Tingki Ndang Setia be Dongan Saripe

“Tingki didok suamikku tinggalhononna nama ahu alani borua na umposo, gabe naeng mate ma huhilala. Didok rohangku ndang adil on, tarlumobi molo huingot pengorbanan na hubahen tu ibana.”—Si Maria, sian Spanyol.

“Tompu ma ahu ditinggalhon istrikku, hira naeng mate ma huhilala. Hancur ma sude naung direncanahon hami. Sipata nunga lupa ahu tu na masa i, alai olo do muse tompu huingot, gabe lungun ma rohangku.”—Si Bill, sian Spanyol.

ADONG do na mamillit ndang manirangkon dongan saripena na so setia ala marhamubaon dongan saripena i jala marsitutu padengganhon parsaripeon ni nasida.a Alai, marsirang manang na ndang, tongtong do hansit roha ni sasahalak molo ndang setia dongan saripena. Alani i, aha do na boi diulahon sasahalak molo hansit rohana ala ndang setia dongan saripena?

AYAT NI BIBEL NA BOI MANGURUPI

Godang do dongan saripe na so marsala diapuli marhite angka ayat ni Bibel tingki lungun roha ni nasida. Diboto nasida ma na diantusi Debata do pangkilalaan ni nasida i.—Maleaki 2:13-16.

“Di na sai ganggu jala susa ahu, dibahen Ho do las ni rohangku.”—Psalmen 94:19, Bibel siganup ari.

Didok si Bill, “Dung hujaha ayat on, boi ma hubayangkon songon dia Jahowa paposhon rohangku songon sahalak ama na parholong.”

“Satia do Ho tu angka na satia tu Ho.”—Psalmen 18:26, Bibel siganup ari.

Didok si Carmen, “Ndang setia suamikku saleleng marbulan-bulan. Alai porsea do ahu, setia do Jahowa tu ahu. Ndang tinggalhononna ahu.”

“Unang ma holsohon hamu manang aha, alai pangido hamu ma saluhutna tu Debata marhite tangiang dohot elek-elek. . . . Asa marhite Kristus Jesus, lehonon ni Debata ma tu hamu hadameon na so boi diantusi jolma, na boi manjaga roha dohot pingkiranmuna.”—Pilippi 4:6, 7.

Didok si Sasha, “Sai mulak-ulak do hujaha ayat on. Jala sai torus do ahu martangiang. Dilehon Debata ma tu ahu hadameon ni roha.”

Angka halak na dipaboa pengalamanna dison, hea do mangkilala ndang marlapatan be ngoluna. Alai pos do roha ni nasida tu Jahowa jala boi do nasida togu ala manjaha Bibel. Didok si Bill, “Alani haporseaonku, gabe adong ma tujuan ni ngolungku nang pe mansai hansit huhilala. Nang pe mardalan ahu ‘di dalan na mansai golap’, sai didongani Debata do ahu.”—Psalmen 23:4, Bibel siganup ari.

a Laho mandapot hatorangan taringot mamillit marsirang manang na ndang, ida ma di Sedarlah! 22 April 1999, “Bila Teman Hidup Berselingkuh.”

Na Boi Mangurupi Hamu Asa Unang Mandele

Mangarimangi ayat ni Bibel na boi mangapuli.

Didok si Bill, “Hujaha ma buku Job dohot Psalmen. Dung i, hubahen ma tanda di bagian na hira sarupa dohot na huadopi. Gabe huboto ma, angka halak na disurat di Bibel pe hea do mangkilala lungun ni roha songon na huhilala.”

Mambege musik.

Didok si Carmen, “Molo ndang boi ahu modom, hubege ma musik. Gabe lumbang ma pangkilalaanku.” Didok si Daniel, “Marsiajar margitar ma ahu jala dame ma pangkilalaanku tingki hubege musik sian soara ni gitar i.”

Paboa ma pangkilalaanmuna.

Didok si Daniel, “Sasintongna, maol do ahu paboahon pangkilalaanku tu na asing. Alai, adong do angka donganku na burju, jala ganup ari do ahu mangkatai dohot nasida. Hupaboa ma pangkilalaanku tu nasida marhite surat manang langsung mangkatai tu nasida. Diurupi nasida do ahu.” Si Sasha mandok, “Mansai ringkot do asa diurupi keluarga. Sai diparrohahon omakku do ahu. Molo adong naeng hupaboa, rade do ibana manangihon. Bapakku pe, sabar do mangurupi ahu jala huhilala do holong ni rohana tu ahu.”

Tongtong ma martangiang.

Didok si Carmen, “Sai martangiang do ahu. Jala huhilala do ndang hea ditinggalhon Debata ahu. Ditangihon do ahu jala diurupi. Nang pe mangadopi hasusaan, lam jonok do ahu tu Debata.”