Na Diihutton Godang Halak

Hampir sude do halak setuju sala do mambunu, memperkosa, dohot mangulahon pelecehan seks tu dakdanak. Jala denggan do molo burju, adil, jala marasi ni roha tu halak na asing. Alai godang do halak na so sarupa pandanganna taringot seks, pangalaho na jujur, manang taringot mandidik gelleng. Menurut nasida keputusan aha pe na dibahen denggan do i sude. Jotjot do muse halak holan mangihutton pikkiran dohot perasaanna tikki mambahen keputusan. Jala adong do tong na holan mangihutton pandapot ni halak na asing. Memang denggan do molo songon i?

MANGIHUTTON PERASAAN

Tikki naeng manottuhon dia do na sittong dohot na sala, godang do halak na holan mangihutton perasaanna manang panggora ni rohana. (Rom 2:​14, 15) Tikki dakdanak hita pasti taboto do dia na so adil jala merasa bersalah do hita molo taulahon na sala. Dung lam balga hita taboto ma muse dia na sittong dohot na sala sian keluarga, dongan sebaya, guru, lingkungan, agama, dohot kebudayaan. Jala boi do on mempengaruhi panggora ni rohatta. Dung i tikki mambahen keputusan hita, paboaon ni panggora ni roha i ma sittong do keputusanta i manang na dang.

Boi do muse panggora ni roha i mangurupi hita asa sapakkilalaan, adil, marasi ni roha, jala mangargai halak na asing. Boi do tong i paingotton hita asa unang taulahon na sala na boi mambahen hita maila, merasa bersalah, jala mambahen haccit roha ni halak.

Denggan do molo holan mangihutton perasaan? Ala poso dope si Garrick, diulahon ibana do sude na denggan di rohana. Didok ibana, “Huulahon do sude lomo ni rohakku.” Alai dang gabe marlas ni roha ibana ala diulahon i sude. Didok ibana justru gabe hancur do ngoluna, alana gabe mangulahon seks na so patut do ibana, marnarkoba, mabuk-mabuk, jala godang nai dope na jahat na diulahon ibana.

MANGIHUTTON PANDANGAN NI HALAK

Asing ni mangihutton perasaanta, jotjot do hita mangihutton pandangan manang pandapot ni halak tikki naeng mambahen keputusan. Tarlumobi molo nungnga godang pengalaman dohot parbinotoan ni nasida. Jala molo taihutton pandangan ni keluargatta, donganta, dohot akka halak di lingkunganta, gabe las ma roha ni nasida mangida hita.

Denggan do molo holan mangihutton pandangan ni halak? Ala poso dope si Priscila, gabe tarihut-ihut do ibana tu dongan saumuranna jala diulahon ibana ma seks na so patut. Didok akka donganna dang sala na diulahonna i. Alai dang gabe las rohana mangulahon i. Didok ibana, “Gabe susa do au ala mangihutton akka donganku. Oto do huhilala molo olo hita dipengaruhi akka donganta jala parohon bahaya do i tu hita.”

SONGON DIA DO CARA NA SITTONG LAO MAMBAHEN KEPUTUSAN?

Tikki naeng mambahen keputusan, dang sala memang molo taihutton perasaanta dohot pandangan ni halak. Alai belum tentu denggan hasilna molo holan i na taihutton. Alana molo holan mangihutton perasaanta dohot pandangan ni halak do hita, biasana dang jolo manat tapikkiri akibat ni keputusanta i tu diritta dohot tu halak. (Poda 14:12) Asing ni i, boi do muba perasaanta dohot pandangan ni halak tu keputusan naung tabahen. Jala taingot ma ikkon manat do hita tikki naeng mangihutton pandangan ni halak. Alana muba-uba do pandangan ni halak taringot na sittong dohot na sala.

Jadi songon dia do cara na sittong tikki naeng mambahen keputusan? Adong do petunjuk terbaik na boi taihutton jala dang na lao muba i salelengna?

Adong do petunjuk terbaik na boi diihutton sude halak manang na didia pe. Di artikel na mangihut lao tabahas ma sian dia do boi tadapot petunjuk i.