Boasa Penting Mangido Nasehat?

1. Aha do na boi mangurupi hita asa denggan mambahen keputusan, jala asa berhasil akka rencanatta? (Poda 13:10; 15:22)

LOMO do rohatta mambahen keputusan na denggan. Jala lomo do tong rohatta asa berhasil akka rencanatta. Di Bibel adong do dipaboa boha carana lao mangulahon i.—Jaha Poda 13:10; 15:22.

2. Aha do janji ni Jahowa tu hita?

² Holan Jahowa do na boi mangalehon nasehat na terbaik tu hita. Jala marjanji do Ibana, “Lehonokku ma poda tu ho jala parrohahonokku do ho.” (Ps. 32:8) Sian on gabe pos ma rohatta, pasti lehonon ni Jahowa do nasehat na tahaporluhon jala urupanna do hita mangulahon i.

3. Aha do na lao tabahas di artikel on?

³ Di artikel on lao tabahas ma alus ni opat sukkun-sukkun on, jala alusna adong di Bibel. (1) Asa boi dapottu manfaat sian nasehat na hujalo, sifat aha do na porlu adong di au? (2) Ise do na cocok mangalehon nasehat tu au? (3) Boha do carana asa tulus rohakku tikki mangido nasehat? (4) Denggan do molo halak na asing na mambahen keputusan di au?

SIFAT AHA DO NA PORLU ADONG DI AU?

4. Asa boi tadapot manfaat sian nasehat na tajalo, sifat aha do na ikkon adong di hita?

⁴ Asa boi tadapot manfaat sian nasehat na tajalo, ikkon serep do rohatta. Ikkon tasadari do na porlu hita diurupi asa boi tabahen keputusan na denggan. Tarlumobi molo dang hea dope taadopi situasi sisongon i. Jala ikkon tasadari do dang sai sude dope taboto. Molo dang serep rohatta, dang olo Jahowa mangurupi hita. Akibatna tikki tajaha nasehat ni Jahowa di Bibel, gabe didok rohatta ma dang tu hita i jala dang porlu taulahon. (Mik. 6:8; 1 Ptr. 5:5) Alai molo serep rohatta, pasti tajalo do nasehat i jala taulahon.

5. Aha do hira-hira na boi mambahen gabe ginjang roha ni si Daud?

⁵ Marsiajar ma hita sian pengalaman ni Raja Daud. Godang do ulaon na denggan na diulahon ibana. Misalna martaon-taon andorang so dipillit Jahowa ibana gabe raja, ditanda do ibana sahalak parmusik na jago. Bahkan hea do ibana disuru asa marmusik di jolo ni raja. (1 Sam. 16:​18, 19) Dung gabe raja si Daud, dilehon Jahowa ma tondi parbadia tu ibana. Gabe halak na gogo ma ibana. (1 Sam. 16:​11-13) Terkenal do si Daud ala boi manaluhon musu ni halak Israel, termasuk ma i si Goliat, halak Palistim i. (1 Sam. 17:​37, 50; 18:7) Biasana halak na jotjot berhasil mangulahon akka ulaon na denggan, olo do gabe ginjang rohana jala dang olo manjalo nasehat. Alai molo si Daud dang songon i. Serep do rohana.

6. Sian dia do taboto na lomo roha ni si Daud manangihon nasehat? (Ida sampul.)

⁶ Dung gabe raja si Daud, mardongan do ibana tu akka halak na boi mangalehon nasehat na denggan tu ibana. (1 Kron. 27:​32-34) Andorang so gabe raja pe ibana, lomo do rohana manangihon nasehat. Bahkan olo do ibana manangihon nasehat sian borua. Misalna, sian si Abigail. Istri ni si Nabal do si Abigail on. Ginjang do roha ni si Nabal, dang diboto mandok mauliate, jala dang mangargai halak na asing. Alai molo si Daud, serep do rohana. Olo do ibana manangihon nasehat sian si Abigail. Hasilna dang diulahon si Daud kesalahan na serius.—1 Sam. 25:​2, 3, 21-25, 32-34.

7. Parsiajaran aha do na dapotta sian si Daud? (Parjamita 4:13) (Ida gambar.)

⁷ Adong do piga-piga parsiajaran na dapotta sian si Daud. Misalna adong do ra keterampilanta manang unggodang do ra pengalamanta sian halak na asing. Alai unang ma alani sudena i gabe didok rohatta dang porlu be di hita nasehat. Songon si Daud, olo ma hita manangihon nasehat, dang soal ise na mangalehon i tu hita. (Jaha Parjamita 4:13.) Molo taulahon i, olo do ra dang taulahon kesalahan na serius, na parohon masalah tu hita dohot tu na asing.

ISE DO NA COCOK MANGALEHON NASEHAT TU AU?

