Sogo do Roha ni Saksi Jahowa tu Halak na Hea Gabe Jemaat ni Nasida?

Sai berupaya do hami makkaholongi sude halak, burju tu nasida, jala mangargai nasida. Molo adong sahalak Saksi Jahowa na so taratur beribadat manang na so beribadat be, berupaya do hami paposhon rohana na dihaholongi hami do ibana. Jala berupaya do hami mangurupi ibana asa jonok muse tu Debata.—Lukas 15:4-7.

Sipata adong do halak na ikkon dipakaluar sian huria. (1 Korint 5:13) Alai ala holong do rohanami tu dongan sahaporseaonnami, berupaya do hami mangurupi ibana asa unang sappe dipakaluar. Bahkan molo tung pe ikkon dipakaluar ibana, holong dope rohanami tu ibana jala diargai hami do ibana songon na didok Bibel.—Markus 12:31; 1 Petrus 2:17.

Aha do na mambahen sasahalak dipakaluar sian huria?

Takkas do didok di Bibel molo mangulahon dosa na balga sasahalak jala dang olo muba, ikkon dipakaluar do ibana sian huria.a (1 Korint 5:11-13) Jala dipaboa Bibel do muse akka dosa na songon dia na boi mambahen sasahalak dipakaluar sian huria. Misalna molo mangalakkup sasahalak, mabuk-mabuk, mambunu, mamukkuli keluargana, manang manakko.—1 Korint 6:9, 10; Galatia 5:19-21; 1 Timoteus 1:9, 10.

Alai dang pittor dipakaluar sasahalak sian huria ala mangulahon dosa na balga ibana. Molo mangulahon dosa na balga sasahalak, berupaya do akka sintuab mangurupi ibana asa muba. (Rom 2:4) Jala dipatudu akka sintua do lambok ni roha dohot burju ni roha. (Galatia 6:1) Boi do ra upaya ni akka sintua on mangurupi halak na mangulahon dosa na balga i manolsoli jala muba. (2 Timoteus 2:24-26) Alai molo diulahon ibana dope dosa na balga i hape nga piga-piga hali akka sintua mangurupi ibana, ikkon dipakaluar ma ibana sian huria. Bahenon ni sintua ma pengumuman di huria na paboahon na so Saksi Jahowa be ibana.

Dua sintua manjahahon piga-piga ayat ni Bibel na patoguhon tu sahalak donganta bawa na poso. Sada sintua maniop bahu ni donganta bawa i tikki makkatai tu ibana. — Dipatudu akka sintua do lambok ni roha dohot burju ni roha tu halak na mangulahon dosa na balga

Aha do manfaatna molo dipakaluar halak na mangulahon dosa na balga sian huria? Boi ma huria mangihutton aturan ni Debata taringot pangalaho na ias jala boi do i manjaga akka dongan di huria sian pengaruh ni halak na mangulahon dosa na balga i. (1 Korint 5:6; 15:33; 1 Petrus 1:16) Asing ni i molo dipakaluar halak na mangulahon dosa sian huria, olo do ra gabe taronjar rohana asa dang mangulahon dosana i be jala muba.—Heber 12:11.

Parduli do Saksi Jahowa tu halak na dipakaluar sian huria?

Dipaingot Bibel do halak Kristen asa “unang mardongan be” tu halak naung dipakaluar sian huria. Bahkan didok Bibel, “Gari mangan pe, dang boi rap hamu dohot halak sisongon i.” (1 Korint 5:11) Jadi dang olo be hami bergaul dohot halak naung dipakaluar sian huria. Alai dang na berarti dang parduli hami tu ibana, tetap do diargai hami ibana. Molo ro ibana tu acara parpunguannami adong do ra sian hami na olo mamakkulingi ibana.c Jala boi do ibana mangido asa diurupi akka sintua lao padenggatton hubunganna tu Jahowa.

Suami istri na mamakkulingi sahalak borua na dipakaluar sian huria tikki ro ibana marpungu. — Dipakkulingi do halak na dipakaluar sian huria tikki ro marpungu

Boha molo adong halak na dipakaluar sian huria alai Saksi Jahowa dope pasanganna dohot gellengna? Nang pe dang boi be ibana manomba Jahowa rap dohot keluargana, alai tetap dope ibana anggota ni keluarga i. Jadi molo sajabu dope nasida, tong do ikkon masipasangapan jala marsihaholongan nasida na sakeluarga.

