Dilean Nasida do Biskuit tu Anjingku

“Alai dang holan tu akka halak na lewat Saksi Jahowa i burju, tu binatang pe burju do nasida. Misalna burju do halak i tu anjingku. Sada tikki, adong ma Saksi Jahowa na manjaga rak beroda i na margoar si Elaine, mangalean biskuit tu anjingku. Jadi tiap lewat hami sian tempat i, pittor lao do anjingki tu Saksi na disi, ala diboto pasti dapotna do biskuit sian i.

“Marbulan-bulan dukkon i sai hulewati dope tempat i. Jala Saksi Jahowa i pe sai dilehon do biskuit tu anjingku. Alai dang pola lomo dope rohakku leleng makkatai tu nasida. Nungnga 70 taon lobi umurhu tikki i. Jala saleleng on dang pola tertarik au tu ajaran ni Saksi Jahowa. Alana hea do au kecewa tu gareja Protestan. Jadi didok rohakku, tumagon ma huparsiajari sandiri isi ni Bibel.

“Jotjot do huida Saksi Jahowa manjaga rak beroda di inganan na marasing-asing di kota on. Sai ramah do nasida. Molo adong sukkun-sukkunku, sian Bibel do dialusi nasida. Alani i, mulai ma au tertarik tu na diajarhon nasida.

“Sada tikki disukkun si Elaine ma tu au, ‘Porsea do hamu molo binatang i hadiah sian Debata?’ Hualusi ma, ‘Ido, menuruthu songon i do.’ Dung i, dijahahon si Elaine ma Jesaya 11:6-9. Mulai sian i, gabe tertarik ma au naeng marsiajar Bibel. Alai dang olo dope au manjalo publikasi manang aha pe sian nasida.

“Dukkon i lam jotjot ma au diskusi taringot Bibel tu si Elaine dohot suamina si Brent. Didok nasida ma asa hujaha bukku Mateus sahat tu bukku Ulaon ni Apostel, lao mamboto songon dia do sasittongna halak Kristen i. Hujaha do i. Dang leleng dukkon i, di parsitongaan ni taon 2016 marsiajar Bibel ma au tu si Brent dohot si Elaine.

“Ala nga lam hunikmati na marsiajar Bibel i, gabe sai tarpaima do au marsiajar tiap minggu jala marpungu tu Bale Harajaon. Dung marsiajar Bibel au, tamba do las ni rohakku. Hira-hira sataon dukkon i, tardidi ma au. Saonari nga 79 taon umurhu. Jala pos situtu do rohakku, on do hasittongan. Las hian do rohakku boi gabe bagian sian keluarga ni Jahowa.”