Lam tu Dengganna Marbarita—Mangurupi Parsiajar Bibel laho Marbarita

Boasa Ringkot: Halak na gabe sisean ni Jesus ingkon mamparrohahon “nasa hata” na diparentahon ni Jesus, dohot ma i mangajarhon hasintongan tu na asing. (Mateus 28:19, 20) Godang do parsiajar Bibel boi dapot Singkola Panghobasion Teokratis jala nasida nunga marbarita tu keluarga dohot tu angka donganna. Alai, porlu do diantusi nasida na lomo do roha ni Jahowa asa sude halak manangihon barita na uli, asa taronjar roha nasida mangulahon i. (Rom 10:13, 14) Dung boi sahalak parsiajar Bibel gabe penyiar na so tardidi, dihaporluhon nasida do pangajarion na denggan. Lam marpos ni roha ma nasida laho marbarita jala boi mambahen hamajuon di partondion.—Lukas 6:40.

Songon dia Mangulahon:

Urupi ma penyiar na baru paradehon buku na dihaporluhon tingki marbarita dohot mangajar. Patudu ma tu nasida songon dia hamu marbarita, jala aha na tinuju ni ganup buku.
Rap ma hamu mamparsiajari presentasi sitiruon na adong di Panghobasion Harajaonta. Jujui ma ibana mambahen presentasi mamangke hatana sandiri. Parsiajari hamu ma buku Sekolah Pelayanan alaman 82, jala ida ma dia na pas di luatmuna. Patorang ma ringkot do marpahean na denggan tingki marbarita.—2 Korint 6:3, 4.
Bahen ma pangajarion na denggan. Patudu ma tu ibana kartu daerah, jala paboa ma songon dia mamangke i tingki marbarita sian jabu tu jabu. Paboa ma songon dia asa dijangkon parjabu. Ajari ma ibana mamangke buku Kabar Baik Bagi Orang-Orang dari Segala Bangsa dohot jw.org. Jala paboa ma songon dia mangurupi halak na olo manjangkon.—1 Korint 3:6.
Sabar ma mangurupi jala puji ma nasida. (Poda 25:11) Lehon ma sitiruon na denggan. Molo burju jala marhiras ni roha hamu mangurupi ibana marbarita, on marpangkorhon tu ibana.

Ulahon ma On Saleleng Sabulan:

Marbarita ma hamu sian jabu tu jabu dohot parsiajar Bibelmuna jala togihon ma ibana laho manjumpangi muse. Togihon ma ibana tu parsiajar Bibelmuna na asing. Molo ndang adong parsiajar Bibelmuna na laho urupanmuna, togihon ma penyiar na so marpengalaman rap marbarita dohot hamu.