hamu, antong basabasahon hamu ma i.”​—Mateus 10:8.

Sahat tu andigan do parsiajaran on?

Boi udutanmu parsiajaran on saleleng olo hamu. Buku Apa yang Sebenarnya Alkitab Ajarkan? marisi 19 parsiajaran. Boi do ihuthononmu sasabagian manang sude parsiajaran i nasa na tolapmu.

Na ingkon gabe Sitindangi Ni Jahowa do Ahu?

Daong. Diargai hami do hak ni ganup halak manontuhon aha na laho dihaporseai. Sude na mandapot pangantusion sian Bibel saguru nasida boi mamillit hatorangan na diparsiajarina.

Didia do Ahu boi mandapot umgodang hatorangan?

Situs web jw.org paradehon hatorangan na tangkas taringot haporseaon dohot ulaon ni Sitindangi Ni Jahowa.

Songon dia do Ahu boi manjalo parsiajaran Bibel?

• Boi do pangidoonmu sian www.jw.org/id.

• Tongos hamu ma surat tu alamat na jonok tu ingananmu di alaman dua di majalah on.