Boi do Agama Terlibat tu Politik?

Godang do halak di liat portibi on na mangakku mangihutton Jesus terlibat tu politik. Lao mempromosihon ajaran agama ni nasida dohot standar moralna, didukung nasida do sasahalak asa dohot tu politik manang partai politik tertentu. Asing ni i, jotjot do dipakke halak na di politik masalah moral dohot sosial lao manarik roha ni akka halak na maragama asa mendukung nasida. Jotjot do pamimpin agama mencalonkan diri lao mandapot jabatan di politik. Jala di piga-piga negara, agama “Kristen” i dianggap do sada status na istimewa manang agama na istimewa.

Menurut hamu, ikkon terlibat do na mangihutton Jesus tu politik? Boi ma diboto hamu alusna marhite mangida contoh ni Jesus. Didok ibana do, “Nungnga hupatuduhon sitiruon tu hamu, alani i ikkon diulahon hamu do songon na hubahen i tu hamu.” (Johannes 13:15) Songon dia do pandangan ni Jesus tu politik?

Terlibat do Jesus tu politik?

Daong. Dang terlibat Jesus tu politik na di portibi on.

Dang dilului Jesus jabatan politik. Bahkan tikki ditawarhon Sibolis tu ibana “sude harajaon ni portibi on” dang olo ibana manjalo i. Sian i tarida, ditolak Jesus do kesempatan lao mengendalihon pamarettaon ni jolma. (Mateus 4:8-10)a Di kesempatan na asing dipaksa akka halak do Jesus asa dohot tu politik, ala dianggap nasida massai denggan do Jesus molo gabe pamimpin. Alai didok di Bibel, “Diboto Jesus ma na naeng paksaon ni nasida ibana gabe raja, alani i lao ma sahalakna muse tu dolok.” (Johannes 6:15) Jadi ditolak Jesus do pangidoan ni akka jolma i, dang olo ibana terlibat tu politik.

Dang olo Jesus ikut campur tu masalah politik. Misalna di tikki ni Jesus, dang lomo roha ni halak Jahudi mambayar pajak tu pamaretta ni Rom jala dianggap nasida do i tuntutan na so adil. Dicoba halak Jahudi do asa marpihak Jesus tu nasida, alai dang olo Jesus ikut campur tu masalah i. Didok ibana do tu nasida, “Lehon ma tu Kesar appuna ni Kesar, jala tu Debata appuna ni Debata.” (Markus 12:13-17) Tetap do Jesus netral di urusan politik. Alai dipatudu ibana do molo pajak na dipangido pamaretta ni Rom i porlu dibayar. Di tikki na sarupa dipatudu Jesus do na porlu mangoloi pamaretta, alai terbatas do i. Sasahalak dang boi mangalehon tu pamaretta aha na seharusna ikkon dilehon tu Debata, termasuk ma i melayani jala manomba Debata.—Mateus 4:10; 22:37, 38.

Harajaon ni Debata do na diandalhon Jesus jala i do na diajarhon tu akka halak. (Lukas 4:43) Dang olo Jesus terlibat tu politik ala diboto ibana do, holan Harajaon ni Debata do na boi pasautton lomo ni roha ni Debata di tano on, dang pamarettaon ni jolma. (Mateus 6:10) Diboto Jesus do muse dang na lao dipakke Harajaon ni Debata i pamarettaon ni jolma, bahkan lao digattihon do i.—Daniel 2:44.

Dohot do terlibat halak Kristen di abad na parjolo tu politik?

Daong. Dioloi muridna do hata ni Jesus asa mambahen diri ni nasida “dang sian portibi on”. (Johannes 15:19) Diihutton nasida do na dibahen Jesus, dang olo nasida terlibat tu politik. (Johannes 17:16; 18:36) Alai ulaon na diparettahon Jesus do na uppetting di ngolu ni nasida, i ma marbarita na uli taringot Harajaon ni Debata.—Mateus 28:18-20; Ulaon ni Apostel 10:42.

Mangoloi Debata do na uppetting di ngolu ni halak Kristen di abad na parjolo. Alai takkas do diboto nasida porlu do dioloi nasida pamaretta. (Ulaon ni Apostel 5:29; 1 Petrus 2:13, 17) Dioloi nasida do hukum na dibahen pamaretta jala dibayar do pajak. (Rom 13:1, 7) Nang pe dang terlibat nasida tu politik, dimanfaatton nasida do perlindungan hukum dohot pelayanan na disediahon pamaretta.—Ulaon ni Apostel 25:10, 11; Pilippi 1:7.

Netral do halak Kristen saonari tu politik

Takkas do dipatuduhon di Bibel na so terlibat Jesus dohot akka na mangihutton ibana tu politik. Alani i ma, Saksi Jahowa di liat portibi on tetap netral tu politik. Songon halak Kristen di abad na parjolo ulaon na diparettahon Jesus do na diulahon nasida, i ma paboahon “barita na uli taringot tu Harajaon”.—Mateus 24:14.