Mungkin do Boi Adil Sistem Ekonomi di Portibi on?

Di godang negara, demo do akka halak alani situasi ekonomi na so adil di negarana. Tamba parah ma situasi on alani pandemi COVID-19. Marsak do akka halak ala ikkon lockdown nasida, lam maol mangalului hepeng, jala maol mangalului parubatan na denggan. Di situasi on lam takkas ma tarida perbedaan ni halak na mora dohot na pogos.

Boi do berakhir masalah ekonomi na di portibi on? Boi. Dipatorang do di Bibel aha na lao diulahon Debata lao pasaehon sude masalah ni jolma.

Akka masalah na lao dipasae Debata

Masalah: Dang adong jolma na sanggup mangatasi masalah ekonomi ni sude jolma.

Solusi: Gattion ni Debata ma pamarettaon ni jolma mamakke pamarettaonna na digoari Harajaon ni Debata. Sian surgo do Harajaon on mamaretta tu liat portibi on.—Daniel 2:44; Mateus 6:10.

Hasil: Molo Harajaon ni Debata mamaretta di portibi on, sempurna do carana mangatur sude. Dang na lao adong be halak na pogos manang halak na susa mangalului hepeng. (Psalmen 9:7-9, 18) Na lao dinikmati akka jolma ma hasil kerja keras ni nasida, denggan ma hasil karejona, jala puas ma nasida menikmati rap dohot keluargana. Ai adong do janji ni Debata disurat Bibel na mandok, “Dibangun nasida ma jabu jala nasida ma na mangingani, dibahen nasida ma ladang anggur jala nasida ma na mangallang parbuena. Dang dipajongjong nasida jabu asa halak na asing mangingani, jala dang halak na asing na lao mangallang na disuan nasida.”—Jesaya 65:21, 22.

Masalah: Dang boi dihindari jolma akka situasi na mambahen nasida susa dohot na mambahen nasida maol mangalului hepeng.

Solusi: Melalui Harajaonna, hancurhonon ni Debata ma sude na mambahen jolma marsak jala susa.

Hasil: Molo dung mamaretta Harajaon ni Debata, dang na lao masa be akka situasi na mambahen jolma maol manggohi kebutuhanna jala na mambahen mate anggota keluargana. Dang na lao masa be kelaparan, porang, dohot pandemi. (Psalmen 46:9; 72:16; Jesaya 33:24) Ai didok Debata do tu naposona, “Toktong do bangsokku maringanan di inganan na dame, di inganan na aman jala na dame.”—Jesaya 32:18.

Masalah: Godang do halak na jotjot dimanfaatton halak na serakah manang na egois.

Solusi: Di Harajaon ni Debata, diajari do akka halak asa umholongan rohana tu donganna jolma sian apala tu dirina sandiri.—Mateus 22:37-39.

Hasil: Di Harajaon ni Debata tiruon ni akka halak ma holong ni Debata, “dang holan dirina sandiri na dipikkirhon”. (1 Korint 13:4, 5) Bibel mandok, “Dang adong manang aha pe sian nasida na mambahen marjea manang na mambahen sega di sude dolokku na badia i, ai gok parbinotoan taringot Jahowaa do saluhut tano on, dos songon aek na manggohi laut.”—Jesaya 11:9.

Dipaboa do di Bibel molo hita mangolu di ari parpudi. Satokkin nai pasauton ni Debata nama janjina lao pasaehon sude masalah ekonomi.b (Psalmen 12:5) Alai sebelum terjadi i, adong do prinsip ni Bibel na boi mangurupi hita mangatasi masalah di parhepengon. Contohna tajaha ma artikel “Carana Berhemat Tikki Moru Penghasilan” dohot “Pandangan yang Benar tentang Uang”.

Pandapot na salah taringot Bibel dohot situasi ekonomi

Pandapot na sala: Torus do adong halak na pogos di portibi on, alana didok Jesus, “Ai anggo halak na pogos toktong do adong rap dohot hamu.”—Mateus 26:11.

Na sasittongna: Sebenarna na didok Jesus di ayat i, saleleng dang adil sistem ekonomi ni portibi on, tetap do adong halak na pogos. Alai lao do Jesus “marbarita na uli tu na pogos”. Dipaboa Jesus do na lao ro Harajaon ni Debata jala dang adong be na pogos disi.—Lukas 4:18, 43.

Pandapot na sala: Holan halak na pogos do na boi mambahen las roha ni Debata. Ai didok Jesus do, “Lao ma ho, gadis ma artam jala lehon ma i tu na pogos.”—Mateus 19:21.

Na sasittongna: Dang sada aturan na didok di ayat i na ikkon diihutton sude murid ni Jesus. Alai hata ni Jesus i holan tu sahalak doli-doli na holan mamikkirhon artana do. Disuru Jesus do doli-doli i asa mambahen lebih sederhana ngoluna jala olo rade gabe muridna.

Pandapot na sala: Cara ni Debata mangalehon pasu-pasu tu sasahalak, i ma mambahen sasahalak i mamora. Ai didok do di Bibel, “Pasu-pasu ni Jahowa do na mambahen halak mamora.”—Poda 10:22.

Na sasittongna: Di Bibel “pasu-pasu ni Jahowa” i sebenarna dang lao mandok mamora di arta. Alai didok do sasahalak “mamora” ala akrab hubunganna tu Debata, adong tujuan ni ngoluna, jala pos rohana tu janji ni Debata di ari na naeng ro. (Psalmen 25:14; Johannes 17:3) Memang najolo adong do naposo ni Debata na dibahen mamora, alai godangan sian halak Kristen dang halak na mora. (1 Musa 24:34, 35; Jakobus 2:5) Bahkan Jesus sandiri pe dang godang artana.—Mateus 8:20.

Pandapot na sala: Ajaran ni komunis do na diajarhon di Bibel, alana didok do tu halak Kristen di abad na parjolo asa ‘digadis nasida akka arta ni nasida jala dibagi tuhorna i tu sude’.—Ulaon ni Apostel 2:44, 45.

Na sasittongna: Sebenarna akka ayat i paboahon taringot pengaturan sementara na dibahen lao mangurus kebutuhan ni halak na baru tardidi do. Ai halak Kristen na tardidi i ro tu Jerusalem holan lao merayahon perayaan Pentakosta hian do. (Ulaon ni Apostel 2:5) Alai ala baru dope nasida gabe halak Kristen, porlu do nasida godang marsiajar. Jadi ikkon ulleleng ma nasida tinggal di Jerusalem. Alani i dipapungu akka halak Kristen na asing ma sumbangan sukarela asa adong dipakke lao paradehon sipanganon dohot tempat tinggal ni nasida.—Ulaon ni Apostel 2:41, 42, 46, 47.

a Jahowa, i ma goar ni Debata na disurat di Bibel.—Psalmen 83:18.

b Lao mamboto boasa isi ni Bibel i boi tahaporseai, ida ma artikel “Bibel—Hasittongan na Boi Dihaporseai”.