Cara Mangalehon Nasehat na Denggan

1. Ise do na boi mangalehon nasehat, jala boasa porlu taulahon i?

LOMO do rohamuna mangalehon nasehat tu halak na asing? Piga-piga halak lomo do rohana mangulahon i. Alai na deba, olo do ra segan manang mabiar. Alai taingot ma, sude do hita porlu mangalehon nasehat tu na asing. Boasa? Jesus mandok, molo marsihaholongan hita ditanda halak ma hita siseanna. (Joh. 13:35) Sada caratta patuduhon holong tu akka donganta, i ma mangalehon nasehat. Didok di Bibel molo olo hita menasehati donganta, boi do i mambahen lam akrab hita tu ibana.—Poda 27:9.

2. Ikkon songon dia do cara ni akka sintua mangalehon nasehat, jala boasa? (Ida kotak “Nasehat na Dilehon di Parpunguan di Parsitongaan ni Minggu”.)

² Ikkon diboto akka sintua do boha cara na denggan mangalehon nasehat tu halak na asing. Boasa? Nungnga dilehon Jahowa dohot Jesus tu nasida tugas lao mamparmahani huria. (1 Ptr. 5:​2, 3) Sada cara nasida lao mangulahon i, i ma mangalehon nasehat na sian Bibel. Contohna, tikki pasahatton jamita di huria. Asing ni i, dilehon akka sintua do tong nasehat tu hita ganup marsada-sada. Jala diurupi nasida do tong akka halak na mandao sian huria. Jadi boha do carana asa boi akka sintua dohot hita sude mangalehon nasehat na denggan?

3. (a) Ise do na boi tatiru asa denggan caratta mangalehon nasehat? (Jesaya 9:6; ida kotak “Tiru ma Jesus Tikki Mangalehon Nasehat”.) (b) Aha do na lao tabahas di artikel on?

³ Asa taboto boha cara na denggan mangalehon nasehat, boi do hita marsiajar sian akka halak na disurat di Bibel. Contohna Jesus. Didok di Bibel, “Penasehat na Marbisuk” do Jesus i. (Jaha Jesaya 9:6.) Di artikel on, lao tabahas ma aha do na porlu taulahon molo adong na mangido nasehat sian hita. Jala aha na ikkon taulahon tikki taboto adong na porlu dinasehati tung pe dang dipangido. Dung i, tabahas ma boha cara na denggan mangalehon nasehat jala andigan tikki na pas mangulahon i.

TIKKI DIPANGIDO

4-5. Molo adong na mangido nasehat tu hita, aha do na ikkon tapikkirhon? Bahen ma contoh.

⁴ Boha do perasaanta molo adong na mangido nasehat sian hita? Las do ra rohatta ala porsea ibana tu hita jala lomo rohatta mangurupi ibana. Alai denggan do jolo tapikkirhon on, ‘Au do na cocok mangalehon nasehat tu ibana?’ Sipata na dumenggan na boi taulahon, i ma mangurupi ibana mangalului halak na benar-benar mangattusi situasina, jala na boi mangalehon nasehat na denggan tu ibana.

⁵ Bayakkon ma situasi on. Adong ma donganmuna na marsahit na parah. Nungnga diriset ibana taringot piga-piga perawatan kesehatan. Dung i, dipangido ibana ma pandapotmuna taringot perawatan kesehatan na dia do na cocok tu ibana. Ra, lomo do rohamuna tu sada perawatan tertentu. Alai ala dang dokter hamu, dang diboto hamu perawatan na dia na cocok tu donganmuna i. Molo songon i situasina, urupi ma ibana mangalului dokter na boi mangubati sahitna i.

6. Boasa dang denggan molo hatop-hatop mangalehon nasehat?

⁶ Olo do ra didok rohatta cocok do hita na mangalehon nasehat tu sasahalak. Alai, unang ma pittor naeng tanasehati ibana. Boasa? Poda 15:28 mandok, “Jolo dipikkiri halak na tigor marroha do hata na lao sidohononna.” Alai olo do ra nungnga taboto nasehat aha na lao talehon tu ibana. Nang pe songon i, ikkon jolo tariset do taringot situasina i, tatangiakkon, jala manat ma tapikkirhon nasehat aha na lao lehonotta tu ibana. Molo taulahon i, boi ma nasehatta i sesuai tu lomo ni roha ni Jahowa. Saonari taparrohahon ma pengalaman ni Panurirang Natan.

