**Lam tu Dengganna Marbarita—Pasahathon buku Na Diajarhon Bibel**

Boasa Ringkot: Buku Na Diajarhon Bibel sada alat na denggan tapangke marbarita na uli. Alai, andorang so taparsiajari buku on dohot sasahalak, parjolo sahali ingkon talehon do tu nasida buku on. Alani i, porlu ma hita denggan pasahathon buku Na Diajarhon Bibel tingki marbarita. (Poda 22:29) Taparrohahon ma pigapiga isara na denggan ulahonon ni parbarita tingki pasahathon buku on.

Songon dia Mangulahon:

Bahen ma sungkunsungkun na denggan tu parjabu, na alusna adong di sada pasal sian buku i. Boi do pillitonmu sada sian sungkunsungkun na adong di mula ni pasal di buku i. Dung i, tangihon ma alus ni parjabu, jahahon ma ayat laos patudu ma sada paragraf sian buku i na mangulas alus ni sungkunsungkun. Molo boi rap ma hamu mangulas paragraf i.
Isara na asing, i ma mamangke hata pamungka na adong di alaman 3. Patudu ma tu parjabu songon dia buku on mangurupi nasida mandapot alus sian Bibel. Umpamana, boi do tapaboa barita na baru masa jala tapaboa ma pigapiga sungkunsungkun na adong di halaman 3. Manang, boi do dohononmuna molo hamu ro laho pasahathon barita na uli taringot ari na naeng ro. Dung i, patudu ma gombar di alaman 4-5 jala sungkun ma, ”Janji na dia do na hirim rohamuna laho masa?” Ra, boi do muse dohononmuna molo hamu ro laho mangurupi halak mandapot alus ni sungkunsungkun taringot hangoluan sian Bibel. Dung i, patudu ma tu parjabu sungkunsungkun na adong di halaman 6, jala pangido ma asa dipillit sada sian sungkunsungkun i, na laho botoon ni nasida alusna.
Paboa ma molo hamu naeng mangurupi nasida marsiajar Bibel. Dokkon ma, ”Las rohanami mangurupi angka dongan marsiajar Bibel. Lomo do rohamuna naeng mangantusi isi ni Bibel? [Tangihon ma alusna.] Molo rade hamu, las do rohangku patuduhon hasintongan mamangke buku on dohot Bibelmuna sandiri.”

Ulahon ma On Saleleng Sabulan:

Latik ma isara on di panombaon na sasaripemuna.
Tingki marbarita, paboa ma tu donganmuna songon dia hamu pasahathon buku on. (Poda 27:17) Pauba ma presentasimuna i molo ndag marhasil.