Boasa Politik Mambahen Perpecahan?—Aha do na Didok Bibel Taringot i?

Di liat portibi on, godang negara na tarbagi secara politik. Menurut Pusat Penelitian Pew di Amerika Serikat taon 2022, “65% halak na dewasa di 19 negara paboahon, gabe adong do perpecahan di negara ni nasida alani partai politik”.

Songon dia do di ingananmuna, tarbagi do halak alani politik? Boasa masa i? Adong do jalan keluarna? Parrohahon ma aha na didok Bibel taringot i.

Akka parange na mambahen jolma dang marsada

Didok Bibel hita mangolu “di ari parpudi”. Alani i, gabe godang ma parange ni halak na mambahen jolma maol marsada.

• “Na ro ma tikki hasusaan di ari parpudi. Ai makkaholongi dirina sandiri ma jolma, . . . dang olo mardos ni roha.”—2 Timoteus 3:1-3.

Nang pe godang pamaretta marsitutu mambahen na denggan, alai tong do nasida dang boi marsada, jala dang marhasil pasaehon akka masalah. Songon i ma na dipaboa Bibel marribu taon naung salpu taringot tikkitta on.

• “Gabe susa do molo jolma na mangarajai jolma.”—Parjamita 8:9.

Alai adong do jalan keluarna. Dipaboa di Bibel, adong sada pamarettaon na boi pasaehon sude masalahta.

Pamimpin na dumenggan jala parduli

Didok Bibel, Jesus do raja manang pamimpin ni pamarettaon i. Dang songon pamimpin na asing, margogo jala marhuaso do ibana mambahen sude jolma marsada jala mardame.

• “Saleleng mamaretta ibana, gabe lam denggan ma ngolu ni halak . . . jala gok ma hadameon.”—Psalmen 72:7.

• ‘Sude bangso mangoloi ibana.’—Psalmen 72:11.

Sahalak pamimpin na dumenggan do Jesus. Parduli do ibana jala lomo rohana mangurupi akka halak, tarlumobi na susa alani ketidakadilan.

• “Ai paluaonna do akka halak na pogos na jou-jou mangido asa diurupi, jala paluaonna do akka na dangol dohot na so adong pangalu-aluanna. Asi do rohana tu halak na dangol dohot tu halak na pogos, jala dijaga ibana do ngolu ni halak na pogos. Paluaonna do nasida sian akka halak na manusai nasida dohot sian halak na kejam.”—Psalmen 72:12-14.

Lului ma gumodang hatorangan taringot Harajaon ni Debata, i ma pamarettaon di surga na dipimpin Jesus. Parsiajari hamu ma manfaat na didapot sian i jala songon dia hamu mendukung pamarettaon i.

• Tonton ma video Aha do Harajaon ni Debata i?

• Jaha hamu ma artikel “Kerajaan Allah—Pemerintahan Tanpa Korupsi”.