Buku na Boi Taantusi

Bibel, sada buku naung leleng adong. Sadia leleng? Bibel mulai disurat di Timur Tengah hirahira 3.500 taon naung salpu. Dos ma on lelengna tu tingki ni Dinasti Shang sian Cina, hirahira sampulu abad andorang so adong dope agama Budha di India.​—Ida ma kotak ”Na Porlu Taboto Taringot Bibel”.

Molo buku on mangurupi jala marlaba tu parngoluon ni jolma, ingkon mura do antusan jala jotjot dipangke. Bibel sada buku na boi mangalehon alus ni angka sungkunsungkun na ringkot di parngoluan.

Umpamana, hea do sungkunsungkun rohamuna, ’Aha do na tinuju ni ngolu on?’ Nunga marribu taon, sungkunsungkun roha ni halak taringot on. Boi do dapot alus ni sungkunsungkun on di dua bindu na parjolo sian buku 1 Musa. Di Bibel, dipaboa do muse angka na tinompaNa songon galaksi, angka bintang, dohot tano on. (1 Musa 1:1) Dung i, dipaboa do songon dia tano on, ragam ni nasa na mangolu, dohot jolma ditompa. Dipatorang do muse aha na tinuju ni sude na tinompaNa.

DISURAT ASA BOI TAANTUSI

Bibel marisi angka poda na mangurupi hita mangadopi sitaonon ganup ari. Sude angka poda i mura do antusan. Taida ma on sian dua hatorangan na di toru on.

Na parjolo, bahasa na dipangke tangkas jala lomo roha manjaha. Godang do hata na so tangkas jala didok hahomion, alai Bibel ndang mamangke hata sisongon i. Hata na maol antusan pe, disurathon do marhite hata na somal tapangke siganup ari.

Umpamana, dipangke Jesus do tudosan na mura antusan mamangke aha na masa di ulaon siganup ari, jala parsiajaranna pe hona tu roha. Taida ma on di jamita na dipasahat di Dolok, na disurat di buku Mateus bindu 5 sahat tu 7. Digoari ma on ”jamita na mura antusan”. Dos ma on tu pandapot ni sasahalak na mandok, ”Buku on ndang holan marisi hatorangan sambing, alai isina marlaba do tu ngolunta siganup ari.” Boi ma jahaonmu jamita on di bagasan 15 sahat tu 20 minut, jala botoonmuna ma na mura do antusan hata ni Jesus i.

Na asing, na mambahen Bibel mura antusan, i ma tarida sian aha na diulas. Buku on ndang songon buku dongeng na marisi turiturian. Alai, The World Book Encyclopedia paboahon molo isi ni Bibel, i ma taringot halak na marsitutu manomba Jahowa jala marpangkirimon nang pe sipata mangulahon hasalaan, alai marsihohot do nasida. On mambahen hita mura mangantusi isi ni Bibel, ala masa do di parngoluonta jala parsiajaranna marlaba tu hita.​—Rom 15:4.

DIPARADE TU SUDE

Asa mura taantusi isi ni sada buku, ingkon dibahen do tu bahasa na mura antusan. Songon i ma nang Bibel, nunga diparade tu bahasa na taantusi. Didia pe hita maringanan jala bahasa aha pe na tapangke, Bibel nunga rade di bahasa na taantusi. Taparrohahon ma pigapiga na mambahen on boi diparade.

Penerjemahan. Bibel na parjolo sahali, disurat di bahasa Heber, Aram dohot Junani. Alani i, holan saotik do halak na mangantusi isi ni Bibel. Marsitutu do angka penerjemah laho paradehon Bibel on tu bahasa na asing. Mandok mauliate ma hita tu nasida ala saonari nunga diterjemahon Bibel na lengkap dohot na sasabagian di bagasan 2.700 bahasa. Sian on taboto ma, nunga lobi sian 90 persen jolma manjaha Bibel, jala godang sian i di bahasa ni nasida sandiri.

Pasarhon Bibel. Teks ni Bibel na parjolo sahali, disurathon tu lampak ni hau manang tu papirus na mura sega. Alani i, asa unang adong na mago barita na sian salinan i, manat ma angka panurat manerjemahon mamangke tangan. Di tingki i, arga do percetakan jala holan pigapiga halak do na boi mandapot on. Alai, dung adong percetakan Gutenberg 550 taon na salpu, lam godang ma Bibel dicetak dohot disarhon. Mangihuthon sada hatorangan, nunga dicetak jala disarhon lobi sian lima miliar Bibel na lengkap dohot na sasabagian.

Ndang adong buku na asing na boi dipatudos tu Bibel. Tangkas ma molo Bibel, buku na boi diantusi. Sipata ndang mura mangantusi isi ni Bibel, alai diparade do pangurupion. Didia do hamu boi mandapot on? Jala songon dia do on marlaba tu hamu? Ida ma di artikel na mangihut.