8. Boasa cocok si Jonatan na mangalehon nasehat tu si Daud?

⁸ Adong dope parsiajaran na boi dapotta sian si Daud. Dipangido ibana do nasehat sian akka halak na togu hubunganna tu Jahowa. Alai dang holan i. Akka halak na mangalehon nasehat i pe, ikkon diboto do situasi na diadopi si Daud. Contohna lao mamboto boi dope dipadenggan si Daud hubunganna tu Raja Saul manang na dang, dipangido ibana do nasehat sian si Jonatan, anak ni si Saul. Boasa cocok si Jonatan na mangalehon nasehat tu si Daud? Alana togu do hubungan ni si Jonatan tu Jahowa. Alai dang holan i. Diboto si Jonatan do situasina jala takkas do ditanda ibana songon dia bapakna, si Saul. (1 Sam. 20:​9-13) Aha do parsiajaranna tu hita saonari?

9. Molo naeng mangido nasehat, ise do tasukkun? Bahen ma contoh. (Poda 13:20)

⁹ Molo naeng mangido nasehat, tasukkun ma donganta na togu hubunganna tu Jahowa jala na mamboto situasitta.a (Jaha Poda 13:20.) Misalna adong ma sahalak donganta bawa na naeng mangalului dongan saripe. Ise do na cocok mangalehon nasehat tu ibana? Molo disukkun ibana donganna na so menikah dope, boi do ra donganna i mangalehon nasehat na sian Bibel. Alai dumenggan do disukkun ibana tu pasangan naung menikah saleleng piga-piga taon, na takkas mananda ibana, jala na togu hubunganna tu Jahowa. Alana boi ma annon diurupi nasida ibana mangulahon nasehat na sian Bibel. Jala boi dipaboa nasida pengalamanna saleleng marrumah tangga nasida.

10. Aha do na lao tabahas muse?

¹⁰ Nungnga tabahas dua sifat na ikkon adong di hita, jala ise na cocok mangalehon nasehat tu hita. Saonari, tabahas ma boasa ikkon tulus rohatta tikki mangido nasehat jala denggan do halak na asing na mambahen keputusan tu hita manang na dang.

BOHA DO CARANA ASA TULUS ROHAKKU TIKKI MANGIDO NASEHAT?

11-12. (a) Aha do na so boi taulahon? (b) Aha do na diulahon Raja Rehabeam tikki naeng mambahen keputusan na penting?

¹¹ Sipata olo do adong halak na mangido nasehat, hape sebenarna nungnga dibahen ibana keputusan. Dipangido ibana pe nasehat i, holan asa adong do halak na mendukung keputusanna i. Jadi dang tulus rohana tikki na mangido nasehat i. Alani i, porlu do ibana marsiajar sian pengalaman ni Raja Rehabeam.

¹² Dung mate si Salomo, anakna ma na gabe raja di Israel, i ma si Rehabeam. Di tikki i, tabo do ngolu ni bangso Israel. Alai didok roha ni nasida, massai borat do karejo na dilehon si Salomo tu nasida. Alani i, ro ma nasida manjuppangi si Rehabeam, jala dipangido ma asa diorui karejo ni nasida. Didok si Rehabeam ma tu nasida asa dipikkiri ibana jo pangidoan ni nasida i. Di mulana, dipangido ibana do nasehat tu akka natua-tua di Israel na saleleng on mangurupi si Salomo. Denggan do na binahenna i. (1 Raj. 12:​2-7) Alai, ditolak si Rehabeam do nasehat ni akka natua-tua i. Boasa? Ra, nungnga diputusson ibana aha na lao ulahononna, jala berharap do ibana asa setuju akka natua-tua i tu keputusanna i. Jadi, dipangido ibana ma nasehat sian akka donganna na poso, jala setuju do nasida tu keputusanna i. (1 Raj. 12:​8-14) Dung i, diihutton si Rehabeam ma nasehat ni akka donganna i. Akibatna, mulai sian i gabe tarbagi ma bangso Israel jala godang ma masalah na dihadapi si Rehabeam.—1 Raj. 12:​16-19.

13. Aha do na patuduhon na tulus rohatta tikki mangido nasehat?

¹³ Aha do na taparsiajari sian si Rehabeam? Ikkon tulus do rohatta tikki naeng mangido nasehat. Jala unang ma tatolak nasehat i molo dang sesuai tu rohatta. Jadi pikkirhon ma on: ‘Tikki hupangido nasehat, pittor hutolak do i ala dang sesuai tu na di rohakku?’

