Mangajar Mamangke Buku Barita na Uli
1. Songon dia do buku Barita na Uli dipatupa?
1 Songon na diulas di Panghobasion Harajaonta bulan Juli, sada alat na denggan laho tapangke mangajar, i ma buku Barita na Uli sian Debata! Ndang sae holan mangenet sada ayat alai, tajahahon ma asa boi parjabu mangida sandiri sian Bibel. Godang do buku parsiajaran dipatupa asa boi diparsiajari sandiri alai, buku Barita na Uli dipatupa laho diulas rap dohot sahalak parbarita. Alani i, tingki talehon buku on, tapatudu ma tu parjabu songon dia marsiajar Bibel mamangke buku on.—Mat. 13:44.
2. Songon dia do mamangke buku Barita na Uli tingki marbarita?
2 Tingki Marbarita: Dokkon ma, ”Las rohanami manjumpangi jolma ala godang halak sungkunsungkun tu na masa di ari na naeng ro. Molo pandapotmuna, lam tu dengganna do portibi on? [Tangihon ma alusna.] Disurat do di Bibel pangkirimon na denggan tu hita. Di buku on, adong sungkunsungkun na boi dapot alusna sian Bibel.” Lehon ma tu parjabu buku i. Jala pangido ma tu ibana asa dipillit sada sungkunsungkun na adong di alaman parpudi. Dung i, ulas ma paragraf na parjolo sian parsiajaran na dipillitna. Na asing, pillit ma sada sungkunsungkun sian buku i, jala patudu ma tu parjabu songon dia buku i mangurupi nasida mandapot alus sian Bibel. Molo adong do video di jw.org na pas tu parsiajaran i, boi do patuduhononmu tu nasida.
3. Patorang ma songon dia mamungka parsiajaran mamangke buku Barita na Uli.
3 Isara Mamungka Parsiajaran: (1) Jaha ma sungkunsungkun na dicetak tebal mangihuthon nomorna, na mangurupi parjabu mangantusi na diulas di paragraf. (2) Jaha ma paragraf na di toru ni sungkunsungkun. (3) Jaha ma ayat na dicetak miring dung i, bahen ma sungkunsungkun na mangurupi parjabu mangida alusna sian ayat na dijahahon i. (4) Molo lobi sian sada paragraf di toru ni sungkunsungkun i, ulangi ma isara nomor 2 dohot 3. Patudu ma video molo adong na pas tu sungkunsungkun i, jala ndang hea dope ditonton parjabu. (5) Di ujung ni parsiajaran, pangido ma alus ni parjabu taringot sungkunsungkun na dicetak tebal, asa taboto na diantusi do manang ndang.
4. Aha do na mangurupi hita asa denggan mamangke alat on?
4 Parsiajari ma mamangke alat na denggan on. Jotjot ma pangke tingki marbarita. Andorang so marsiajar, pingkirhon jala parade ma aha na ringkot tu parsiajar Bibelmuna, pangke ma ayat na adong di parsiajaran i. (Poda 15:28; Ul. 17:2, 3) Molo lam marpengalaman jala lam denggan hamu mamangke buku on, lam lomo ma rohamu mangajarhon hasintongan!