7. Aha do na taparsiajari sian Panurirang Natan?

⁷ Hea do dipaboa Raja Daud tu Panurirang Natan na lomo rohana lao mambangun bagas joro ni Jahowa. Pittor didok si Natan do, denggan do rencana ni si Daud i. Alai sebenarna, ikkon jolo disukkun si Natan hian do Jahowa. Alana dang si Daud dipillit Jahowa lao mambangun bagas joro i. (1 Kron. 17:​1-4) Jadi sian on marsiajar hita, tikki adong na mangido nasehat tu hita denggan do molo ‘manat hita makkatai’.—Jak. 1:19.

8. Aha do muse akibatna molo hatop-hatop hita mangalehon nasehat?

⁸ Molo hatop-hatop hita mangalehon nasehat tu sasahalak, adong do muse bahayana. Misalna ala diihutton ibana nasehatta i, olo do gabe adong masalah na diadopi ibana. Molo songon i, gabe dohot do hita martanggung jawab disi. Alani i, manat ma tapikkirhon nasehat aha na lao tadokkon.

TIKKI DANG DIPANGIDO

9. Andorang so mangalehon nasehat, aha do na ikkon diingot akka sintua? (Galatia 6:1)

⁹ Sipata, ikkon rade do akka sintua mangalehon nasehat tu sasahalak di huria “na mangulahon na sala”. (Jaha Galatia 6:1.) Ise do “na mangulahon na sala” na dimaksud di ayat i? I ma halak na mambahen keputusan na so denggan, na boi mambahen ibana gabe mangulahon dosa na serius. Ikkon diurupi akka sintua do ibana asa toktong manomba Jahowa jala boi mangolu salelengna. (Jak. 5:​19, 20) Alai ikkon diingot akka sintua do molo pe berbeda keputusan na dibahen sasahalak i tu na di roha ni nasida, on dang berarti nungnga diulahon sasahalak i na dihasogohon roha ni Jahowa. Alana, diloas Jahowa do hita mambahen keputusan sesuai tu panggora ni rohatta be. (Rom 14:​1-4) Alai boha do molo memang sala ibana jala porlu dinasehati?

10-12. Molo adong sasahalak na porlu dinasehati, aha do na ikkon diulahon akka sintua? (Ida gambar.)

¹⁰ Memang, dang sai mura di akka sintua lao mangalehon nasehat tu halak na so mangido i sian nasida. Boasa tadok songon i? Songon na didok Apostel Paulus, olo do ra dang sadar halak “na mangulahon na sala” i molo ibana porlu dinasehati. Jadi andorang so mangalehon nasehat, adong do piga-piga na ikkon diulahon akka sintua asa olo donganta i manjalo nasehat sian nasida.

¹¹ Pikkirhon ma tudosan on: Adong ma sahalak partani na naeng manuan boni di tano na karas. Andorang so disuan ibana boni i, pasti jolo diombak ibana do tanona. Dung i, disuan ibana ma boni i. Jala muse, disiram ibana ma boni i asa boi denggan tubu. Dos songon i ma, andorang so dilehon sahalak sintua nasehat, adong do piga-piga na porlu diulahon ibana. Misalna, ikkon dilului ibana do tikki na pas lao makkatai tu donganta i. Ikkon paboaonna do na parduli do ibana tu donganta i, jala adong na lao dohononna. Molo ditanda do sintua i sahalak na burju jala parholong, pasti gabe rade do donganta i manjalo nasehat sian ibana.

¹² Tikki makkatai nasida, porlu do dipaboa ibana sude do halak hea mambahen kesalahan jala porlu dinasehati. Molo diulahon sintua i songon i, sarupa ma i songon na “mangombak tano” nakkin. (Rom 3:23) Ikkon dipakke ibana do tong Bibel lao patuduhon sala do keputusan na dibahen donganta i. Alai ikkon lambok do carana tikki mangulahon i. Molo nungnga disadari donganta i kesalahanna, ikkon dipaboa ibana do aha na porlu ulahonon ni donganta i asa boi muba. Sarupa ma i songon na “manuan boni” nakkin. Jala di ujung ni pakkataion ni nasida, porlu do dipaboa ibana akka na denggan naung diulahon donganta i, jala rap martangiang nasida. Molo diulahon ibana songon i, sarupa ma i songon na “maniram boni” nakkin.—Jak. 5:15.

