Sarito na Ringkot

Ndang adong buku ni angka agama na songon Bibel. Disurat do di Bibel taringot haporseaon ni angka halak na mangolu di tingki naung salpu. Ndang adong buku sisongon on, na disulingkiti jala dikritik godang halak.

Umpamana, pigapiga sarjana mandok Bibel na adong saonari marimbar sian Bibel na parjolo. Sahalak profesor na manulingkiti taringot agama mandok, ”Ndang porsea hami molo Bibel na adong saonari disurat songon teks na parjolo. Godang do na sala di terjemahan i, jala Bibel na adong saonari disurat marratus taon dungkon Bibel na parjolo.”

Na asing ndang porsea tu isi ni Bibel alani agamanasida. Songon si Faizal, dipaboa keluargana na so halak Kristen tu ibana, nang pe Bibel i buku na badia, alai nunga muba isina. Ibana mandok, ”Ujungna, ndang porsea be ahu tu hata ni halak na manogihon ahu mangulas isi ni Bibel, alana ndang adong Bibel na parjolo di nasida. Nunga muba isi ni Bibel.”

Adong do pangkorhonna molo muba terjemahan ni Bibel? Tarimangi ma sungkunsungkun on. Molo ndang disurat janji taringot ari na naeng ro di Bibel na parjolo, porsea do hamu na laho masa i haduan? (Rom 15:4) Molo jolma do na manalin Bibel na adong saonari, pos do rohamuna mangihuthon prinsip ni Bibel tingki mamillit taringot parkarejoan, keluarga, manang panombaon?

Nang pe ndang adong be Bibel na parjolo, alai boi do tasulingkiti angka salinan najolo, songon marribu manuskrip ni Bibel. Songon dia do angka manuskrip on dilinggomi asa unang sega, dilinggomi sian paraloan dohot halak na marsangkap manguba isina? Songon dia do on paposhon rohanta, molo Bibel na adong saonari on sintong? Parrohahon ma alusna sian artikel na mangihut.