Boi do halak naung dipakaluar sian huria mangido asa dijuppangi akka sintua. Tikki pajuppang nasida, lehonon ni akka sintua ma akka poda na sian Bibel jala patoguon ni nasida ma ibana asa manolsoli jala mulak tu Debata. (Sakaria 1:3) Molo dang diulahon ibana be dosana najolo i jala dipatudu ibana di parngoluonna na olo ibana mangihutton aturan ni Debata na adong di Bibel, boi ma ibana gabe Saksi Jahowa muse. Songon na diulahon akka halak Kristen di huria Korint najolo tu sahalak bawa naung muba sian dosana, ‘salpuhonon ni akka dongan na di huria ma dosana i jala patoguon ni nasida ma rohana.’—2 Korint 2:6-8.

Boha do perasaan ni akka halak na hea dipakaluar sian huria?

Taida ma jo pengalaman ni piga-piga Saksi Jahowa na hea dipakaluar sian huria alai ujungna mulak muse tu Debata.

“Nungnga martaon-taon au dipakaluar sian huria. Jadi tikki huputusson lao mulak tu Debata, hurippu do pasti sukkunon ni akka sintua ma annon sude na huulahon tikki na dipakaluar i au. Hape on do na didokkon nasida, ‘Fokus ma ho tu na boi diulahon ho saonari.’ Gabe tenang ma perasaanku.”—Si Maria, Amerika Serikat.

“Las hian do roha ni akka dongan tikki mulak au tu huria. Boi do huhilala arga dope au. Diurupi akka dongan i do au asa boi huhilala naung disalpuhon Jahowa dohot akka dongan i do dosakku. On ma na mangurupi au asa unang mandele alani dosakku najolo i. Sai rade do muse akka sintua mangurupi asa jonok hubunganku tu Jahowa. Jala diurupi nasida do au asa boi huhilala na diargai jala dihaholongi Jahowa dope au.”—Si Malcom, Sierra Leone.

“Ala holong roha ni Jahowa tu akka naposona, dipastihon ibana do asa toktong ias organisasina. Las hian do rohakku mamboto on. Molo di akka halak na so manomba Jahowa, hira na kejam do on idaon. Alai porlu do i. Jala i ma buktina na dihaholongi Debata hita. Mandok mauliate do au ala parholong do Debata jala sai rade manalpuhon dosatta.”—Si Sandi, Amerika Serikat.

Pandapot ni akka pakar hukum na so Saksi Jahowa taringot i

Songon dia do pandapot ni akka pakar hukum ala dipakaluar Saksi Jahowa anggotana na so olo bertobat? On ma na didok nasida.

“Molo adong sada organisasi ni agama na berupaya mangihutton akka prinsip na adong di Bibel, hape adong anggotana na so mangihutton prinsip i be, marhak do nasida pakaluarhon ibana. Porlu do on diulahon organisasi i. Alana molo dang boi manang dang olo sasahalak mangihutton prinsip ni Bibel, dang boi be ibana gabe anggota ni organisasi i. Jala molo dang dipakaluar ibana sian organisasi i, boi do ibana mempengaruhi anggota na asing na toktong mangihutton prinsip ni Bibel.”—Pengadilan Tinggi Kehakiman na di Inggris dohot Wales, 7 Juni 2019.
“Nungnga dibahen akka pengadilan di Eropa dohot di daerah na asing be keputusan na mandok marhak do Saksi Jahowa pakaluarhon sasahalak sian organisasina mangihutton kebebasan beragama ni nasida . . . Jala dang marhak pengadilan negara mangattoi urusan ni nasida i.”—Profesor Paulo Pinto de Albuquerque, mantan hakim Pengadilan Hak Asasi Manusia Eropa.

a Najolo molo adong halak na so olo muba, tagoari do ibana halak na dipabali manang dipecat. Alai saonari istilah ni Bibel do na tapakke, i ma halak na dipakaluar sian huria.

b Togu do haporseaon ni akka sintua, jala nasida do na mangajarhon Hata ni Debata. Nasida do na gabe parmahan jala na patoguhon akka naposo ni Debata. Dang margaji nasida.—1 Petrus 5:1-3.

c Adong do halak na dipakaluar sian huria na gabe paroa-roahon organisasi jala torus manjujui akka dongan na di huria asa mangalo paretta ni Jahowa. Bibel mandok “unang pakkulingi hamu” halak sisongon i.—2 Johannes 9-11.