13. Boha do cara ni akka sintua lao mamastihon nungnga diattusi sasahalak be nasehat ni nasida?

¹³ Sipata tikki dinasehati sintua sasahalak, olo do ra dang pittor diattusi ibana aha maksud ni nasehat i. Jadi, aha do na ikkon diulahon akka sintua? Porlu do dibahen nasida sukkun-sukkun lao mamboto nungnga diattusi sasahalak i nasehat ni nasida, jala nungnga diboto ibana aha na porlu ulahononna. Alai, ikkon lambok do cara ni akka sintua tikki mangulahon on.—Pjm. 12:11.

DI TIKKI NA PAS MARHITE CARA NA DENGGAN

14. Denggan do molo talehon nasehat tikki muruk dope hita? Patorang ma.

¹⁴ Ala dang sempurna hita, olo do sipata taulahon manang tadok hata na mambahen haccit roha ni na asing. (Kol. 3:13) Jala di Bibel pe didok do, sipata olo do gabe muruk hita alani pambahenan manang hata ni halak. (Eps. 4:26) Alai di tikki sisongon i, unang ma tanasehati halak na asing. Boasa? Alana molo talehon nasehat tikki muruk dope hita, boi do gabe dang denggan hasilna. Jala didok do tong di Bibel, “Halak na tarrimas dang diulahon i na sittong di jolo ni Debata.” (Jak. 1:20) On dang berarti dang boi tapaboa perasaanta tu halak na mambahen haccit rohatta. Alai, jolo tenang ma hita baru pe makkatai hita tu ibana. Saonari, taparsiajari ma contoh sian si Elihu, tikki dinasehati ibana si Job.

15. Aha do na taparsiajari sian si Elihu? (Ida gambar.)

¹⁵ Saleleng piga-piga ari, sabar do si Elihu manangihon si Job. Di tikki i, sai naeng dipatudu si Job do na sala hata ni akka donganna i taringot dirina. Asi do roha ni si Elihu mangida si Job. Alai, muruk do tong ibana mambege hata ni si Job i. Alana, didokkon si Job do akka na so sittong taringot Jahowa, jala holan dirina do na sai dipikkirhon ibana. Nang pe songon i, dipaima si Elihu do tikki na pas lao menasehati si Job. Sopan jala tenang do ibana tikki mandok hatana i tu si Job. (Job 32:2; 33:​1-7) Aha ma parsiajaranna tu hita? Talului ma tikki na pas lao mangalehon nasehat. Asing ni i, sopan jala lambok ma hita tikki mangulahon i.—Pjm. 3:​1, 7.

SAI RADE MANGALEHON NASEHAT JALA OLO DINASEHATI

16. Aha do na taparsiajari sian Psalmen 32:8?

¹⁶ Didok Jahowa tu hita, “Lehonokku ma poda tu ho jala parrohahonokku do ho.” (Jaha Psalmen 32:8.) Lapatanna, dilehon Jahowa do tu hita nasehat. Alai dang holan i. Urupanna do tong hita asa boi mangulahon nasehat i. Alani i, tatiru ma Jahowa. Dung talehon nasehat tu sasahalak, toktong ma tapapos rohana jala taurupi ma ibana asa boi mangulahon nasehat na talehon i.

17. Dipatudos tu aha do nasehat na dilehon akka sintua, jala boasa? (Jesaya 32:​1, 2)

¹⁷ Di ari parpudi on, porlu hian do nasehat di hita. Jala ikkon rade do tong hita mangalehon nasehat tu na asing. (2 Tim. 3:1) Misalna, akka sintua. Ikkon rade do nasida mangalehon nasehat na berdasarhon Bibel. Jala didok di Bibel, dipatudos do nasehat ni nasida i “songon aek na mardalan di tonga-tonga ni luat na koring”. Boasa? Alana, nasehat ni nasida i boi patoguhon rohatta jala mangurupi hita asa toktong manomba Jahowa. (Jaha Jesaya 32:​1, 2.) Asing ni i, mandok mauliate do tong hita tu akka donganta na rade mangalehon nasehat na tahaporluhon. Nasehat ni nasida boi dipatudos “songon apel na dibahen sian mas jala dipeakkon di talam na sian perak”. (Poda 25:11) Jadi, sai anggiat ma toktong hita marsiajar lao mangalehon nasehat na denggan tu na asing jala olo ma tong hita dinasehati.