14. Tikki dilehon nasehat tu hita, aha do na ikkon taingot? (Ida gambar.)

¹⁴ Misalna, adong ma halak na menawarhon karejo na timbo gajina tu sahalak donganta. Andorang so dijalo ibana karejo i, dipangido ibana do nasehat sian sahalak sintua. Dipaboa donganta i do molo dijalo ibana karejo i, ikkon ditinggalhon ibana do keluargana saleleng piga-piga tikki. Dipaingot sintua i do ibana tu prinsip ni Bibel. Didok, tanggung jawab ni kepala keluarga na uppetting, i ma mangurupi keluargana asa togu hubunganna tu Jahowa. (Eps. 6:4; 1 Tim. 5:8) Dang lomo roha ni donganta i tu nasehat ni sintua i. Jadi, sai disukkuni ibana do muse akka dongan na asing. Tujuanna, lao mangalului halak na mendukung keputusanna. Molo diulahon ibana songon i, tulus do rohana na mangido nasehat i? Naung dibahen ibana do keputusan? Jala disukkun ibana pe i holan asa adong do na mendukung keputusanna i? Taingot ma, akkal situtu do roha i. (Jer. 17:9) Jadi sian on taboto, sipata nasehat na so tahalomohon i do na tahaporluhon.

HALAK NA ASING DO HUPANGIDO MAMBAHEN KEPUTUSAN DI AU?

15. Aha do na so boi taulahon, jala boasa?

¹⁵ Lomo do roha ni Jahowa asa hita sandiri na mambahen keputusan di hita. (Gal. 6:​4, 5) Songon naung tabahas, andorang so mambahen keputusan, denggan do jolo talului nasehat sian Bibel dohot sian akka dongan na togu hubunganna tu Jahowa. Alai ikkon manat do hita. Unang tapangido halak na asing na mambahen keputusan di hita. Adong do ra na mandok songon on tu halak na dihaporseai nasida, “Aha do na diulahon ho molo songon situasikkon na diadopi ho?” Jala adong do na maniru aha na diulahon halak na asing, alai dang jolo denggan dipikkirhon taringot i. 

16. Masalah aha do na terjadi di huria na di Korint, jala ise do na ikkon mambahen keputusan taringot i? (1 Korint 8:7; 10:​25, 26)

¹⁶ Taida ma na masa di huria na di Korint di abad na parjolo. Adong masalah taringot mangallang jagal naung dipelehon tu akka patung. Dipodai si Paulus do nasida, “Taboto do molo akka patung i dang adong lapatan ni i, ai holan sada do Debata.” (1 Kor. 8:4) Alani hata ni si Paulus i, adong do piga-piga na merasa boi do diallang nasida jagal na digadis di pasar, nang pe nga dipelehon i tu akka patung. Alai, adong do na so olo mangallang jagal sisongon i ala targanggu panggora ni rohana. (Jaha 1 Korint 8:7; 10:​25, 26.) Jadi, keputusan pribadi do on. Dang hea dipangido si Paulus tu halak Kristen na di Korint i asa nasida na mambahen keputusan tu halak na asing, manang mangihutton na diulahon halak. Alana songon na didok di Bibel, “Ganup do hita ikkon mampartanggung jawabhon parniulaotta di jolo ni Debata.”—Rom 14:​10-12.

17. Molo holan maniru na diulahon halak do hita, aha do akibat ni i? Paboa ma contohna. (Ida gambar.)

¹⁷ Aha do parsiajaranna tu hita saonari? Contohna, pikkirhon ma taringot fraksi darah.b Ikkon tabahen do keputusan taringot naeng manjalo i manang na dang. Dang mura memang mangattusi taringot on. Alai, ikkon hita sandiri do na mambahen keputusan taringot i jala mangihutton akka prinsip ni Bibel. (Rom 14:4) Molo holan maniru aha na diulahon halak na asing do hita, olo do gabe gale panggora ni rohatta. Jadi asa boi talatik panggora ni rohatta, ikkon hita sandiri do na mambahen keputusan. (Heb. 5:14) Lao mangurupi hita mangulahon i, tabahen ma riset. Alai molo dang haru taattusi dope taringot prinsip ni Bibel na adong hubunganna tu situasitta, tapangido ma nasehat sian akka donganta na togu hubunganna tu Jahowa.

SAI RADE MA MANJALO NASEHAT

18. Aha do na diparade Jahowa tu hita?

¹⁸ Pos do roha ni Jahowa tu hita. Diloas Ibana do hita sandiri na mambahen keputusan tu diritta. Diparade Ibana do Bibel dohot akka dongan na boi mangurupi hita mangulahon akka prinsip na adong di Bibel. Tutu ma, Ama parholong do Jahowa i, jala sai diparrohahon do hita. (Poda 3:​21-23) Jadi, boha do caratta lao mandok mauliate tu sude na diparade Jahowa tu hita?

19. Boha do carana asa toktong las roha ni Jahowa tabahen?

¹⁹ Tapikkirhon ma on: Pasti las hian do roha ni natua-tua mangida akka gellengna gabe naposo ni Jahowa na marbisuk jala rade mangurupi halak na asing. Dos songon i ma, Jahowa pe las hian do rohana molo marbisuk hita, olo hita mangido nasehat, jala tabahen akka keputusan na patuduhon holongta tu Ibana.