Memang Boi do Piala Dunia Mambahen Akka Halak Gabe Marsada?—Aha do na Didok Bibel Taringot i?

Adong hira-hira lima miliar halak na manonton Piala Dunia FIFA na dibahen sian tanggal 20 November sahat tu 18 Desember 2022. Godang do halak sian marragam negara ro manonton akka pertandinganna. Alai godang do na berharap acara on boi mambahen marsada akka halak.

• “Boi do olahraga i mambahen lam denggan portibi on, alana boi do i mambahen halak gabe semangat jala marsada.”—Nelson Mandela, mantan presiden Afrika Selatan.

• “Boi do sepak bola i mambahen marsada akka halak, alana boi nasida rap marlas ni roha, semangat, jala gabe adong harapan ni nasida. Jala boi do i mambahen nasida gabe parduli tu na asing, ala nasida merasa adong persamaan ni nasida dohot na asing.”—Gianni Infantino, presiden FIFA.a

Memang boi do Piala Dunia dohot pertandingan olahraga na asing mambahen akka halak gabe marsada? Boi do portibi on gabe dame jala marsada?

Toho do i boi mambahen halak marsada?

Piala Dunia di taon on dang holan taringot pertandingan sepak bola. Acara on mambahen godang halak mambahas taringot akka masalah sosial dohot politik, songon hak asasi manusia, ras, dohot ekonomi.

Nang pe songon i, lomo do roha ni godang halak menikmati acara pertandingan internasional songon Piala Dunia manang na asing. Hiburan do i di nasida. Alai memang, dang na lao boi acara sisongon i mambahen nasida toktong marsada. Gariada, godang do na ujung-ujungna gabe marbadai di acara pertandingan sisongon i. Jala i do na didok Bibel taringot pangalaho ni akka halak saleleng “ari parpudi”.—2 Timoteus 3:1-5.

Boi do annon sude halak marsada

Bibel mandok, boi do annon sude halak gabe marsada, jala “Harajaon ni Debata” na di surgo ma na lao pasautton i.—Lukas 4:43; Mateus 6:10.

Jesus Kristus, Raja ni Harajaon i, lao mamastihon dame sude na di tano on. Bibel mandok:

• “Gabe lam denggan ma ngolu ni halak na tigor marroha, dos ma nasida songon suan-suanan na lomak. Jala gok ma hadameon.”—Psalmen 72:7.

• “Paluaonna do akka halak na pogos na jou-jou mangido asa diurupi . . . Paluaonna do nasida sian akka halak na manusai nasida dohot sian halak na kejam.”—Psalmen 72:12, 14.

Saonari pe, adong marjuta halak di 239 negeri naung marsada ala mangihutton ajaran ni Jesus. Dang sogo be roha ni nasida tu akka halak na berbeda latar belakangna sian nasida. Lao mamboto lam godang taringot i, jaha ma artikel “Unang Be Marsogo ni Roha tu na Asing.”