Marbarita na Uli tu “Saluhut Bangso” Mamakke Rak Beroda

Lobi sian sappulu taon, rak beroda nungnga dipakke tu ulaon marbarita, jala godang halak na tertarik mangida isina. Di liat portibi on, diboto halak do molo rak beroda on, i ma ulaon ni Saksi Jahowa. Sederhana do modelna jala mura dipakke. Setuju do ra hamu tu donganta borua di Polandia na margoar si Asenata. Didok ibana, “Nang pe sederhana rak beroda on, alai menarik do idaon. Mura muse dipapinda manang tudia pe.”

Songon dia do rak beroda on dibahen?

Model na Denggan

Di taon 2001, disetujui Punguan na Mangaradoti Organisasi do akka dongan di Prancis mencoba piga-piga cara lao mambahen kesaksian di tempat umum. Termasuk ma mamakke rak beroda. Dicoba nasida ma piga-piga model rak beroda. Umpamana dipakke nasida do rak beroda na songon koper dohot keranjang belanja. Disusun nasida ma disi akka bukku dohot majalah. Ujungna, adong ma sada model rak beroda na dipillit kantor cabang Prancis, jala i ma na dipakke akka donganta saleleng martaon-taon.

Las do roha ni akka donganta na di Prancis i taringot hasil ni kesaksian umum na dicoba nasida. Jadi di taon 2011, disetujui Punguan na Mangaradoti Organisasi ma rak beroda dohot meja, dipakke tikki mambahen kesaksian umum di New York City, Amerika Serikat. Akka perintis na parsidohot tu ulaon i paboahon godang manfaat na didapot nasida sian cara on, termasuk ma ala mura dipapinda nasida rak beroda i. Dipaboa nasida do muse piga-piga pandapot asa lam tu dengganna do rak beroda i. Model na sebelumna, sian hau do dibahen, jadi borat do tikki diboan, jala maol do dipapinda. Alani i, dibahen nasida ma asa ringan rak i, jala tetap hot nang pe adong alogo. Akka rodana i pe digatti do dohot na umbalga asa boi denggan mardalan di dalan na so rata. Dibahen do muse kotak na gelleng lao manippan akka bukku dohot majalah.

Marhasil do uji coba na dibahen akka donganta i. Jadi di taon 2012, disetujui Punguan na Mangaradoti Organisasi ma rak beroda on dipakke di ulaon marbarita di liat portibi on. Dapot ma sada pabrik na boi mambahen rak beroda on jala dibahen ma i sian bahan na ringan jala dang mura sega.

Saleleng martaon-martaon dibahen ma piga-piga perubahan asa lam tu dengganna do rak beroda i. Misalna, di taon 2015, dibahen ma plastik lao manutup rak i asa dang hona udan. Donganta si Dina sian Georgia mandok, “Saonari, nga hira adong ‘mantel udan’ ni rak on. Jadi molo ro udan, aman do akka bukku dohot majalahta.” Di taon 2017, dibahen ma muse poster magnet jala dicetak do i di piga-piga bahasa. Donganta bawa na margoar si Tomasz sian Polandia mandok, “Maol do manggatti poster na holan dilokkotton mamakke lem. Jadi undenggan do molo mamakke poster magnet.” Di taon 2019, adong dope perubahan na dibahen taringot tu bahan dohot proses pembuatan ni rak i asa dang mura sega.

Songon Dia Rak Beroda On Dipesan

Dipillit do sada pabrik lao mambahen rak beroda on jala dikirim do i tu liat portibi on. Saonari, arga ni sada rak beroda 43 dolar AS (hira-hira 650 ribu rupiah), jala nga termasuk disi ongkos kirim dohot biaya na asing. Sahat tu saonari, nungnga lobi sian 16 juta dolar AS (hira-hira 245 milliar rupiah) na dipakaluar lao mambahen rak beroda, jala nungnga dikirim lobi sian 420.000 rak beroda tu akka huria na adong di liat portibi on.

Asa boi denggan dipakke hepeng na disumbangkon i, pittor godang do dipesan organisasi rak beroda i. Jala akka huria pe saonari boi memesan spare part manang bagian sian rak beroda i na porlu dipadenggan. Alana dumenggan do molo na sega i diperbaiki daripada pittor digatti.

Mamakke Rak Beroda Tikki Marbarita

Las do roha ni akka parbarita di liat portibi on mamakke rak beroda on. Donganta si Martina sian Ghana mandok, “Di godangan ulaon marbarita, hita do na manjuppangi halak. Alai na mambahen las rohakku tikki mamakke rak beroda, gabe halak do na manjuppangi hita. Haru halak na lewat pe boi do gabe mamboto taringot ulaonta.”‏

Sahalak bawa di Afrika manjuppangi donganta na manjaga rak beroda jala dibuat ibana ma akka bukku di bahasa na dipakke ibana. Dukkon saminggu, ro do muse ibana jala mandok, “Nungnga hujaha be sude bukku na hujalo i. Denggan hian do isina. Jadi hupaboa ma on tu keluargakku di huta.” Hapena 500 kilometer do daona hutana i. Dua bulan na mangihut, ro muse ibana tu rak berodanta jala mandok, “Nungnga dijaha akka halak di hutakku be sude bukku i, jala las hian do roha ni nasida tu isina. Lomo do roha ni nasida gabe Saksi Jahowa. Alai adong dope sukkun-sukkun ni nasida. Umpamana, diboto nasida do tikki tardidi, ikkon dibonompon do sasahalak tu aek. Alai dang adong sunge na jonok di hutanami. Ikkon lao tuson do hami asa boi dididi?” Dilehon akka donganta ma alamat ni bawa on tu sada perintis na boi makkatai di bahasana. Jala nungnga taratur be ibana saonari marsiajar Bibel.

Las hian do roha mangida rak beroda on dipakke lao mamaritahon “barita na uli taringot tu Harajaon i di liat portibi on, asa saluhut bangso mambege barita i”. (Mateus 24:14) Sian dia do biaya lao mambahen rak beroda on? Sian sumbangan tu pekerjaan seluas dunia, jala godangan sian sumbangan i dikirim melalui donate.jw.org. Mauliate godang ma dipasahat hami tu hamu ala dilehon hamu sumbanganmuna.