Songon dia do Ujung ni Porang Dohot Konflik Kekerasan?

LAO DIHANCURHON JAHOWA DO SUDE PAMARETTAON NI JOLMA

Didok Bibel lao dihancurhon Debata nama sude pamarettaon ni jolma di porang Armagedon.a (Pangungkapon 16:16) Di tikki i “dipapungu ma akka raja na di tano on” tu porang di ari na balga, i ma “ari ni Debata Pargogo na So Hatudosan i.” (Pangungkapon 16:14) Jadi Debata do na lao pasaehon sude porang na adong di portibi on.

Lao digatti Debata nama sude pamarettaon ni jolma tu sada pamarettaon, i ma Harajaon ni Debata. Sian surgo do Harajaon i mamaretta jala hot do harajaon i saleleng ni lelengna. (Daniel 2:44) Dipillit Ibana do anakna, i ma Jesus Kristus na gabe raja di Harajaon i. (Jesaya 9:​6, 7; Mateus 28:18) Jala Harajaonb i do na dipangido Jesus asa tatangiakkon. (Mateus 6:​9, 10) Ala holan Harajaon ni Debata na mamaretta jala Jesus do raja ni Harajaon i, gabe boi ma marsada sude jolma na adong di portibi on.

Dang songon pamaretta na adong di portibi on Jesus. Dang olo Jesus mamakke huasona lao pasonakkon dirina sandiri. Ala adil do ibana mamaretta, pos ma rohatta dang na lao dibeda-bedahon ibana hita manang aha pe suku dohot margatta. (Jesaya 11:​3, 4) Dang porlu be loja akka halak lao menuntut keadilan. Alana parduli do Jesus tu sude halak. Bibel mandok, “Paluaonna do akka halak na pogos na jou-jou mangido asa diurupi, Jala paluaonna do akka na dangol dohot na so adong pangalu-aluanna. . . . Paluaonna do nasida sian akka halak na manusai nasida dohot sian halak na kejam.”—Psalmen 72:​12-14.

Lao dihancurhon Harajaon ni Debata ma sude akka senjata na adong di portibi on. (Mika 4:3) Jala na lao diripasson Harajaon i do tong sude halak na jahat, i ma halak na lomo rohana marbadai manang mambahen na jahat tu na asing. (Psalmen 37:​9, 10) Jadi di ari na naeng ro boi ma hita merasa aman manang tu dia pe hita lao.—Hesekiel 34:28.

Molo nungnga mamaretta Harajaon ni Debata di tano on, boi ma hita mandapot ngolu na dumenggan. Dang adong be masalah na mambahen halak gabe marbadai songon hapogoson, haraparon, dohot jabu na so layak huni. Jadi boi ma sude halak mangallang sipanganon na bergizi jala marlas ni roha tinggal di jabu ni nasida.—Psalmen 72:16; Jesaya 65:​21-23.

Molo nungnga mamaretta Harajaon ni Debata di tano on, mago ma sude akibat ni porang na adong di portibi on. Termasuk ma i masalah kesehatan fisik dohot mental na dirasahon akka halak alani porang. Bahkan halak naung mate pe, boi do dipahehe. (Jesaya 25:8; 26:19; 35:​5, 6) Boi ma muse marpungu sude keluarga di bagasan las ni roha, jala dang diingot be sude akibat ni porang. “Ai nungnga salpu na parjolo i.”—Pangungkapon 21:4.

DANG MARDOSA BE JOLMA

Molo nga mamaretta Harajaon ni Debata di tano on, holan Jahowac ma na disomba akka halak, i ma “Debata parholong jala na mangalehon dame”. (2 Korint 13:11) Marsiajar ma sude halak asa mardame jala marsada. (Jesaya 2:​3, 4; 11:9) Dang na lao susa be akka halak na mangoloi Jahowa ala dang diparhatoban dosa be nasida.—Rom 8:​20, 21.

LAO DIPAMATE DEBATA NAMA SIBOLIS DOHOT AKKA SURU-SURUAN NA JAHAT

Marhite Harajaonna, lao dipamate Debata nama Sibolis dohot akka suru-suruan na jahat na mempengaruhi halak asa olo marporang. (Pangungkapon 20:​1-3, 10) Molo dang adong be pengaruh ni nasida, gabe “gok ma hadameon”.—Psalmen 72:7.

Pos ma rohamuna boi do Debata pasaehon porang dohot konflik kekerasan. Alana balga do huasona jala lomo hian do rohana lao mangulahon i.

• Marbisuk do Debata jala massai gogo do Ibana lao pasaehon porang dohot konflik kekerasan. (Job 9:4) Dang adong na so boi diulahon Ibana.—Job 42:2.

• Dang lomo roha ni Debata mangida halak susa. (Jesaya 63:9) Jala “sogo do rohana tu manang ise pe na makkaholongi ulaon ni halak na kejam”.—Psalmen 11:5.

• Ditepati Debata do sude janjina. Jala Debata na so margabus do Ibana.—Jesaya 55:​10, 11; Titus 1:2.